កិច្ចប្រជុំនៅឥណ្ឌូណេស៊ី កម្ពុជា-ថៃ ព្រមព្រៀងលើការសិក្សាបើកច្រកព្រំដែនថ្មី
លោក កុយ គួង អ្នកនាំពាក្យក្រសួងការបរទេសកម្ពុជា បានឲ្យដឹងថា កិច្ចប្រជុំរយៈពេលពីរថ្ងៃ រវាងគណៈកម្មការព្រំដែនចម្រុះកម្ពុជា-ថៃ JBC បានឯកភាពគ្នាលើការសិក្សា ដើម្បីបើកច្រកព្រំដែនថ្មី គឺច្រកព្រំដែនស្ទឹងបត់ នៅខេត្តបន្ទាយមានជ័យ។ កិច្ចប្រជុំលើជម្លោះព្រំដែនកម្ពុជា-ថៃ ដែលត្រូវបិទបញ្ចប់នៅថ្ងៃសុក្រនេះ មិនមានវត្តមានរបស់រដ្ឋមន្ត្រីការបរទេស និងរដ្ឋមន្ត្រីការពារជាតិថៃទេ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ លី ម៉េងហួរ ពីទីក្រុងភ្នំពេញ
កិច្ចប្រជុំរវាងគណៈកម្មការព្រំដែនចម្រុះកម្ពុជា-ថៃ ហៅកាត់ថា JBC ដែលដឹកនាំដោយលោកទេសរដ្ឋមន្ត្រី វ៉ា គីមហុង និងលោក Asda Jayanama របស់ភាគីថៃ នៅប្រទេសឥឥណ្ឌូណេស៊ី បានឯកភាពគ្នាលើការសិក្សា ដើម្បីឈានទៅបើកច្រកព្រំដែនថ្មី នៅខេត្តបន្ទាយមានជ័យ។
លោក កុយ គួង អ្នកនាំពាក្យក្រសួងការបរទេសកម្ពុជា បានមានប្រសាសន៍នៅមុននេះថា គណៈកម្មការព្រំដែនចម្រុះកម្ពុជា-ថៃ បានសម្រេចលើការសិក្សាពីការបើកច្រកស្ទឹងបត់ ក្នុងខេត្តបន្ទាយមានជ័យ។ នោះគឺកម្ពុជា-ថៃ ត្រូវបញ្ជូនក្រុមបច្ចេកទេស ទៅពិនិត្យទីតាំងតំបន់ព្រំដែន ដែលត្រូវកសាងស្ពានឆ្លងកាត់។
នៅថ្ងៃសុក្រនេះ កាសែតថៃ បាងកក ប៉ុស្តិ៍ បានលើកយកសម្តីរបស់លោក Chavanond Intarakomalyasut លេខារបស់លោករដ្ឋមន្ត្រីការបរទេសថៃ មកចុះផ្សាយថា កិច្ចប្រជុំគណៈកម្មការព្រំដែនចម្រុះកម្ពុជា-ថៃ JBC នៅប៊ូហ្គ័រ ប្រទេសឥឥណ្ឌូណេស៊ី រយៈពេលពីរថ្ងៃ ចាប់ពីថ្ងៃទី៧មេសា ឆ្នាំ២០១១ ភាគីទាំងពីរ បានព្រមព្រៀងលើ ៣ ចំណុច។ ទី១-កម្ពុជាថៃ បានព្រមព្រៀងលើការរុករកបង្គោលព្រំដែន ពីលេខ ១ ដល់លេខ ២៣ នៅខេត្តសូរិន្ទ និងខេត្តស៊ីសាកេត។ ទី២-ជ្រើសរើសក្រុមហ៊ុនមួយ ថតឆ្លុះពីលើអាកាស ដើម្បីរុករកខ្សែបន្ទាត់ព្រំដែន នៅតំបន់ព្រំដែនជម្លោះ ជិតប្រាសាទព្រះវិហារ និងចំណុចទី៣-រៀបចំក្រុមបច្ចេកទេស ដើម្បីសិក្សាពីការបើកច្រកព្រំដែនថ្មី គឺច្រកស្ទឹងបត់ នៅខេត្តបន្ទាយមានជ័យ។
ក៏ប៉ុន្តែចំពោះសេចក្តីរាយការណ៍នេះ ត្រូវបានលោក កុយ គួង អ្នកនាំពាក្យក្រសួងការបរទេសកម្ពុជា ចាត់ទុកថា ជាព័ត៌មានបំផ្លើស ដែលបង្ហាញពីការភូតភរ បំផ្លើសការពិត ពីថ្នាក់ដឹកនាំថៃ។
តាមលោក កុយ គួង ចំណុចទី១ និយាយពីការស្វែងរកបង្គោលព្រំដែន ពីបង្គោលលេខ១ ដល់លេខ ២៣ និងចំណុចទី២ ដែលនិយាយថា ត្រូវជ្រើសរើសក្រុមហ៊ុនថត ពីលើអាកាស រកខ្សែព្រំដែនជម្លោះ គឺបរាជ័យទាំងស្រុង។ ការមិនបានឯកភាពគ្នានោះ ដោយសារភាគីថៃ រកលេសខ្ទាស់សព្វបែបយ៉ាង។ នោះគឺសភាថៃ មិនបានអនុម័តនូវកំណត់ហេតុកិច្ចប្រជុំទាំងបី កាលពីឆ្នាំ២០០៨ និងឆ្នាំ២០០៩ ជាមុនសិន។
យ៉ាងណាក៏ដោយ លោក កុយ គួង បានបញ្ជាក់ថា កិច្ចប្រជុំពីរថ្ងៃ បិទបញ្ចប់នៅថ្ងៃទី៨មេសា ឆ្នាំ២០១១ ដែលរដ្ឋមន្ត្រីការបរទេសឥឥណ្ឌូណេស៊ី ជាអ្នករៀបចំ និងធ្វើជាម្ចាស់ផ្ទះនោះ មានតែកិច្ចប្រជុំគណៈកម្មការព្រំដែនចម្រុះកម្ពុជា-ថៃ JBC ប៉ុណ្ណោះ។ ចំណែកកិច្ចប្រជុំ GBC ដឹកនាំដោយរដ្ឋមន្ត្រីការពារជាតិ និងកិច្ចប្រជុំរដ្ឋមន្ត្រីការបរទេសកម្ពុជា ថៃ និងឥឥណ្ឌូណេស៊ី មិនមានទេ ដោយសារតែគ្មានវត្តមានរបស់ភាគីថៃ។
សេចក្តីរាយការណ៍ពីប្រទេសឥឥណ្ឌូណេស៊ី នៅថ្ងៃនេះ បង្ហាញថា នៅពេលផ្តើមកិច្ចប្រជុំរយៈពេល ២ ថ្ងៃ ស្តីពី ជម្លោះព្រំដែនកម្ពុជា-ថៃ កាលពីថ្ងៃព្រហស្បតិ៍ ម្សិលមិញលោករដ្ឋមន្ត្រីការបរទេសឥឥណ្ឌូណេស៊ី ម៉ាទីណា តាលេហ្កាវ៉ា បានថ្លែងថា មានចំណុចសំខាន់ ២ ដែលត្រូវពិភាក្សា។ ទី១-ធ្វើយ៉ាងណា ធានាអោយមានបទឈប់បាញ់ជាអចិន្ត្រៃយ៍ និងជៀសវាងជម្លោះប្រដាប់អាវុធ នៅតំបន់ព្រំដែនកម្ពុជា-ថៃ និងចំណុចទី២-ការដាក់អ្នកសង្កេតការណ៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ