ប្រជុំរដ្ឋសភាដំបូង៖ ទូតអាមេរិកនិងអឺរ៉ុបនឹងមិនចូលរួមទេព្រោះជាប់ភារកិច្ចនៅបរទេស
រដ្ឋសភានីតិកាលទី៦ នឹងបើកសម័យប្រជុំដំបូងរបស់ខ្លួននៅព្រឹកថ្ងៃទី០៥ ខែកញ្ញា ស្អែកនេះក្រោមព្រះរាជាធិបតីភាពរបស់ព្រះបាទសម្តេច ព្រះនរោត្តម សីហមុនី ព្រះមហាក្សត្រកម្ពុជា។ ប៉ុន្តែមុនការប្រជុំមកដល់ ឯកអគ្គរដ្ឋទូតអាមេរិក និងអឺរ៉ុប ប្រចាំនៅប្រទេសកម្ពុជាបានអះអាងថា នឹងមិនចូលរួមការប្រជុំលើកដំបូងនេះទេ ដោយសារតែមានភារកិច្ចនៅបរទេស។
ចុះផ្សាយនៅថ្ងៃ៖ កែប្រែថ្ងៃទី៖
ឯកអគ្គរដ្ឋទូតអាមេរិកប្រចាំកម្ពុជាដែលជិតផុតអាណត្តិ លោកWilliam Heidt នឹងមិនបានចូលរួមសម័យប្រជុំដំបូងនៃសភាថ្មីរបស់កម្ពុជានោះទេ។ នេះបើតាមការបញ្ជាក់របស់ស្ថានទូតអាមេរិកប្រចាំនៅទីក្រុងភ្នំពេញ។ បើតាមស្ថានទូតអាមេរិក នេះគឺដោយសារតែលោកឯកអគ្គរដ្ឋទូត William Heidt បានចាកចេញពីប្រទេសកម្ពុជាតាំងពីចុងសប្តាហ៍មុន ដើម្បីទៅចូលរួមការពិគ្រោះយោបល់នៅរដ្ឋធានីវ៉ាស៊ីនតោន សហរដ្ឋអាមេរិក។
ចំណែកលោក George Edgar ឯកអគ្គរដ្ឋទូតសហភាពអឺរ៉ុបប្រចាំនៅប្រទេសកម្ពុជាវិញ លោកបានបញ្ជាក់តាំងពីមិនទាន់ទទួលបានលិខិតអញ្ជើញពីរដ្ឋសភាកម្ពុជាមកម្ល៉េះ ថាលោកមិនបានចូលរួមការប្រជុំដំបូងនៃរដ្ឋសភាថ្មីរបស់កម្ពុជានោះទេ។ អវត្តមានរបស់លោកនេះ គឺដោយសារតែលោកត្រូវចេញទៅចូលរូមការប្រជុំផ្សេងៗនៅក្នុងទីក្រុងប្រ៊ុចសែល ប្រទេសប៊ែលហ្សិក។ ដូច្នេះហើយទើបលោកមិនអាចនៅចូលរួមបាន។ យ៉ាងណាក៏ដោយ ទាំងស្ថានទូតសហភាពអឺរ៉ុប និងអាមេរិកសុទ្ធតែមិនព្រមបញ្ជាក់ទេថា តើពួកគេនឹងមានបញ្ជូនតំណាងទៅចូលរួមជំនួសឫយ៉ាងណានោះ។
បើទោះបីឯកអគ្គរដ្ឋទូតទាំងពីរនេះមិនចូលរួមនៅក្នុងសម័យប្រជុំដំបូងនៃរដ្ឋសភាថ្មីក៏ដោយ ក៏វាមិនប៉ះពាល់ដល់ការប្រជុំឡើយ ដោយនៅពេលនេះ រដ្ឋសភាបានរៀបចំត្រៀមការប្រជុំរួចរាល់អស់ហើយ។ នេះបើតាមការបញ្ជាក់ពីលោកឡេង ប៉េងឡុង ដែលជាអ្នកនាំពាក្យរដ្ឋសភាជាតិកម្ពុជា។ លោកឡេង ប៉េងឡុង ក៏បានបញ្ជាក់ឲ្យដឹងដែរថា មកដល់ពេលនេះ មានអង្គទូតខ្លះបានបញ្ជាក់ពីការចូលរួមហើយ តែលោកនៅតែមិនទាន់អាចសរុបបាននៅឡើយ ថាតើមានអង្គទូតប៉ុន្មានចូលរួម និងប៉ុន្មានទៀតមិនចូលរួមនោះ។
សូមបញ្ជាក់ថា រដ្ឋសភាថ្មីរបស់កម្ពុជា នឹងបើកកិច្ចប្រជុំដំបូងនៅថ្ងៃទី៥កញ្ញា។ ការប្រជុំនឹងធ្វើឡើងចាប់ពីម៉ោង៨ព្រឹកទៅក្រោមព្រះរាជាធិបតីភាពរបស់ព្រះបាទ សម្តេច ព្រះនរោត្តម សីហមុនី ព្រះមហាក្សត្រកម្ពុជា។ សម័យប្រជុំដំបូងនេះ នឹងសម្រេចអំពីសុពលភាពនៃអាណត្តិរបស់សមាជិកនីមួយៗ និងអនុម័តបទបញ្ជាផ្ទៃក្នុងនៃរដ្ឋសភានីតិកាលទី៦។ លុះរសៀលថ្ងៃដដែល សមាជិកសភាទាំង១២៥រូប របស់គណបក្សប្រជាជនកម្ពុជា នឹងចូលស្បថជាផ្លូវការនៅព្រះបរមរាជវាំង។ ចំណែកថ្ងៃទី៦ កញ្ញា រដ្ឋសភានឹងធ្វើការបោះឆ្នោតជ្រើសតាំងប្រធាន អនុប្រធានរដ្ឋសភា ប្រធាន អនុប្រធានគណៈកម្មការជំនាញ និងផ្តល់សេចក្តីទុកចិត្តចំពោះរាជរដ្ឋាភិបាលថ្មី។ រាជរដ្ឋាភិបាលថ្មីកម្ពុជា នឹងបើកកិច្ចប្រជុំគណៈរដ្ឋមន្រ្តីដំបូងរបស់ខ្លួននៅថ្ងៃទី៧ កញ្ញាក្នុងសប្តាហ៍នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ