ទីក្រុងប៉េកំាងកំពុងបារម្ភពីការបាត់បង់ផលប្រយោជន៍របស់ខ្លួននៅលីប៊ី
នៅថ្ងៃសុក្រ ទី២ កញ្ញាម្សិលមិញ ប្រទេសចិនបានស្នើក្រុមប្រឹក្សាជាតិអន្តរកាលលីប៊ីឲ្យធានាពិតប្រាកដនូវផលប្រយោជន៍របស់ចិនដែលមាននៅក្នុងប្រទេសលីប៊ី។ ការអំពាវនាវរបៀបនេះត្រូវបានធ្វើឡើងនៅក្នុងទីក្រុងប៉ារីស ប្រទេសបារំាង នៅក្នុងកិច្ចសន្ទនារវាងលោកអនុរដ្ឋមន្រ្តីក្រសួងការបរទេសចិន Zhai Jun និងលោកអនុប្រធានក្រុមប្រឹក្សាជាតិអន្តរកាលលីប៊ី Mahmoud Jibril។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៧
ខណៈដែលក្រុមបះបោរប្រឆំាងរបបកាដាហ្វីកំពុងបន្តប្រតិបត្តិការរុលទៅមុខ ដោយមានជំនួយរបស់អង្គការអូតង់នោះ ប្រទេសចិនបារម្ភកាន់តែខ្លំាងឡើងខ្លាចបាត់បង់ផលប្រយោជន៍របស់ខ្លួន នៅពេលណាដែលរបបកាដាហ្វីត្រូវចប់ជាស្ថាពរ។ រហូតមកដល់ពេលនេះ និងក្នុងនាមជាសមាជិកអចិន្រ្តៃយ៍ម្នាក់នៃក្រុមប្រឹក្សាសន្តិសុខអង្គការសហប្រជាជាតិ ទីក្រុងប៉េកំាងនៅបន្តអល់អែលមិនទាន់ហ៊ានទទួលស្គាល់ក្រុមប្រឹក្សាជាតិអន្តរកាលលីប៊ីពេញមាត់ ដូចបណ្តាប្រទេសលោកខាងលិចមួយចំនួនទេ។ ក៏ប៉ុន្តែ ចិនបានទទួលស្គាល់តួនាទីដ៏សំខាន់របស់ក្រុមប្រឹក្សាជាតិអន្តរកាលលីប៊ី និងប្រកាសត្រៀមខ្លួនបន្តរក្សាទំនាក់ទំនងជិតស្និទ្ធរវាងគ្នាទៅថ្ងៃអនាគត នេះជាការថ្លែងរបស់លោកអនុរដ្ឋមន្រ្តីក្រសួងការបរទេសចិន Zhai Jun ទៅកាន់លោកអនុប្រធានក្រុមប្រឹក្សាជាតិអន្តរកាលលីប៊ី Mahmoud Jibril នាឱកាសកិច្ចសន្ទនារវាងគ្នានៅទីក្រុងប៉ារីស ប្រទេសបារំាងកាលពីថ្ងៃសុក្រ ទី២ កញ្ញាម្សិលមិញ។
លោក Zhai Jun បាននិយាយប្រាប់លោក Mahmoud Jibril ថា ទីក្រុងប៉េកំាងបានត្រៀមខ្លួននឹងជួយកសាងប្រទេសលីប៊ីឡើងវិញ ទៅតាមសមត្ថភាពដែលខ្លួនអាចជួយបាន នៅពេលណាដែលសង្រ្គាមបានបិទបញ្ចប់។ ទន្ទឹមគ្នានេះ មន្រ្តីការទូតចិនជាន់ខ្ពស់រូបនេះដដែលក៏បានសម្តែងចេញនូវក្តីសង្ឃឹមរបស់ខ្លួន ថារដ្ឋអំណាចថ្មីនៅលីប៊ីពិតជាយល់អំពីក្តីបារម្ភរបស់ចិន គោរពពាក្យសន្យារបស់ខ្លួន និងធានាពិតប្រាកដនូវផលប្រយោជន៍នៃរោងចក្រ និងសហគ្រាសចិននៅលីប៊ី។
ជាចម្លើយតបវិញ លោក Mahmoud Jibril បានសន្យាថា នឹងគោរពគ្រប់កិច្ចសន្យាសេដ្ឋកិច្ច និងពាណិជ្ជកម្មដែលចិនបានចុះហត្ថលេខាជាមួយលីប៊ីពីពេលមុន និងចាត់វិធានការគ្រប់បែបយ៉ាងដើម្បីធានាសន្តិសុខ និងសុវត្ថិភាព ក៏ដូចជាការពារទ្រព្យសម្បត្តិរបស់ពលរដ្ឋចិននៅក្នុងប្រទេសលីប៊ី។
យោងតាមតួលេខផ្តល់ដោយក្រសួងពាណិជ្ជកម្មចិន ទឹកប្រាក់វិនិយោគរបស់ចិននៅលីប៊ីមានប្រមាណ ១ម៉ឺន ៨ពាន់ ៨រយលានដុល្លារសម្រាប់ ៥០គម្រោងធំៗ មានដូចជាវិស័យសាងសង់ វិស័យអយស្ម័យយាន ទូរគមនាគមន៍ ឬមួយប្រេងឥន្ធនៈ។
ដោយឡែក កាលពីថ្ងៃព្រហស្បតិ៍ ទី១ កញ្ញា ទីភ្នាក់ងារផ្លូវការចិនថ្មីបានអំពាវនាវក្រុមប្រទេសមហាអំណាចលោកខាងលិចកុំឲ្យឆ្លៀតឱកាសកេងយកតែម្នាក់ឯងនូវគម្រោងកិច្ចសន្យាសាងសង់លីប៊ី ក្រោយពីសង្រ្គាម។ សេចក្តីអំពាវនាវបានធ្វើឡើង ក្រោយពីសារព័ត៌មានបារំាងឈ្មោះ Libération បានចុះផ្សាយព័ត៌មានមួយដែលបញ្ជាក់ថា រដ្ឋាភិបាលបារំាងប្រហែលជាបានចុះកិច្ចព្រមព្រៀងមួយជាមួយក្រុមប្រឹក្សាជាតិអន្តរកាលលីប៊ី ដោយបារំាងបានទទួលកិច្ចសន្យាធ្វើអាជីវកម្មប្រេងលីប៊ីចំនួន ៣៥%៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ