លីប៊ីបដិសេធថា មិនបានរំលោភបទឈប់បាញ់របស់អង្គការសហប្រជាជាតិ
ប្រជាជននៅទីក្រុងបិនហ្គាហ្ស៊ី បានរត់ចេញពីផ្ទះសម្បែង នៅថ្ងៃសៅរ៍ទី ១៩ មីនានេះ បន្ទាប់ពី មានការផ្លោងផ្ទុះដាក់ទីតាំងរបស់ក្រុមប្រឆាំង។ រដ្ឋាភិបាលលីប៊ីបានបដិសេធថា ខ្លួនមិនបានបើកប្រតិបត្តិការយោធា និងមិនបានរំលោភបទឈប់បាញ់ទេ។ លីប៊ីបានប្រកាសគោរពបទឈប់បាញ់ នៅថ្ងៃសុក្រ ម្សិលមិញ បន្ទាប់ពីក្រុមប្រឹក្សាសន្តិសុខរបស់អង្គការសហប្រជាជាតិបានបោះឆ្នោត វិជ្ជមានលើសេចក្តីសម្រេចដោះស្រាយវិបត្តិនៅលីប៊ី។
ចុះផ្សាយនៅថ្ងៃ៖
បទអន្តរាគមន៍របស់ឈាង បុប្ផា
នៅល្ងាចថ្ងៃសុក្រ ទី ១៨ មីនា ទីក្រុងទ្រីប៉ូលីបានប្រកាស គោរពធ្វើបទឈប់បាញ់ តាមសេចក្តីសម្រេចរបស់ក្រុមប្រឹក្សាសន្តិសុខរបស់អង្គការសហប្រជាជាតិ ប៉ុន្តែ ក្រុមប្រឆាំងបាននិយាយថា ទ័ពរដ្ឋាភិបាលនៅបន្តវាយលុក និងផ្លោងមកលើទីតាំងរបស់ខ្លួន និងទីប្រជុំជន នៅទីក្រុងបិនហ្គាហ្ស៊ី។ ថ្ងៃសៅរ៍នេះ ទៀត នៅទីក្រុងបិនហ្គាហ្ស៊ី យន្តហោះរបស់ក្រុមប្រឆាំងត្រូវទាហានស្ម័គ្រលោកកាដាហ្វ៊ីបាញ់ទម្លាក់។
ប្រធានាធិបតីអាមេរិក លោកបារ៉ាក់ អូបាម៉ា បានប្រកាសព្រមាន នៅថ្ងៃសុក្រម្សិលមិញ ថា នឹងមានប្រតិបត្តិការយោធានៅលីប៊ី ប្រសិនបើរបបកាដាហ្វ៊ីនៅបន្តបាញ់សម្លាប់ប្រជាជនស៊ីវិល។ មេដឹកនាំប្រទេសធំៗ ដូចជាបារំាង អង់គ្លេស អាល្លឺម៉ង់ លោកអគ្គលេខាធិការអង្គការសហប្រជាជាតិ និងមេដឹកនំាសម្ព័ន្ធអារ៉ាប់ ជួបពិភាក្សាគ្នា នៅក្នុងកិច្ចប្រជុំកំពូលអន្តរជាតិស្តីពីលីប៊ី នៅថ្ងៃសៅរ៍នេះ។ បើតាមឯកអគ្គរដ្ឋទូតបារាំងប្រចាំអង្គការសហប្រជាជាតិ បារាំង អង់គ្លេស និងអាមេរិកបានប្រកាសដាក់ឱសាទវាទដល់លោកកាដាហ្វ៊ី ឲ្យគោរពបទឈប់បាញ់។ គេបានកំណត់លក្ខខណ្ឌនានាស្តីពីអន្តរាគមន៍យោធា។ គេរំពឹងថា បន្ទាប់ពីកិច្ចប្រជុំកំពូលនៅប៉ារីស ប៉ុន្មាន ម៉ោង ប្រតិបត្តិការយោធាអន្តរជាតិនឹងអាចចាប់ផ្តើមដំណើរការនៅលីប៊ី។
ទីក្រុងទ្រីប៉ូលីឯណោះវិញបានព្រមានថា សហគមន៍អន្តរជាតិនឹងសោកស្តាយ ប្រសិន បើធ្វើអន្តរាគមន៍យោធាបរទេសនៅលីប៊ី។ ក្នុងលិខិតសរសេរទៅកាន់ប្រធានាធិបតីអាមេរិកាំង លោកបារ៉ាក់ អូបាម៉ា ប្រធានាធិបតីបារាំង លោកនីកូឡាសាកូហ្ស៊ី និងនាយករដ្ឋមន្រ្តីអង់គ្លេស លោកកាដាហ្វ៊ីបាននិយាយថា ប្រជាជនលីប៊ីនៅគាំទ្រគាត់ និងសុខចិត្តស្លាប់ដើម្បីគាត់។ រដ្ឋមន្រ្តីការបរទេសលីប៊ីបាននិយាយនៅថ្ងៃនេះដែរថា ប្រជាជនបានស្ម័គ្រចិត្ត ធ្វើជាខែលការពារការបាញ់គ្រាប់ពីទ័ពបរទេស។ ទីក្រុងទី្រប៉ូលី ក៏បានស្នើផងដែរឲ្យអង្គការសហប្រជាជាតិចុះមកតាមដានពិនិត្យមើលបទឈប់បាញ់ នៅក្នុងប្រទេស។ រដ្ឋាភិបាលលីប៊ីចោទក្រុមប្រឆាំងថា ជាអ្នកញុះញង់បង្កឲ្យមានការបាញ់ប្រហារដើម្បីទាមទារឲ្យទ័ពអន្តរជាតិធ្វើអន្តរាគមនៅលីប៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ