ក្រសួងការពារជាតិកម្ពុជាត្រៀមខ្លួនចូលរួមកិច្ចប្រជុំGBCនៅហ្សាការតា
ក្រសួងការពារជាតិកម្ពុជាកំពុងរៀបចំខ្លួន ដើម្បីត្រៀមចូលរួមកិច្ចប្រជុំគណៈកម្មាធិការព្រំដែនទូទៅជាមួយសមភាគី នៅទីក្រុងហ្សាការតា ប្រទេសឥណ្ឌូនេស៊ី។ ការត្រៀមខ្លួនរបស់កម្ពុជាធ្វើឡើងក្រោយពី ប្រទេសឥណ្ឌូនេស៊ីកំពុងរៀបចំជំនួបពិភាក្សាជាថ្មីទៀតរវាងកម្ពុជា និងថៃ ដែលម្តងនេះ គឺរវាងរដ្ឋមន្ត្រីការពារជាតិ និងក្រុមគណៈកម្មការចម្រុះព្រំដែន។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ លាង ដឺលុច ពីទីក្រុងភ្នំពេញ
ក្រសួងការពារជាតិកម្ពុជាកំពុងរៀបចំសំណុំឯកសារ ដើម្បីត្រៀមលក្ខណៈទៅជួបប្រជុំគណៈកម្មាធិការព្រំដែនទូទៅជាមួយក្រសួងការពារជាតិថៃ ក្នុងករណីដែលរដ្ឋមន្ត្រីការបរទេសឥណ្ឌូនេស៊ីកោះអញ្ជើញនៅពេលខាងមុខនេះ។ នេះបើតាមការបញ្ជាក់របស់អ្នកនាំពាក្យក្រសួងការពារជាតិកម្ពុជា លោកឧត្តមសេនីយឯក ឈុំ សុជាតិ។ ជាការពិតកិច្ចប្រជុំនេះនឹងត្រូវប្រព្រឹត្តទៅនៅទីក្រុងហ្សាការតា ក្រោមក្រសែភ្នែកភាគីទី៣ជាសាក្សី គឺប្រទេសឥណ្ឌូនេស៊ី។
កាលពីចុងសប្តាហ៍កន្លងទៅនេះ លោកនាយករដ្ឋមន្ត្រី ហ៊ុន សែន បានថ្លែងអោយដឹងថា ប្រទេសឥណ្ឌូនេស៊ីកំពុងរៀបចំអោយមានកិច្ចប្រជុំគណៈកម្មាធិការព្រំដែនទូទៅរវាងរដ្ឋមន្ត្រីការពារជាតិទាំងពីរប្រទេសកម្ពុជាថៃ និងគណៈកម្មការចម្រុះបោះបង្គោលព្រំដែនផងដែរ។
តាមកាលវិភាគ នៅឆ្នាំនេះ កម្ពុជាដល់វេនធ្វើជាម្ចាស់ផ្ទះរៀបចំកិច្ចប្រជុំគណៈកម្មាធិការព្រំដែនទូទៅ ដែលដឹកនាំដោយរដ្ឋមន្ត្រីក្រសួងការពារជាតិនៃប្រទេសទាំងពីរ។ កិច្ចប្រជុំនេះដែលបានប្រព្រឹត្តទៅជារៀងរាល់ឆ្នាំចំនួន៧លើកមកហើយនោះ ត្រូវពិភាក្សាលើប្រធានបទជាច្រើនទាក់ទងនឹងសហប្រតិបត្តិការរក្សាសន្តិសុខតាមព្រំដែន ប្រឆាំងបទល្មើសឧក្រិដ្ឋឆ្លងដែន និងជួយសម្រួលសកម្មភាពពាណិជ្ជកម្មឆ្លងដែនរវាងប្រទេសទាំងពីរជាដើម។
ប៉ុន្តែការរៀបចំកិច្ចប្រជុំគណៈកម្មាធិការព្រំដែនទូទៅនៅពេលនេះ នឹងត្រូវរៀបចំក្នុងប្រទេសឥណ្ឌូនេស៊ី ដែលនេះអាចជាការអនុវត្តន៍សេចក្តីសំរេច ឬការព្រមព្រៀងគ្នារវាងរដ្ឋមន្ត្រីការបរទេសកម្ពុជា និងថៃកន្លងទៅ។ កាលពីថ្ងៃទី២២កុម្ភៈ ក្រោមការសម្របសម្រួលដោយរដ្ឋមន្ត្រីការបរទេសឥណ្ឌូនេស៊ី ក្នុងនាមជាប្រធានអាស៊ាន កិច្ចព្រមព្រៀងឈប់បាញ់ត្រូវបានទទួលយកដោយរដ្ឋមន្ត្រីការបរទេសកម្ពុជា និងថៃ។ នៅក្នុងការពិភាក្សានាពេលនោះ កម្ពុជាបានស្នើថា រាល់កិច្ចប្រជុំស្តីពីបញ្ហាព្រំដែនជាមួយថៃ ត្រូវមានវត្តមានតំណាងប្រធានអាស៊ានទៀតផង។
ទោះយ៉ាងណាក៏ដោយ ឥណ្ឌូនេស៊ីនៅមិនទាន់ប្រាប់អោយដឹងអំពីកាលបរិច្ឆេទនៃកិច្ចប្រជុំទាំងពីរនេះនៅឡើយទេ គឺកិច្ចប្រជុំគណៈកម្មាធិការព្រំដែនទូទៅ និងកិច្ចប្រជុំគណៈកម្មការចម្រុះបោះបង្គោលព្រំដែនកម្ពុជា-ថៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ