ស្ថានភាពព្រំដែនស្ងប់ស្ងាត់ពេលការបោះឆ្នោតថៃជិតមកដល់
បើទោះជាស្ថានភាពព្រំដែនស្ងប់ស្ងាត់ ទាហានកម្ពុជាស្ថិតនៅក្នុងលក្ខណៈប្រុងប្រយ័ត្នខ្លាំង ខណៈពេលដែលប្រទេសថៃនឹងរៀបចំការបោះឆ្នោតក្នុងរយៈពេលដ៏ខ្លីខាងមុខ។ ក្រៅពីការបោះឆ្នោតដែលបានធ្វើអោយប្រទេសថៃហាក់ស្ថិតនៅក្នុងសភាពវឹកវរនោះ មានការព្រួយបារម្ភអំពីស្ថានភាពផុយស្រួយនៅព្រំដែន នៅពេលដែលរដ្ឋាភិបាលថៃបានចាញ់ប្រៀបកម្ពុជានៅក្នុងវេទិកាយូណេស្កូនៅប្រទេសបារាំង។
ចុះផ្សាយនៅថ្ងៃ៖
ស្តាប់ - ០១:៣៩
ព័ត៌មានដែលទាក់ទងនឹងស្ថានភាពផុយស្រួយនៅតាមព្រំដែនត្រូវបានចុះផ្សាយដោយកាសែតថៃជាច្រើនថ្ងៃមកហើយ។ ពោលគឺបន្ទាប់ពីប្រតិភូរដ្ឋាភិបាលថៃបានចាញ់នៅក្នុងការតវ៉ាពន្យារពេលការពិចារណាលើការផែនការអភិវឌ្ឍន៍តំបន់ប្រាសាទព្រះវិហារ ទាហានថៃនិងកម្ពុជាបានចោទប្រកាន់គ្នាទៅវិញទៅមកអំពីការចល័តទ័ព។ កម្ពុជាបានចាត់ទុកការចោទប្រកាន់របស់ទាហានថៃ ថាដើម្បីមានលេសអាចចល័តទ័ពខ្លួន ហើយអាចផ្តើមការវាយប្រហារមកលើកម្ពុជាផង។
លោកឧត្តមសេនីយឯក ឈុំ សុជាតិ អ្នកនាំពាក្យក្រសួងការពារកម្ពុជាបានអះអាងនៅថ្ងៃនេះថា ស្ថានភាពទូទៅនៅតាមព្រំដែនមិនមានអ្វីតានតឹង ឬខុសប្លែកពីធម្មតានោះទេ។ ប៉ុន្តែអ្នកនាំពាក្យរូបនេះ ក៏អះអាងផងដែរថា កម្ពុជានៅប្រុងប្រយ័ត្នជានិច្ចចំពោះការឈ្លានពានជាយថាហេតុរបស់កងទ័ពថៃ។
កងទ័ពកម្ពុជាអាចត្រូវបង្កើនការប្រុងប្រយ័ត្នរឹតតែខ្លាំងជាងពេលណាៗទាំងអស់នៅពេលការបោះឆ្នោតនៅប្រទេសថៃនឹងមកដល់ក្នុងពេលដ៏ខ្លីខាងមុខ។ ពោលគឺបទពិសោធន៍ដែលកម្ពុជាទទួលបានពីថៃក្នុងពេលកន្លងមកនោះ គឺថា រាល់ពេលដែលថៃមានភាពវឹកវរ និងសភាពការណ៍តានតឹងនៅក្នុងប្រទេសខ្លួននោះ រដ្ឋាភិបាលថៃតែងបង្វែរស្ថានការណ៍នេះមកព្រំដែន ដោយបង្កើតសភាពការណ៍តានតឹងនៅតាមព្រំដែននេះឯង។
កម្ពុជានៅតែចង់បានអ្នកសង្កេតការណ៍បរទេសឈរជើងនៅតាមព្រំដែន ដើម្បីអាចបញ្ចៀសការប៉ះទង្គិចផ្នែកអាវុធរវាងកងទ័ពទាំងពីរ។ ប៉ុន្តែកម្ពុជាក៏ប្រហែលជានៅរង់ចាំមើលលទ្ធផលនៃការបោះឆ្នោតនៅប្រទេសថៃនៅពេលខាងមុខនេះ ដូចគ្នាផងដែរ។ រង់ចាំ ក្រែងអ្នកឈ្នះឆ្នោតជាមេដឹកនាំថ្មីនៃប្រទេសថៃ គឺជាមនុស្សដែលកម្ពុជាស្រួលធ្វើការងារជាមួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ