កម្ពុជា ចេញដំណើរទៅចូលរួមកិច្ចប្រជុំនៅឥណ្ឌូណេស៊ី
ដូចការគ្រោងទុក នៅព្រឹកថ្ងៃពុធនេះ ប្រមុខការទូតកម្ពុជា លោក ហោ ណាំហុង បានដឹកនាំដឹកនាំគណៈប្រតិភូជាន់ខ្ពស់កម្ពុជាមួយក្រុម ទៅចូលរួមកិច្ចប្រជុំនៅប្រទេសឥណ្ឌូណេស៊ី ដើម្បីដោះស្រាយជម្លោះព្រំដែនជាមួយថៃ។ ជាកិច្ចប្រជុំ ដែលនិយាយពីការបញ្ជូនអ្នកសង្កេតការណ៍អាស៊ាន មកត្រួតពិនិត្យបទឈប់បាញ់នៅព្រំដែន រួមទាំងការពិភាក្សាពីការវាស់វែងកំណត់ព្រំដែន ជិតប្រាសាទព្រះវិហារ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ លី ម៉េងហួរ ពីទីក្រុងភ្នំពេញ
ក្នុងកិច្ចប្រជុំលើសំណុំរឿងព្រំដែនកម្ពុជា-ថៃ នៅប្រទេសឥណ្ឌូណេស៊ី នាថ្ងៃទី៧ និងថ្ងៃទី៨មេសា ឆ្នាំ២០១១ កម្ពុជានឹងបង្ហាញសុឆន្ទៈសាជាថ្មីម្តងទៀត ដើម្បីឲ្យអ្នកសង្កេតការណ៍អាស៊ាន ចុះមកត្រួតពិនិត្យ បទឈប់បាញ់ជាអចិន្ត្រៃយ៍នៅព្រំដែនជិតប្រាសាទព្រះវិហារ។ នេះបើតាមការអះអាងរបស់លោកប្រមុខការទូត ហោ ណាំហុង នៅមុនពេលចេញដំណើរ នៅព្រឹកថ្ងៃពុធនេះ។ ដំណើរទៅកាន់កិច្ចប្រជុំនៅប្រទេសឥណ្ឌូណេស៊ី ធ្វើឡើងតាមការកោះប្រជុំរបស់រដ្ឋមន្ត្រីការបរទេសឥណ្ឌូណេស៊ី ក្នុងនាមជាប្រធានអាស៊ានប្រចាំឆ្នាំ។
រយៈពេលពីរថ្ងៃនេះ កម្ពុជា-ថៃ នឹងចូលរួមតុប្រជុំក្រៅផ្លូវការ រវាងរដ្ឋមន្ត្រីការបរទេសកម្ពុជា ថៃ និងរដ្ឋមន្ត្រីការបរទេសឥណ្ឌូណេស៊ី រួមទាំងកិច្ចប្រជុំគណៈកម្មការព្រំដែនចម្រុះកម្ពុជា-ថៃ JBC ដឹកនាំដោយលោកទេសរដ្ឋមន្ត្រី វ៉ា គីមហុង និងកិច្ចប្រជុំគណៈកម្មាធិការព្រំដែនទូទៅកម្ពុជា-ថៃ GBC ដឹកនាំដោយលោករដ្ឋមន្ត្រីការពារជាតិ ទៀ បាញ់។
លោកប្រមុខការទូត ហោ ណាំហុង បានលើកឡើងថា កិច្ចប្រជុំនោះ អាចឈានទៅរកការស្រុះស្រួលគ្នា ដើម្បីដាក់អ្នកសង្កេតការណ៍ឥណ្ឌូណេស៊ី នៅព្រំដែនកម្ពុជា និងថៃ។ កិច្ចប្រជុំគណៈកម្មការព្រំដែនកម្ពុជា-ថៃ ក៏អាចឈានទៅ ដល់ការបោះបង្គោលព្រំដែន ពិសេសនៅតំបន់ព្រះវិហារ ដែលជាចំណុចអាទិភាព។
ជាថ្មីម្តងទៀត លោករដ្ឋមន្ត្រីការបរទេស ហោ ណាំហុង បានបង្ហាញសុឆន្ទៈរបស់កម្ពុជា ដើម្បីដាក់អ្នកសង្កេតការណ៍ឥណ្ឌូណេស៊ី ឲ្យបានឆាប់ៗ សម្រាប់ត្រួតពិនិត្យបទឈប់បាញ់ នៅព្រំដែនព្រះវិហារ។
តំបន់ព្រំដែនប្រាសាទព្រះវិហារ កើតមានការវាយប្រយុទ្ធដោយកាំភ្លើងធុនធ្ងន់។ ថៃបានបង្កើនការវាយប្រហារលើកម្ពុជា កាលពីថ្ងៃទី៤ ដល់ថ្ងៃទី៧កុម្ភៈ ឆ្នាំ២០១១ បន្ទាប់ពីកងទ័ពថៃ បានចូលទន្ទ្រាន នាំដល់ការប្រឈមមុខដោយអាវុធ កាលពីថ្ងៃទី១៥កក្កដា ឆ្នាំ២០០៨។
យ៉ាងណាក៏ដោយ រដ្ឋមន្ត្រីការបរទេសថៃ លោក កាស៊ីត ភិរម្យ ដែលត្រូវដឹកនាំគណៈប្រតិភូថៃ ចូលរួមកិច្ចប្រជុំនៅឥណ្ឌូណេស៊ី ត្រូវបានកាសែតថៃ The Nation រាយការណ៍ នៅថ្ងៃទី៦មេសា ឆ្នាំ២០១១ថា អ្នកសង្កេតការណ៍ឥណ្ឌូណេស៊ី អាចចូលមកសង្កេតការណ៍នៅតំបន់ព្រំដែនកម្ពុជា-ថៃ ក្នុងនាមជាអ្នកការទូតតែប៉ុណ្ណោះ។ អ្នកសង្កេតការណ៍ឥណ្ឌូណេស៊ី ដើម្បីត្រួតពិនិត្យបទឈប់បាញ់នៅព្រំដែនព្រះវិហារ ចំនួន ១៥ នាក់ម្ខាងនោះ មិនត្រូវកាន់អាវុធ និងមិនត្រូវប្រើប្រាស់ឯកសណ្ឋានយោធាឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ