បក្សប្រឆាំងផ្លាស់ប្តូរថ្នាក់ដឹកនាំថ្នាក់ខេត្ត ត្រៀមប្រជែងការបោះឆ្នោតនាពេលខាងមុខ
គណបក្សសង្គ្រោះជាតិ នៅពេលនេះ បានចាប់ផ្តើមផ្លាស់ប្តូរប្រធាន និងអនុប្រធានគណបក្ស នៅតាមបណ្តាខេត្តនានា ក្នុងគោលបំណងត្រៀម សម្រាប់ការបោះឆ្នោតឃុំសង្កាត់នៅឆ្នាំ២០១៧ និងការបោះឆ្នោតជាតិ នៅឆ្នាំ២០១៨។ សេចក្តីសម្រេចរបស់គណបក្សសង្គ្រោះជាតិដូច្នេះ បានធ្វើឡើង ស្របពេលដែលគណបក្សប្រជាជនកម្ពុជា ប្រកាសកែទម្រង់ ជាអាយុជីវិតរបស់ខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១២
សេចក្តីសម្រេច ស្តីពីការតែងតាំងប្រធាន និងអនុប្រធានក្រុមការងារគណបក្សសង្គ្រោះជាតិ ប្រចាំខេត្តមួយចំនួន ត្រូវបានលោកសម រង្ស៊ី ចុះហត្ថលេខា កាលពីថ្ងៃទី១៩ ខែធ្នូ ឆ្នាំ២០១៤។ ប៉ុន្តែទើបតែនៅចុងសប្តាហ៍នេះទេ ទើបប្រធាន និងអនុប្រធានគណបក្ស តាមខេត្ត បានប្រកាសចូលកាន់តំណែង។
កាលពីថ្ងៃទី៣០មករា លោកសម រង្ស៊ីនិងលោក កឹម សុខា បានចូលរួមពិធីប្រកាសចូលកាន់ដំណែងថ្មីរបស់ប្រធាន និងអនុប្រធានក្រុមការងារគណបក្សសង្គ្រោះជាតិ ខេត្តកំពង់ចាម។ នោះគឺលោកទ្បុង រី ជាប្រធាន និងលោក អ៊ូ ច័ន្ទរ័ត្ន ជាអនុប្រធានក្រុមការងារគណបក្សសង្គ្រោះជាតិ ប្រចាំខេត្តកំពង់ចាម។
ក្រៅពីនោះ នៅខេត្តត្បូងឃ្មុំ ទើបបង្កើតថ្មី គណបក្សសង្គ្រោះជាតិ សម្រេចតែងតាំងលោកម៉ៅ មុនីវណ្ណ ដែលជាអនុប្រធានគណបក្សសង្គ្រោះជាតិ ប្រចាំខេត្តកំពង់ចាម ជាប្រធាន នៅខេត្តត្បូងឃ្មុំ។ នៅមានការផ្លាស់ប្តូរ តាមបណ្តាខេត្តមួយចំនួនទៀត។
ការសម្រេចផ្លាស់ប្តូរប្រធាន អនុប្រធានគណបក្សសង្គ្រោះជាតិតាមខេត្ត នៅពេលនេះ ត្រូវបានលោកហូរ វ៉ាន់ អនុប្រធានគណៈកម្មការវិន័យ និងជាសមាជិកគណៈកម្មាធិការអចិន្ត្រៃយគណបក្សសង្គ្រោះជាតិ អះអាងថា ជាការត្រៀមសម្រាប់ការបោះឆ្នោតឃុំសង្កាត់ ឆ្នាំ២០១៧ និងការបោះឆ្នោតជាតិ ឆ្នាំ២០១៨។ នោះគឺការយកមនុស្ស ដែលមានសក្តានុពល ទៅជួយពង្រឹង ផ្លាស់ប្តូរបទពិសោធន៍ពីតំបន់១ ទៅតំបន់១ ក្នុងគោលបំណងរួម ដើម្បីដណ្តើមជ័យជំនះក្នុងការបោះឆ្នោតខាងមុខ។
លោកហូរ វ៉ាន់ បញ្ជាក់ថា មើលតែស្ថានភាពទូទៅ តាមខេត្តនីមួយៗទេ។ មើលទៅ បើថា កន្លែងហ្នឹង មើលទៅវាមានរលូនហើយ ដូចថា វានេះហើយ អាហ្នឹងគឺអត់មានការប្រែប្រួលអីទេ។ ប៉ុន្តែកន្លែងខ្លះ យើងត្រូវរៀបចំ ដើម្បីធ្វើយ៉ាងណាឲ្យគណបក្សកាន់តែខ្លាំង ឲ្យកាន់តែមានប្រសិទ្ធភាព ដូចខ្ញុំបាននិយាយអីចឹង ក្នុងគោលបំណងមួយ ធ្វើយ៉ាងណាឲ្យគណបក្ស ២០១៧ និង២០១៨ ហ្នឹង ទទួលបានជោគជ័យ។
ជាមួយនឹងការកែសម្រួលថ្នាក់ដឹកនាំតាមបណ្តាខេត្ត លោកហូរ វ៉ាន់ ដែលជាអនុប្រធានគណបក្សសង្គ្រោះជាតិ ប្រចាំរាជធានីភ្នំពេញ បានបន្ថែមថា នៅពេលនេះ គណបក្សសង្គ្រោះជាតិ ក៏ចាប់ផ្តើមយកចិត្តទុកដាក់ខ្លាំង លើខេត្ត ដែលមានអាសនៈ ១ កៅអីៗ ខណៈដែលពីមុន គណបក្សប្រឆាំង មិនគិតគូរ អូសទាញសំឡេងឆ្នោតនោះទេ។
សេចក្តីសម្រេចរបស់គណបក្សសង្គ្រោះជាតិខាងលើនេះ បានធ្វើឡើង ចំពេលដែលគណបក្សប្រជាជនកម្ពុជា ជាគូប្រជែង បានប្រកាស ចាត់ទុកការកែទម្រង់ ជាអាយុជីវិតរបស់គណបក្សកាន់អំណាចជាង ៣០ ឆ្នាំមកហើយនេះ។ ក្នុងមហាសន្និបាត រយៈពេល ២ ថ្ងៃកន្លះ ដែលបិទបញ្ចប់នៅថ្ងៃទី១កុម្ភៈនេះ គណបក្សប្រជាជនកម្ពុជា លើកឡើងពីមូលហេតុធំបំផុត ជាឫសគល់ ដែលនាំឲ្យថយចុះសំឡេងឆ្នោត ដូចជា អំពើពុករលួយ បក្ខពួកគ្រួសារនិយម បញ្ហាដីធ្លី ព្រៃឈើ និងប្រព័ន្ធយុត្តិធម៌ ជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ