អាជ្ញាធរថា អាគារដែលបាក់រលំសម្លាប់មនុស្សក្នុងខេត្តព្រះសីហនុគឺសាងសង់ឡើងពុំមានច្បាប់អនុញ្ញាត
នៅម៉ោងប្រមាណ៥ទៀបភ្លឺនាព្រឹកថ្ងៃសៅរ៍នេះ មានករណីបាក់រលំអាគារកម្ពស់៧ជាន់មួយកន្លែងនៅក្នុងក្រុងព្រះសីហនុ ខេត្តព្រះសីហនុ។ គិតមកដល់ពេលនេះ អាជ្ញាធរបានរកឃើញមនុស្សស្លាប់ចំនួន៧នាក់ និង រងរបួសធ្ងន់ ស្រាល ចំនួន២១នាក់ទៀតនៅក្នុងហេតុការណ៍បាក់រលំអាគារមួយនេះ។ អាជ្ញាធរពាក់ព័ន្ធអះអាងថា អាគារកម្ពស់៧ជាន់នេះ ជារបស់ជនជាតិចិន ហើយការសាងសង់អាគារនេះមិនមានច្បាប់អនុញ្ញាតពីអាជ្ញាធរមានសមត្ថកិច្ចនោះឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៤
អាជ្ញាធរខេត្តព្រះសីហនុ និង ក្រសួងរៀបចំដែនដី នគរូបនីយកម្ម និងសំណង់ អះអាងឱ្យដឹងដូចគ្នាថា មូលហេតុនៃការបាក់រលំអាគារកម្ពស់៧ជាន់នេះ គឺដោយសារតែសាងសង់ខុសបច្ចេកទេស ហើយការសាងសង់ នេះទៀតសោត គឺពុំមានច្បាប់អនុញ្ញាតពីអាជ្ញាធរនោះទេ។ ក្រសួងរៀបចំដែនដីបានគូសបញ្ជាក់ថា អាជ្ញាធរមានសមត្ថកិច្ចរបស់ខេត្តព្រះសីហនុ ធ្លាប់បានចុះទៅហាមឃាត់ការសាងសង់អាគារនេះពីរដងរួចមកហើយ តែអ្នកសាងសង់មិនបានចូលរួមសហការឡើយ ដោយនៅតែបន្តសាងសង់ទៀតទើបបង្កឱ្យមានហេតុការណ៍បាក់រលំបែបនេះកើតឡើង។
ការបកស្រាយរបស់អាជ្ញាធរនេះ មិនអាចធ្វើឱ្យអ្នកតាមដានហេតុការណ៍នេះទទួលយកបាននោះទេ។ ពួកគេខ្លះ បានរិះគន់អាជ្ញាធរថា បកស្រាយឱ្យតែផុតពីមាត់ ដោយពួកគេសម្តែងការងឿងឆ្ងល់ថា បើមិនមានច្បាប់អនុញ្ញាត ហេតុអ្វីម្ចាស់អាគារនេះនៅតែអាចសាងសង់បាន? ហើយហេតុអ្វីបានជាអាជ្ញាធរមិនព្រមផ្អាកការសាងសង់អាគារនេះ? និង បានសួរថា តើអ្នកណាទទួលខុសត្រូវលើការស្លាប់មនុស្ស។
ចំណែក អ្នកតាមដានមួយចំនួនទៀតបានរិះគន់ថា ការបកស្រាយរបស់អាជ្ញាធរ គឺហាក់គ្មានការទទួលខុសត្រូវទាល់តែសោះ។ ពួកគេថា សំណង់អាគារដ៏ធំស្កឹមស្កៃមួយបែរជាអាចឱ្យជនបរទេសធ្វើការសាងសង់បានដោយពុំមានច្បាប់អនុញ្ញាត រីឯខ្លួនជាមន្ត្រីជំនាញ និងមន្ត្រីអនុវត្តច្បាប់បែរជាគ្មានវិធានការ និងអំណាចទប់ស្កាត់ទៅវិញ។ ដូច្នេះហើយ ពួកគេបានអំពាវនាវដល់ប្រមុខរដ្ឋាភិបាលកម្ពុជាឱ្យចាត់វិធានការទៅលើមន្ត្រីពាក់ព័ន្ធ និងជនបរទេសដែលជាម្ចាស់សំណង់អាគារនេះទៅតាមច្បាប់។
សូមបញ្ជាក់ថា ការបាក់រលំអាគារកម្ពស់៧ជាន់នេះ គឺជាករណីទី១ហើយសម្រាប់ខេត្តព្រះសីហនុនិយាយដាច់ដោយឡែក និងសម្រាប់ប្រទេសកម្ពុជានិយាយជារួម។ ក្រោយ ហេតុការណ៍បាក់រលំអាគារនេះ អាជ្ញាធរមានសមត្ថកិច្ចបានចាប់ឃាត់ខ្លួនជនជាតិចិន៣នាក់ និង ជនជាតិខ្មែរម្នាក់ដើម្បីសាកសួរធ្វើកំណត់ហេតុ និងបន្ដចាត់ការតាមនីតិវិធីច្បាប់។ ជនជាតិចិនទាំង៣នាក់ រូមមាន ម្ចាស់ការដ្ឋានសំណង់ ថៅកែម៉ៅការសាងសង់ និង អ្នកម៉ៅការបូកជញ្ជាំងអគារ។ ចំណែក ជនជាតិខ្មែរវិញ គឺជាអ្នកជួលដីសម្រាប់សាងសង់អគារនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ