ទីបំផុតចិនទទួលស្គាល់ក្រុមប្រឹក្សាជាតិអន្តរកាលជារដ្ឋអំណាចថ្មីនៅលីប៊ី
អំណើះតទៅ ចិនដឹងច្បាស់ថា មេដឹកនាំកាដាហ្វី នឹងមិនអាចត្រលប់ចូលកាន់អំណាចនៅលីប៊ីបានទៀតទេ។ ក្នុងប្រយោជន៍សេដ្ឋកិច្ច ចិនបានក្រឡាស់ដៃ នៅថ្ងៃអង្គារនេះ ដោយប្រកាសទទួលស្គាល់ ក្រុមប្រឹក្សាជាតិអន្តរកាល CNT “តំណាងក្រុមបះបោរលីប៊ី”ថា អ្នកជាអំណាចលីប៊ី ស្របច្បាប់។ ក្នុងនាមជាសមាជិកអចិន្ត្រៃយ៍ម្នាក់នៃក្រុមប្រឹក្សាសន្តិសុខអង្គការ សហប្រជាជាតិ, ចិនជាប្រទេសចុងក្រោយ ដែលបានទទួលស្គាល់ភាពស្របច្បាប់របស់ក្រុមបះបោរ នៅលីប៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥២
កន្លងមក ចិននៅរារែក មិនទាន់ទទួលស្គាល់ និងគាំទ្រក្រុមបះបោរ ដោយសារចិនធ្លាប់មានកិច្ចសន្យាជំនួញច្រើនជាមួយរដ្ឋាភិបាលកាដាហ្វី។ នៅមុនចលនាងើបបះបោរប្រឆាំងមេដឹកនាំផ្តាច់ការកាដាហ្វី ចិនមានគម្រោងរកស៊ីជាង ៥០ នៅលីប៊ី ដែលមានតម្លៃជាង ១៨ពាន់លានដុល្លារ។ នេះបើតាមតួលេខផ្តល់ដោយក្រសួងពាណិជ្ជកម្មចិន។ ក្នុងប្រទេសលីប៊ី វិនិយោគដ៏ច្រើនរបស់ចិនទៅលើផ្លូវដឹកជញ្ជូន ប្រេង និងទូរសារគមនាគមន៍កន្លងមក បានរួមចំណែកជួយធ្វើឲ្យរបបកាដាហ្វីរឹងមាំ។
នៅក្នុងពេលក្រុមបះបោរចាប់មានកម្លាំងកាន់តែខ្លាំង វាយប្រហារលើកម្លាំងទ័ពកាដាហ្វី ប្រទេសចិនតាមដានស្ថានការណ៍នៅប្រទេសលីប៊ីដោយប្រុងប្រយ័ត្នបំផុត។ ទន្ទឹមដែលប្រទេសនៅអឺរ៉ុបចេញមុខគាំទ្រក្រុមបះបោរលីប៊ី ដោយប្រកាសទទួលស្គាល់ក្រុមប្រឹក្សាជាតិអន្តរកាលជាអ្នកតំណាងលីប៊ីស្របច្បាប់ ទីក្រុងប៉េកាំងនៅមិនទាន់បញ្ចេញប្រតិកម្មធំដុំអ្វីដែរ ដោយគ្រាន់តែបញ្ជាក់ថា ក្រុមប្រឹក្សាជាតិអន្តរកាលលីប៊ីត្រូវរក្សាប្រយោជន៍ទាំងអស់របស់ចិនដែលធ្លាប់មានក្នុងទឹកដីលីប៊ី ឲ្យនៅដដែល។
ប៉ុន្តែ ក្នុងកាលៈទេសៈដែលកាដាហ្វីចាញ់ដៃ គ្មានថ្ងៃត្រលប់មកកាន់អំណាចនៅលីប៊ីវិញ ចិនក៏បានសម្រេចចិត្តបោះបង់ចោលកាដាហ្វី និងបែរមកចាប់ដៃជាផ្លូវការជាមួយក្រុមប្រឹក្សាជាតិអន្តរកាល ដែលតំណាងក្រុមបះបោរលីប៊ី។ ពេលនេះចិនចេញមុខនិយាយថា ចិនគោរពការសម្រេចចិត្តរបស់ប្រជាជនលីប៊ី និងចូលរួមធ្វើការជាមួយក្រុមប្រឹក្សាជាតិអន្តរកាលដើម្បីដើម្បីធានាការផ្លាស់ប្តូរអំណាចនៅលីប៊ីប្រព្រឹត្តទៅដោយរលូន។ ជាមួយគ្នានេះ ចិនមានក្តីសង្ឃឹមថា រាល់កិច្ចព្រមព្រៀង កិច្ចសន្យាដែលខ្លួនបានចុះកន្លងមកជាមួយលីប៊ី គឺក្នុងអំណាចរដ្ឋាភិបាលកាដាហ្វី នឹងនៅតែមានសុពលភាពដដែល បើទោះបីជាលីប៊ីបានផ្លាស់ប្តូរថ្នាក់ដឹកនាំក៏ដោយ។
ការដែលទីក្រុងប៉េកាំង ប្រកាសទទួលស្គាល់ជាផ្លូវការ ក្រុមបះបោរលីប៊ីជារដ្ឋអំណាចស្របច្បាប់លីប៊ី គឺមកពី រដ្ឋអំណាចចិនមិនចង់បាត់បង់ផលប្រយោជន៍ដែលខ្លួនមាន នៅក្នុងប្រទេសលីប៊ី ទៅឲ្យប្រទេសលោកខាងលិច។ ចិនបានមើលឃើញច្បាស់ថា ពួកបស្ចិមបទេស ដូចជា បារាំង អង់គ្លេស និងអាមេរិក ដែលបានជួយពួកបះបោរលីប៊ី វាយផ្តួលរំលំរបបកាដាហ្វី សុទ្ធតែបានការសន្យា ទទួលប្រយោជន៍គាប់ចិត្តពីក្រុមបះបោរ នៅលីប៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ