ក្រុមប្រឹក្សាសន្តិសុខអនុញ្ញាតឲ្យធ្វើអន្តរាគមន៍ផ្នែកយោធានៅលីប៊ី
នៅថ្ងៃព្រហស្បតិ៍ ១៧ មីនា ២០១១នេះ ក្រុមប្រឹក្សាសន្តិសុខអ.ស.ប. បានអនុម័តសេចក្តីសម្រេចមួយ អនុញ្ញាតឲ្យមានអន្តរាគមន៍យោធានៅក្នុងប្រទេសលីប៊ី។ អន្តរាគមន៍យោធានេះអាចជាការហាមឃាត់ការហោះហើរនៅលីប៊ី ឬអាចជាវិធានការយោធាផ្សេងៗទៀត ដែលចាំបាច់ ក្នុងការការពារជនស៊ីវិល។ ក្រុមប្រឹក្សាសន្តិសុខបានហាមឃាត់តែមួយប៉ុណ្ណោះ គឺការវាយលុកចូលកាន់កាប់ប្រទេសលីប៊ី។
ចុះផ្សាយនៅថ្ងៃ៖ កែប្រែថ្ងៃទី៖
បទវិភាគរបស់ សេង ឌីណា
បន្ទាប់ពីមានភាពចម្រូងចម្រាស់គ្នា អស់រយៈពេលជាច្រើនថ្ងៃកន្លងមក ក្រុមប្រឹក្សាសន្តិសុខអ.ស.ប. បានអនុម័តសេចក្តីសម្រេចអនុញ្ញាតឲ្យប្រើកម្លាំងយោធា ទៅលើលោកកាដាហ្វ៊ី នៅលីប៊ី ដោយសំឡេងយល់ព្រម ១០ (បារាំង អង់គ្លេស លីបង់ អាមេរិក ព័រទុយហ្កាល់ កូឡុំប៊ី បូស៊្នី អាហ្វ្រិកខាងត្បូង នីហ្សេរីយ៉ា និងហ្កាបុង) និងអនុប្បវាទ ៥ (ចិន រុស្ស៊ី អាល្លឺម៉ង់ ឥណ្ឌា និងប្រេស៊ីល)។
សេចក្តីសម្រេចនេះ បានកើតឡើងពីការផ្តួចផ្តើមគំនិតរបស់បារាំង និងអង់គ្លេស ដោយមានការចូលរួមព្រាងពីសំណាក់ប្រទេសលីបង់ ដែលជាប្រទេសអារ៉ាប់។ សហរដ្ឋអាមេរិក ដែលបានបង្ហាញជំហររារែកជាច្រើនថ្ងៃមកហើយនោះ បានគាំទ្រសេចក្តីព្រាងនេះយ៉ាងពេញទំហឹង កាលពីថ្ងៃព្រហស្បតិ៍ ម្សិលមិញ។
សេចក្តីសម្រេចលេខ ១៩៧៣ ដែលអនុម័ត នៅថ្ងៃព្រហស្បតិ៍នេះ ក្រុមប្រឹក្សាសន្តិសុខ បានសម្រេចពង្រីកទណ្ឌកម្មទៅលើក្រុមលោកកាដាហ្វ៊ី បន្ថែមពីលើទណ្ឌកម្ម ដែលបានសម្រេចលើកមុន។ ធនាគារកណ្តាល និងក្រុមហ៊ុនប្រេងលីប៊ី ដែលជាប្រភពហិរញ្ញវត្ថុដ៏ចម្បងរបស់លោកកាដាហ្វ៊ី ត្រូវបានគេដាក់បញ្ចូលក្នុងបញ្ជីស្ថាប័ន ដែលត្រូវទទួលទណ្ឌកម្មហិរញ្ញវត្ថុ។
ទាក់ទងនឹងអន្តរាគមន៍យោធា ក្រុមប្រឹក្សាសន្តិសុខអនុញ្ញាតឲ្យមានការបង្កើតតំបន់ហាមឃាត់មិនឲ្យ មានការហោះហើរ នៅលីប៊ី (No-fly Zone)។ បន្ថែមពីលើនេះ ក្រុមប្រឹក្សាសន្តិសុខអនុញ្ញាតឲ្យរដ្ឋជាសមាជិក “ចាត់រាល់វិធានការចាំបាច់” ដើម្បីការពារជនស៊ីវិលលីប៊ី (ភាសាការទូត ដែលក្រុមប្រឹក្សាសន្តិសុខតែងតែប្រើ សំដៅលើអន្តរាគមន៍ផ្នែកយោធា)។ នេះមានន័យថា គេអាចប្រើកម្លាំងទ័ពវាយប្រហារលើកងទ័ពរបស់លោកកាដាហ្វ៊ីបាន។ ចំណុចសំខាន់ ដែលក្រុមប្រឹក្សាសន្តិសុខបានហាមឃាត់ គឺការប្រើកម្លាំងទ័ពវាយលុកចូលកាន់កាប់ប្រទេសលីប៊ី។
គ្រាន់តែទទួលដំណឹងអំពីការអនុម័តសេចក្តីសម្រេចនេះភ្លាម ប្រជាជននៅក្នុងទីក្រុង Benghazi បាននាំគ្នាស្រែកអបអរសាទរសេចក្តីសម្រេចនេះ។ អ្នកខ្លះបានលើកឡើងថា “ការសម្រេចនេះ បានធ្វើឡើងហាក់ដូចជាយឺតពេលបន្តិច។ ក៏ប៉ុន្តែ ទោះជាយ៉ាងណា វាជាសញ្ញាបង្ហាញថា សហគមន៍អន្តរជាតិមិនបោះបង់ពួកយើងចោលទេ”។
គួរបញ្ជក់ថា ប៉ុន្មានថ្ងៃចុងក្រោយនេះ កងទ័ពរបស់លោកកាដាហ្វ៊ីបានវាយដណ្តើមយកទីក្រុងម្តងមួយៗ ពីក្រុមប្រឆាំង។ Benghazi គឺជាជម្រកចុងក្រោយរបស់ក្រុមប្រឆាំង។
កាលពីយប់ថ្ងៃព្រហស្បតិ៍នេះ លោកកាដាហ្វ៊ីបានបញ្ជាឲ្យទាហានរបស់លោក ដែលកំពុងតែស្ថិតនៅចម្ងាយប្រមាណ ១៦០គ.ម. ពីទីក្រុង Benghazi ចាប់ផ្តើមវាយលុកចូលក្នុងក្រុង ដើម្បីបំបែកសម្បុកក្រុមប្រឆាំង។ យន្តហោះរបស់លោកកាដាហ្វ៊ីបានចាប់ផ្តើមទម្លាក់គ្រាប់បែកទៅលើទីតាំង មួយចំនួនក្នុងក្រុងនេះ ក៏ប៉ុន្តែ នៅមិនទាន់បញ្ជូនកងទ័ពថ្មើរជើងទៅនៅឡើយទេ។
មន្រ្តីអ្នកនាំពាក្យរដ្ឋាភិបាលបារាំងបានថ្លែងនៅព្រឹកថ្ងៃសុក្រនេះ ថា ប្រតិបត្តិការយោធានៅលីប៊ីអាចនឹងចាប់ផ្តើម “នៅក្នុងរយៈពេលប៉ុន្មានម៉ោងខាងមុខ”។ កងទ័ពបារាំង និងអង់គ្លេស នឹងចូលរួមក្នុងប្រតិបត្តិការនេះមុនគេ។ ប៉ុន្តែ គេនៅមិនទាន់អាចដឹងច្បាស់នៅឡើយទេថា តើអាមេរិកនឹងចូលរួមក្នុងប្រតិបត្តិការនេះនៅពេលណា?
ក្រៅពីបារាំង អង់គ្លេស និងអាមេរិក ប្រទេសផ្សេងទៀត រួមមាន កាណាដា ប៊ែលហ្ស៊ិក អ៊ីតាលី និងន័រវែស សុទ្ធតែបានប្រកាសថានឹងចូលរួមចំណែកក្នុងប្រតិបត្តិការយោធា នៅលីប៊ី។ រដ្ឋាភិបាលបារាំងរំពឹងថា ប្រទេសអារ៉ាប់មួយចំនួនក៏នឹងចូលរួមក្នុងប្រតិបត្តិការនេះដែរ។ នៅពេលនេះ ក្រៅពីលីបង់ ដែលចូលរួមព្រាងសេចក្តីសម្រេចរបស់ក្រុមប្រឹក្សាសន្តិសុខ មានតែប្រទេសអារ៉ាប់មួយប៉ុណ្ណោះ គឺប្រទេសកាតា ដែលបានប្រកាសថា នឹងចូលរួមក្នុងប្រតិបត្តិការយោធានៅលីប៊ី។ ប្រទេសអារ៉ាប់ផ្សេងទៀត ដែលគេរំពឹងថា នឹងអាចចូលរួម គឺមានអេហ្ស៊ីប អារ៉ាប៊ីសាអ៊ូឌីត អេមីរ៉ាតអារ៉ាប់រួម និងហ្សកដានី។
លីប៊ី គឺជាប្រទេសអារ៉ាប់។ ការចូលរួមរបស់ប្រទេសអារ៉ាប់ក្នុងប្រតិបត្តិការយោធានៅលីប៊ី បើទោះជាចូលរួមតិចក្តី ឬច្រើនក្តី គឺជារឿងដ៏សំខាន់បំផុត ដើម្បីចៀសវាងកុំឲ្យសាធារណមតិអារ៉ាប់ចោទថា ប្រទេសលោកខាងលិចរំលោភលើប្រទេសអារ៉ាប់។
នៅល្ងាចថ្ងៃសុក្រនេះ រដ្ឋាភិបាលលីប៊ីស្រាប់តែបានប្រកាសថា នឹងគោរពតាមសេចក្តីសម្រេចរបស់ក្រុមប្រឹក្សាសន្តិសុខ ដែលអនុម័តកាលពីម្សិលមិញ ហើយថា នឹងបញ្ឈប់រាល់ប្រតិបត្តិការយោធាទាំងអស់ ទៅលើក្រុមប្រឆាំង។ ក៏ប៉ុន្តែ ទោះជាមានការប្រកាសបែបនេះក៏ដោយ បារាំង និងប្រទេសមួយចំនួនទៀត នៅតែបន្តរៀបចំផែនការ ដើម្បីធ្វើអន្តរាគមន៍យោធានៅលីប៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ