ឥណ្ឌូណេស៊ី រង់ចាំថៃឆ្លើយតបរឿងអ្នកឃ្លាំមើលបទឈប់បាញ់
គម្រោងរបស់អាស៊ាន ក្នុងការបញ្ជូនអ្នកសង្កេតការណ៍ឥណ្ឌូណេស៊ី ទៅកាន់តំបន់ព្រំដែនជម្លោះកម្ពុជា-ថៃ ជិតប្រាសាទព្រះវិហារ ត្រូវបានជាប់គាំង ដោយសារតែថៃ មិនទាន់ឆ្លើយតប។ នៅថ្ងៃនេះ អ្នកនាំពាក្យក្រសួងការបរទេសឥណ្ឌូណេស៊ី ក្នុងនាមជាប្រធានអាស៊ាន បានជំរុញឲ្យមានការឆ្លើយតប ដើម្បីបញ្ជូនអ្នកសង្កេតការណ៍ បទឈប់បាញ់ ទៅកាន់ព្រំដែនជម្លោះ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ លី ម៉េងហួរ ពីទីក្រុងភ្នំពេញ
ក្នុងកិច្ចប្រជុំថ្នាក់រដ្ឋមន្ត្រីការបរទេសអាស៊ាន នៅទីក្រុងហ្សាការតា កាលពីថ្ងៃទី២២ ខែកុម្ភៈ ឆ្នាំ២០១១ ប្រមុខការទូតកម្ពុជា និងថៃ បានព្រមព្រៀងគ្នា ទទួលយកអ្នកសង្កេតការណ៍ឥណ្ឌូណេស៊ី ម្ខាង ១៥ នាក់ ដើម្បីត្រួតពិនិត្យបទឈប់បាញ់ នៅព្រំដែនជិតប្រាសាទព្រះវិហារ។ តំបន់ព្រំដែន ដែលទាហានថៃ បានបើកការវាយប្រហារ ជាទ្រង់ទ្រាយសង្គ្រាម លើកងទ័ពកម្ពុជា កាលពីថ្ងៃទី៤ រហូតដល់ថ្ងៃទី៧ ខែកុម្ភៈ ឆ្នាំ២០១១។
នៅថ្ងៃព្រហស្បតិ៍ ទី២៤មីនា ឆ្នាំ២០១១ លោកស្រី គុសុម៉ា ហាប៊ៀរ (Kusuma Habir) អ្នកនាំពាក្យក្រសួងការបរទេសឥណ្ឌូណេស៊ី បានថ្លែងប្រាប់ទីភ្នាក់ងារ AFP ថា ឥណ្ឌូណេស៊ី កំពុងរង់ចាំនូវការយល់ព្រមពីប្រទេសថៃ និងកម្ពុជា មុននឹងឥណ្ឌូណេស៊ី អាចដំណើរការបញ្ជូនអ្នកសង្កេតការណ៍កងទ័ព ទៅកាន់តំបន់ជម្លោះ។ មកដល់ពេលនេះ ក្រុមអ្នកសង្កេតការណ៍ឥណ្ឌូណេស៊ី មិនទាន់ទទួលបានពីបទបញ្ជាប្រតិបត្តិការ និងមិនដឹងថាតើត្រូវទៅឈរជើងសង្កេតការណ៍កន្លែងណា ហើយមានរយៈពេលប៉ុន្មាននោះឡើយ។
លោកស្រី អ្នកនាំពាក្យក្រសួងការបរទេសឥណ្ឌូណេស៊ី បានបញ្ជាក់ថា ឥណ្ឌូណេស៊ី ក្នុងនាមជាប្រធានអាស៊ាន សង្ឃឹមថា នឹងទទួលបាននូវការយល់ព្រមពីភាគីថៃ និងកម្ពុជា ក្នុងពេលឆាប់ៗ តាមដែលអាចធ្វើទៅបាន។
ការលើកឡើងដូច្នេះ បានធ្វើឡើងតែមួយថ្ងៃប៉ុណ្ណោះ ក្រោយពីអគ្គមេបញ្ជាការកងទ័ពជើងគោកថៃ លោកឧត្តមសេនីយ៍ ប្រាយុទ្ធ ចាន់អូចា បានថ្លែងដោយផ្ទាល់មាត់កាលពីថ្ងៃពុធថា ថៃមិនចង់បានអ្នកសង្កេតការណ៍អាស៊ាន នៅលើតំបន់ជម្លោះជិតប្រាសាទព្រះវិហារទេ ពីព្រោះរឿងនេះ វាមានគ្រោះថ្នាក់ ហើយអ្នកសង្កេតការណ៍នោះ នឹងធ្វើឲ្យបញ្ហាកាន់តែស្មុគស្មាញ។
លោកឧត្តមសេនីយ៍ បានបន្ថែមថា ក្រសួងការពារជាតិ កងទ័ព និងមេបញ្ជាការយោធាថៃ បានច្រានចោលនូវគំនិតផ្តួចផ្តើមឲ្យមានអ្នកត្រួតពិនិត្យបទឈប់បាញ់ ប៉ុន្តែលោកបានទទួលស្គាល់ បញ្ហានេះអាស្រ័យការសម្រេចចិត្តរបស់រដ្ឋាភិបាលថៃ។
ទោះជាយ៉ាងណាក៏ដោយ អ្នកនាំពាក្យរដ្ឋាភិបាលថៃ បានច្រានចោលនូវព័ត៌មាន ដែលថា មានការផ្លាស់ប្តូរក្នុងគោលជំហររបស់ទីក្រុងបាងកក ហើយបាននិយាយផងដែរថា គណៈកម្មការព្រំដែនចម្រុះ នឹងត្រូវកោះប្រជុំ ដើម្បីដោះស្រាយលម្អិតលើបេសកកម្មរបស់អ្នកសង្កេតការណ៍ ពីបទឈប់បាញ់។
ចំណែកលោក កុយ គួង អ្នកនាំពាក្យក្រសួងការបរទេសកម្ពុជា គូសបញ្ជាក់ថា កម្ពុជាបានជូនព័ត៌មាន និងបានផ្តល់ឯកសារ រាប់ទាំងទីតាំងអ្នកសង្កេតការណ៍អាស៊ាននៅតំបន់ព្រំដែនភ្លាមៗ តាំងពីលិខិតទី១របស់ប្រមុខការទូតឥណ្ឌូណេស៊ី ក្នុងនាមជាប្រធានអាស៊ានមកម្ល៉េះ។
លោក កុយ គួង បានបន្ថែមថា កម្ពុជា ក៏នៅតែរង់ចាំព័ត៌មានពីភាគីឥណ្ឌូណេស៊ី ក្នុងនាមប្រធានអាស៊ាន ចំពោះការកំណត់ថ្ងៃប្រជុំគណៈកម្មការព្រំដែន JBC និង GBC នៅថ្ងៃទី៧ និងទី៨មេសាខាងមុខ។ មកដល់ពេលនេះ កិច្ចប្រជុំដោះស្រាយជម្លោះព្រំដែនកម្ពុជា-ថៃ ដោយមានការសម្របសម្រួលពីឥណ្ឌូណេស៊ី មិនទាន់មានអ្វីប្រែប្រួលទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ