កម្ពុជាអនុញ្ញាតឲ្យមានស្មុំកូនខ្មែរទៅចិញ្ចឹម នៅអាមេរិកសាជាថ្មី
ចាប់ពីថ្ងៃទី ០១ ខែមករា ឆ្នាំ ២០១៣តទៅ ប្រទេសកម្ពុជានឹងអនុញ្ញាតជាថ្មីឲ្យជនជាតិអាមេរិកាំង សុំកូនខ្មែរទៅចិញ្ចឹមនៅ អាមេរិក។ ការសម្រេចបែបនេះបានធ្វើឡើង បន្ទាប់ពីកិច្ចប្រជុំពិភាក្សារវាង គណៈប្រតិភូរបស់អាមេរិក ដែលដឹកនាំដោយលោកស្រី Susan Jacobs ទីប្រឹក្សាពិសេសទទួលបន្ទុក កុមាររបស់អាមេរិក និងភាគីកម្ពុជាដែលដឹកនាំដោយលោក ឡុង វិសាលោ រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ នៅក្រសួងការបរទេស កាលពីព្រឹកថ្ងៃចន្ទ ទី ២៩ តុលា ឆ្នាំ ២០១២។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣១
លោកឡុង វិសាលោ បានឲ្យដឹង កាលពីព្រឹកមិញថា ដំណើរការស្មុំកូនខ្មែរទៅចិញ្ចឹមនៅអាមេរិកអាចចាប់ផ្តើមតាំងពីខែមេសាឆ្នាំ ២០១១ មកម្ល៉េះ តែដោយភាគីទាំងពីរមិនទាន់រៀបចំបានស្រួលបួល ទើបបានជាដំណើរការនេះ ត្រូវបានពន្យារពេល។ តែពេលនេះ ភាគីទាំងពី កម្ពុជា និងអាមេរិកបានស្រុះស្រួលគ្នាចាប់ផ្តើមអនុវត្តដំណើរការនេះពីថ្ងៃទី ០១ ខែមករាឆ្នាំ២០១៣នេះតទៅ។
រដ្ឋាភិបាលកម្ពុជាធ្លាប់បានផ្អាកការសុំកូនយកទៅចិញ្ចឹមនៅសហរដ្ឋអាមេរិក កាលពីឆ្នាំ ២០០៩ ដោយសារតែមានការជួញដូរកុមារខុសច្បាប់ នៅក្នុងការសុំកូនទៅចិញ្ចឹមនេះ។ ទាក់ទិនទៅនឹងបញ្ហានេះដែរ លោក ឡុង វិសាលោបានពន្យល់ថា ដោយសារតែប្រទេសកម្ពុជានៅមិនទាន់ជាប្រទេសហត្ថលេខី នៃអនុសញ្ញាទីក្រុងឡាអេ ដូច្នេះកម្ពុជានៅមានការពិបាកក្នុងការគ្រប់គ្រងបញ្ហាស្មុំកូន។ លោកបានលើកករណីស្ត្រីអាមេរិកាំងម្នាក់ឈ្មោះ ឡូរ៉ែន កាលីដូ ដែល ធ្លាប់យកកូនខ្មែររាប់ពាន់នាក់ទៅអាមេរិក តែវាដូចជាលក្ខណៈលក់ដូរទៅវិញ ព្រោះបើសិនជាមាននរណាម្នាក់ត្រូវការកុមារពីគាត់ នោះ គេត្រូវបង់ថ្លៃឲ្យគាត់។ ដោយឃើញហេតុការណ៍បែបនេះ កម្ពុជាក៏បានធ្វើការជាមួយអាមេរិក ហើយអាមេរិក ក៏បានចាប់លោកស្រីនោះដាក់ពន្ធនាគាររួចទៅហើយដែរ។
លោករដ្ឋលេខាធិការបានគូសបញ្ជាក់បន្តថា មុននឹងអនុញ្ញាតឲ្យមានការស្មុំកូនខ្មែរទៅចិញ្ចឹមនេះ រដ្ឋាភិបាលបានពិនិត្យល្អិតល្អន់ ដើម្បីជៀសវាងការជួញដូរកុមារកម្ពុជា។ រីឯកុមារដែលត្រូវផ្តល់សំរាប់ការសុំទៅយកចិញ្ចឹមនោះ មានអាយុចាប់ពី៨ឆ្នាំចុះ និងបានតែម្នាក់ប៉ុណ្ណោះក្នុងមួយគ្រួសារ។ តែបើមានករណីលើកលែង ក៏អាចមានអាយុដល់៩ឆ្នាំ និងអាចផ្តល់ដល់ទៅ២នាក់ផងដែរ។ ដូចជាករណី ដែលមានបងប្អូនពីរនាក់មានឪពុកម្តាយស្លាប់ ហើយមានអាយុខុសគ្នា រហូតដល់ទៅ ៩ឆ្នាំ។ ករណីនេះកម្ពុជាអាចផ្តល់ការសុំនេះបាន ព្រោះគេមិនអាចបំបែកបំបាក់កុមារបានទេ។
ទាក់ទិនទៅនឹងការសុំកូនយកទៅចិញ្ចឹមនេះដែរ កម្ពុជាក៍កំពុងតែត្រៀមខ្លួន ដើម្បីចូលអនុសញ្ញាក្រុងឡាអេ។ លោក ឡុង វិសាលោ បានបញ្ជាក់ថា បើសិនកម្ពុជាចូលអនុសញ្ញាក្រុងឡាអេ នោះកម្ពុជាត្រូវគោរពតាមអ្វីដែលបានកំណត់ដោយច្បាប់ ពោលគឺ ត្រូវផ្អាកទាំងអស់នូវអ្វីដែលមាន ហើយត្រូវធ្វើច្បាប់មួយទៀត ដែលជាច្បាប់ផ្ទៃក្នុង ដើម្បីសម្របខ្លួនទៅនឹងច្បាប់ក្រុងឡាអេ។
លោកបានបញ្ជាក់ទៀតថា ការសុំកូនទៅចិញ្ចឹមនេះ មិនមែនជាការលក់កូននោះទេ ព្រោះតែមានអ្នកខ្លះគ្មានកូន ហើយរដ្ឋាភិបាលត្រូវគិតដល់អនាគតក្មេង។ កុមារគឺជា អនាគតប្រទេសជាតិ ជាកម្លាំងកសាងប្រទេសជាតិនៅថ្ងៃអនាគត ព្រោះពេលកុមារធំឡើង អាចនឹងត្រឡប់មកស្រុកទេសវិញដោយចូលខ្លួនមកបំរើនៅក្នុងអង្គការនានា ព្រោះកន្លងទៅធ្លាប់មានរួចទៅហើយ។
ក្រៅពីការផ្តល់កូនទៅអាមេរិក ប្រហែលជានៅចន្លោះពី ១០០ ទៅ២០០នាក់ក្នុងមួយឆ្នាំៗ កម្ពុជាក៏អាចផ្តល់ការអនុញ្ញាតឲ្យប្រទេសដទៃទៀតដែរ ដែលក្នុងនោះមានប្រទេសបារាំង អាល្លឺម៉ង់ និងអ៊ីតាលីជាដើម។ ចំនួន កុមារដែលត្រូវអនុញ្ញាតឲ្យសុំទៅចិញ្ចឹម គឺអាស្រ័យទៅនឹងប្រទេសនីមួយៗ ដូចជាប្រទេស អ៊ីតាលី អាចទទួលកុមារពីកម្ពុជា មួយឆ្នាំចន្លោះពី៥០ទៅ១០០នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ