លោកសម រង្ស៊ី ថ្លែងសរសើរសន្និសីទអតីតបក្សប្រឆាំងនៅអាមេរិក ក្រោយពីលោកកឹម សុខាប្រកាសមិនគាំទ្រ
ថ្ងៃអាទិត្យ ទី០២ ធ្នូនេះ គឺជាថ្ងៃបញ្ចប់នៃសន្និសីទពិភពលោករបស់តំណាងសាខាអតីតគណបក្សសង្គ្រោះជាតិនៅក្រៅប្រទេស។ កាលពីម្សិលមិញ លោកសម រង្ស៊ី អតីតប្រធានអតីតគណបក្សសង្គ្រោះជាតិក៏បានចូលរួមក្នុងសន្និសិទជាលើកទីមួយនេះដែរ។ លោកសម រង្ស៊ី ថែមទាំងថ្លែងសរសើរការរៀបចំសន្និសិទនេះថែមទៀត បើទោះបីលោកកឹម សុខា បានប្រកាសមិនគាំទ្រពីប្រទេសកម្ពុជាក៏ដោយ។
ចុះផ្សាយនៅថ្ងៃ៖
ស្តាប់ - ០២:០៥
គឺនៅចំពោះមុខប្រជាពលដ្ឋខ្មែរដែលបានចូលរួមសន្និសីទនៅក្នុងទីក្រុងអាត្លង់តា សហរដ្ឋអាមេរិក លោកសម រង្ស៊ី បានអះអាងជាថ្មីថា លោកមកចូលរួមនេះ គឺក្នុងឋានៈជាភ្ញៀវប៉ុណ្ណោះ មិនមែនជាអ្នករៀបចំចាត់ចែងសន្និសីទនេះឡើយ។ បើទោះបីជាភ្ញៀវមែន ប៉ុន្តែលោកសម រង្ស៊ី ត្រូវបានគេផ្តល់មីក្រូ ដើម្បីនិយាយទៅកាន់អ្នកគាំទ្ររបស់លោក។ លោកបានថ្លែងអបអសាទរចំពោះការរៀបចំសន្និសីទពិភពលោកស្តីអតីតគណបក្សសង្គ្រោះជាតិ។ លោកសម រង្ស៊ី ក៏បានសម្តែងនូវក្តីរំភើបរីករាយដែលបានឃើញមានប្រជាពលរដ្ឋខ្មែរជាច្រើនមកចូលរួមសន្និសីទនេះ ហើយលោកក៏បានកោតសរសើរនិងអរគុណដល់ពួកគេដែលបានចំណាយទាំងពេលវេលា និងធនធានផ្ទាល់មកចូលរួមសន្និសីទនៅសហរដ្ឋអាមេរិក។
សន្និសីទពិភពលោករបស់តំណាងសាខាអតីតគណបក្សសង្គ្រោះជាតិនៅក្រៅប្រទេស រៀបចំធ្វើឡើងរយៈពេលពីរថ្ងៃ គឺថ្ងៃទី១ និងថ្ងៃទី២ ធ្នូនេះ។ សន្និសីទជាលើកទីមួយនេះ ធ្វើឡើងដើម្បីស្វែងរកដំណោះស្រាយស្ដារលទ្ធិប្រជាធិបតេយ្យនៅក្នុងប្រទេសកម្ពុជាឡើងវិញ។ ប៉ុន្តែសន្និសីទនេះ ត្រូវបានរៀបចំឡើងក្រោមភាពចម្រូងសម្រាស។ ចម្រូងសម្រាស ដោយសារតែអ្នកគាំទ្រអតីតបក្សប្រឆាំងមួយចំនួនមិនពេញចិត្ត និងមិនបានទៅចូលរួមទេ ដោយពួកគេគិតថា សន្និសីទនេះ នឹងធ្វើឲ្យបែកបាក់ផ្ទៃក្នុងអតីតគណបក្សសង្គ្រោះជាតិ និងថា សន្និសីទដែលរៀបចំដោយក្រុមអ្នកគាំទ្រលោកសម រង្ស៊ី នៅពេលនេះគឺដើម្បីជ្រើសរើសឲ្យលោក សម រង្ស៊ី មកដឹកនាំគណបក្សប្រឆាំងឡើងវិញ។ ប៉ុន្តែអ្នករៀបចំសន្និសីទ បានច្រានចោលការលើកឡើងនេះ។
គួរជំរាបជូនថា តាំងពីមុនសន្និសីទរៀបចំឡើង លោកកឹម សុខា ប្រធានអតីតគណបក្សសង្គ្រោះជាតិ តាមរយៈមេធាវីបានអះអាងថា លោកមិនគាំទ្រឲ្យមានការរៀបចំសន្និសីទពិភពលោកនេះឡើយ។ ផ្ទុយពីលោកកឹម សុខា លោកសម រង្ស៊ីវិញបានគាំទ្រសន្និសិទនេះ ហើយថែមទាំងបានទៅចូលរួមការអញ្ជើញរបស់ក្រុមអ្នករៀបចំថែមទៀត។ សម្រាប់លោកសម រង្ស៊ី នេះ គឺជាសន្និសីទជាប្រវត្តិសាស្ត្រមួយរបស់អតីតគណបក្សសង្គ្រោះជាតិ ហើយលោករំពឹងថា លទ្ធផលដែលកើតចេញពីសន្និសីទនេះ ក៏ប្រវត្តិសាស្ត្រផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ