រឿងក្តីអតីតអ្នកកាសែតអាស៊ីសេរី៖មេធាវីនឹងប្តឹងតុលាការកំពូលនៅថ្ងៃអង្គារ ដោយសង្ឃឹមថានឹងបាននៅក្រៅឃុំ
សំណុំរឿងសុំនៅក្រៅឃុំរបស់អតីតអ្នកកាសែតវិទ្យុអាស៊ីសេរីពីរនាក់ នឹងទៅកាន់ដៃនៅតុលាការកំពូលនៅសប្តាហ៍ទី១នៃឆ្នាំថ្មីឆ្នាំ២០១៨ បន្ទាប់ពីសាលាដំបូងរាជធានីភ្នំពេញ និងសាលាឧទ្ធរណ៍បានទាត់ចោលជាបន្តបន្ទាប់នាពេលកន្លងមក។ មេធាវីការពារក្តីអតីតអ្នកកាសែតទាំងពីរ គឺលោកកែវ វន្នី បានបង្ហាញក្តីសង្ឃឹមថា តុលាការជាន់ខ្ពស់បំផុតរបស់កម្ពុជាមួយនេះ នឹងផ្តល់យុត្តិធម៌ដល់កូនក្តីរបស់លោក។
ចុះផ្សាយនៅថ្ងៃ៖
ស្តាប់ - ០២:០៦
ថ្លែងប្រាប់វិទ្យុបារាំងអន្តរជាតិនៅថ្ងៃទី៣១ ធ្នូនេះ លោកមេធាវីកែវ វន្នី បានបញ្ជាក់ថា នៅថ្ងៃអង្គារទី០២ ខែមករា ឆ្នាំ២០១៨ លោកនឹងដាក់ពាក្យបណ្តឹងសាទុក្ខទៅកាន់តុលាការកំពូល ដើម្បីប្រឆាំងនឹងការសម្រេចមិនអនុញ្ញាតឲ្យអតីតអ្នកកាសែតវិទ្យុអាស៊ីសេរីទាំងពីរនាក់បានក្រៅឃុំរបស់តុលាការជាន់ទាប និងសាលាឧទ្ធរណ៍។ ថ្វីបើតុលាការទាំងពីរ បានទាត់ចោលក៏ពិតមែន ប៉ុន្តែនៅតុលាការកំពូលនេះ លោកមេធាវីកែវ វន្នី សង្ឃឹមថា តុលាការនឹងអនុញ្ញាតឲ្យកូនក្តីរបស់លោកនៅក្រៅឃុំមិនខាន។ ក្តីសង្ឃឹមនេះ ក៏ព្រោះតែលោកមេធាវី ជឿថា ប្រសិនបើចៅក្រមរបស់តុលាការកំពូលពិនិត្យមើលលើផ្លូវច្បាប់ និងអង្គហេតុនោះ ពួកគេនឹងពិចារណាមិនខានឡើយ។
សូមបញ្ជាក់ថា សាលាដំបូងរាជធានីភ្នំពេញបានទាត់ចោលបណ្តឹងសុំនៅក្រៅឃុំរបស់អតីតអ្នកកាសែតទាំងពីរម្តងរួចហើយៗនៅថ្ងៃទី២៦ ខែធ្នូ សាលាឧទ្ធរណ៍ក៏បានទាត់ចោលនូវបណ្តឹងជំទាស់នឹងសេចក្តីសម្រេចរបស់សាលាដំបូងរាជធានីភ្នំពេញនេះទៀត ក្រោមហេតុផលថា រក្សាទុកពួកគេ ដើម្បីងាយស្រួលដល់ការអនុវត្តនីតិវិធីរបស់តុលាការ។ អតីតអ្នកកាសែតទាំងពីរ គឺលោកអ៊ួន ឈិន និងលោកយាង សុជាមេត្តា ត្រូវបានតុលាការឃុំខ្លួនបណ្តោះអាសន្ននៅក្នុងពន្ធនាគារព្រៃសកាលពីអំឡុងខែវិច្ឆិកា ដោយចោទប្រកាន់ពីបទ «ផ្តល់ព័ត៌មានដល់បរទេសដែលអាចធ្វើឲ្យមហន្តរាយដល់ការការពារជាតិ» តាមមាត្រា ៤៤៥ នៃក្រមព្រហ្មទណ្ឌកម្ពុជា។ ប្រសិនបើតុលាការរកឃើញថា ពួកគេមានកំហុសមែននោះ អតីតអ្នកកាសែតទាំងពីរអាចប្រឈមនឹងការជាប់ពន្ធនាគារចន្លោះពី៧ ដល់ទៅ ១៥ ឆ្នាំឯណោះ។
យ៉ាងណាក៏ដោយ ចំពោះការប្តឹងចុងក្រោយនៅតុលាការកំពូលនេះ ត្បិតថាមានក្តីសង្ឃឹមក៏ដោយ ក៏ប៉ុន្តែលោកមេធាវីកែវ វន្នី គូសបញ្ជាក់ជាមុនហើយថា ប្រសិនបើតុលាការជាន់ខ្ពស់មួយនេះមិនផ្តល់យុត្តិធម៌ដល់កូនក្តីរបស់លោកទេនោះ លោកនឹងប្តឹងជំទាស់ក្នុងដំណាក់កាលទី។ ដំណាក់ទី២នេះ បើតាមនីតិវិធីច្បាប់ គឺមេធាវីអាចប្តឹងជំទាស់ឡើងវិញចាប់ពីសាលាដំបូង សាលាឧទ្ធរណ៏ និងតុលាការកំពូលសារជាថ្មី។ បើតាមលោកមេធាវីកែវ វន្នី ចំពោះការប្តឹងបន្តទៀតនេះ គឺដោយសារតែកូនក្តីរបស់លោកទាំងពីរ បានផ្តាំឲ្យលោកធ្វើការតវ៉ាតាមផ្លូវច្បាប់ឲ្យអស់លទ្ធភាព ដើម្បីស្វែងការយុត្តិធម៌ដល់ពួកគេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ