លោកកឹម សុខា៖ សង្គ្រោះជាតិឈ្នះមិនមែនទាល់តែលោកសម រង្ស៊ី ធ្វើនាយករដ្ឋមន្ត្រីទេ
លោកកឹម សុខា បានថ្លែងថា «គណបក្សសង្គ្រោះជាតិឈ្នះមិនមែនមានន័យថា ដល់សម រង្ស៊ី ធ្វើនាយករដ្ឋមន្ត្រីទេ គឺមានន័យថាធ្វើម៉េចឱ្យប្រជារាស្ត្រ បានអីដែលគាត់ចង់បាន»។ ការថ្លែងដូច្នេះ ក្នុងវេទិការាស្ត្រ និងអ្នកតំណាងរាស្ត្រ រៀបចំដោយគណបក្សសង្គ្រោះជាតិ នៅខេត្តកំពង់ចាម គឺធ្វើឡើង ម្សិលមិញ នៅចំពោះមុខលោក សម រង្ស៊ី ដែលបាននិយាយផ្តោតលើការបញ្ចប់«វប្បធម៌សង្គ្រាម»។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
ពេលជួបអ្នកគាំទ្រឯស្រុកកំពង់សៀម ខេត្តកំពង់ចាម ម្សិលមិញ លោក សម រង្ស៊ី និយាយអំពីការបញ្ចប់វប្បធម៌សង្គ្រាម ដែលកំពុងបន្តមានក្នុងប្រទេសកម្ពុជានៅឡើយ។ ចំពោះប្រធានគណបក្សសង្គ្រោះជាតិ វប្បធម៌សង្គ្រាមគឺសម្គាល់បានម្យ៉ាងតាមរយៈហិង្សា ហើយម្យ៉ាងទៀតតាមរយៈការកម្ចាត់គ្នាដោយចាត់ទុកក្រុមផ្សេងថាជាខ្មាំងដែលត្រូវកម្ទេច។ លោក សម រង្ស៊ី ចោទសួរថា បើ«ឥឡូវយើង[មាន]សន្តិភាព យើង[មាន]ប្រជាធិបតេយ្យរឿងអីទៅចាប់ខ្មែរគ្នាឯង?» ចុងក្រោយ បើតាមលោក សមរង្ស៊ី ការរឹបអូសទ្រព្យសម្បត្តិជាតិ និងប្រជារាស្ត្រ យកធ្វើជាជ័យភណ្ឌ ក៏ជាទម្រង់នៃវប្បធម៌សង្គ្រាមដែរ។
លោក សម សង្ស៊ី អះអាងថា អំពើទាំងនេះ ធ្វើឱ្យប្រទេសកម្ពុជាអន់ថយ ហើយត្រូវតែបំបាត់ចោលដោយការយកវប្បធម៌សន្ទនាមកជំនួសវិញ ដូចដែលថ្នាក់ដឹកនាំគណបក្សសង្គ្រោះជាតិ បានចាប់ផ្តើមធ្វើជាមួយគណបក្សប្រជាជនកម្ពុជា ក្នុងការដោះស្រាយបញ្ហា ដើម្បីឱ្យប្រជាពលរដ្ឋបានទទួលផល។
លោក កឹម សុខា ដែលនៅទន្ទឹមនឹងលោក សម រង្ស៊ីថ្លែងដូច្នេះថា៖«[គណបក្សសង្គ្រោះជាតិ]ឈ្នះមិនមែនមានន័យថា ដល់សម រង្ស៊ី ធ្វើនាយករដ្ឋមន្ត្រីទេ គឺមានន័យថាធ្វើម៉េចឱ្យប្រជារាស្ត្របានអីដែលគាត់ចង់បាន»។
ចំពោះលោកអនុប្រធានគណបក្សសង្គ្រោះជាតិ ដែលយោងតាមអ្នកវិភាគ អ្នកតំណាងរាស្ត្រទាំង៥៥រូប ដែលមានសិទ្ធិកោះហៅរដ្ឋមន្ត្រី និងអ្នកដឹកនាំក្នុងជួររដ្ឋាភិបាល ឱ្យមកឆ្លើយបំភ្លឺនៅក្នុងរដ្ឋសភាបាន គឺជាកូនអុកធំរបស់គណបក្សនេះ ដែលប្រជាជនត្រូវប្រើ «ឱ្យអស់សាច់» ដើម្បីសម្រេចកម្មវិធីនយោបាយបក្សប្រឆាំង។ លោក កឹម សុខា អះអាងថា ការដំឡើងប្រាក់ខែ ការបញ្ចុះតម្លៃអគ្គិសនី និងប្រេង ការដកហូតដីសម្បទានសេដ្ឋកិច្ចខ្លះ ដែលរដ្ឋាភិបាលបានធ្វើកន្លងទៅ ជាផ្នែកមួយនៃការរួមចំណែករបស់គណបក្សសង្គ្រោះជាតិដែរ។
កំណែទម្រង់របស់រដ្ឋាភិបាលគណបក្សប្រជាជនកម្ពុជាខាងលើ ធ្វើឱ្យលោកអនុប្រធានទី១នៃរដ្ឋសភាជាតិកម្ពុជា ដែលដឹងថាជ័យជម្នះរបស់គណបក្សប្រឆាំងអាស្រ័យខ្លាំងលើអ្នកគាំទ្រនៅតាមមូលដ្ឋាន នោះ សន្និដ្ឋានថា «យុទ្ធសាស្ត្រ[គណបក្សសង្គ្រោះជាតិ] ឈ្នះតាំងពីមិនទាន់ឈ្នះ»៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ