ប្រតិកម្មរបស់ចិន និងរស្ស៊ីចំពោះប្រតិបត្តិការយោធានៅលីប៊ី
ប្រទេសចិន និងរុស្ស៊ី បានសម្តែងការសោកស្តាយយ៉ាងខ្លាំង នៅថ្ងៃនេះ នៅពេលដែលកងទ័ពសម្ព័ន្ធមិត្តបានទម្លាក់គ្រាប់បែកលើលីប៊ី។ ចិន ក៏ដូចជារុស្ស៊ី ដែលបានបោះឆ្នោតអនុបវាទ លើសេចក្តីសម្រេចចិត្ត លេខ ១៩៧៣ របស់អង្គការសហប្រជាជាតិ អនុញ្ញាតឲ្យប្រទេសជាសមាជិកធ្វើអន្តរាគមន៍យោធានៅលីប៊ី ដើម្បីការពារជីវិតបណ្តាជនស៊ីវិល បានរក្សាគោលជំហរនយោបាយមិនលូកលាន់កិច្ចការផ្ទៃក្នុងលីប៊ី តែមិនបានអំពាវនាវឲ្យមានការឈប់បាញ់គ្នាទេ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ អៀង សុខម៉ិញ
“សោកស្តាយ តែមិនថ្កោលទោស” ទេ ! ពាក្យសំដីរបស់អ្នកនាំពាក្យក្រសួងការបរទេសចិននេះ បញ្ជាក់ពីភាពនៅកណ្តាល មិនលម្អៀង ដូចអ្វីដែលចិនបានធ្វើនៅក្នុងសម័យប្រជុំបន្ទាន់របស់ក្រុមប្រឹក្សាសន្តិសុខអង្គការសហប្រជាជាតិស្តីពីប្រទេសលីប៊ី ក្នុងយប់ថ្ងៃព្រហស្បតិ៍ឆ្លងចូលថ្ងៃសុក្រដូច្នោះ។
ក្រុងទ្រីប៉ូលី បានខិតខំឱបដៃឱបជើងឯកអគ្គរដ្ឋទូតចិនយ៉ាងខ្លាំង ដោយសន្យាប្រគល់ប្រេងកាតឲ្យចិន ជំនួសពួកបស្ចិមលោក តែនៅទីបំផុត ចិនបានត្រឹមបោះឆ្នោតអនុបវាទ មិនប្រើសិទ្ធិប្រឆាំងវេតូនៅអង្គការសហប្រជាជាតិ។
ចិនបានបង្ហាញការសោកស្តាយចំពោះអន្តរាគមន៍យោធាអន្តរជាតិ ជាមួយនឹងជំហរមិនលូកលាន់កិច្ចផ្ទៃក្នុង ប៉ុន្តែមានឥរិយាបថប្រុងប្រយ័ត្ន រង់ចាំមើលសហរដ្ឋអាមេរិក និងសម្ព័ន្ធអារ៉ាប។ ព្រឹត្តិការណ៍នៅលីប៊ីនេះបានធ្វើឲ្យក្រុមហ៊ុនចិនខាតបង់ច្រើនណាស់ ប៉ុន្តែចិនត្រូវការប្រេងពីលីប៊ីតែប្រមាណ៣%ប៉ុណ្ណោះ។ ដោយទំនងជាហេតុដូច្នេះហើយបានជាចិនមិនប្រើពាក្យថ្កោលទោសនោះ។
ចំណែកប្រទេសរុស្ស៊ីវិញ អ្នកនាំពាក្យបានសម្តែងការសោកស្តាយផង និង បានទាមទារឲ្យមានការឈប់បាញ់គ្នា ហើយវិលចូលតុចរចា។ ជាងនេះទៅទៀតរុស្ស៊ីបានសំណូមពរឲ្យកងទ័ពសម្ព័ន្ធមិត្តខិតខំចាត់វិធានការយ៉ាងណារក្សាសុវត្ថិភាពដល់បេសកជនការទូតបរទេសទាំងអស់ ដែលកំពុងមានវត្តមាននៅក្នុងប្រទេសលីប៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ