ថៃបង្កហេតុចង់បញ្ឆេះសង្គ្រាមជាថ្មីនៅតាមជាយដែន
ទោះបីជាស្ថានការណ៍នៅតាមព្រំដែនបានស្ងប់ស្ងាត់ ប៉ុន្តែភាពស្ងប់ស្ងាត់នេះប្រហែលជាមកពីការអត់ធ្មត់របស់កងទ័ពកម្ពុជាតែប៉ុណ្ណោះ។ ចំណែកភាគីថៃនៅតែបន្តបំពានលើបូរណភាពទឹកដីរបស់កម្ពុជាដដែល។ ជាក់ស្តែងប៉ុន្មានថ្ងៃចុងក្រោយនេះ យន្តហោះឈ្លបយកការណ៍ថៃបានហោះរំលោភចូលដែនអាកាសកម្ពុជាជាបន្តបន្ទាប់។ ប្រឈមនឹងសភាពការណ៍នេះ អ្នកនាំពាក្យក្រសួងការពារជាតិកម្ពុជាបានថ្កោលទោសការបំពានរបស់ថៃ និងបានព្រមានអំពីការប្រើសិទ្ធិស្វ័យការពារដើម្បីតប តទៅនឹងការឈ្លានពាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤០
អ្នកនាំពាក្យក្រសួងការពារជាតិកម្ពុជាបានចេញសេចក្តីថ្លែងការណ៍ជាបន្ទាន់មួយកាលពីព្រលប់ថ្ងៃទី៣ មិថុនាម្សិលមិញ ដើម្បីថ្កោលទោសការឈ្លានពានលើដែនអាកាសកម្ពុជាពីសំណាក់យន្តហោះឈ្លបយកការណ៍របស់ទាហានថៃ។
សេចក្តីថ្លែងការណ៍ឲ្យដឹងថា រយៈពេលបីថ្ងៃជាប់ៗគ្នាចុងក្រោយនេះ ទាហានថៃបានបំពានជាបន្តបន្ទាប់មកលើដែនអាកាសកម្ពុជា។ ជាក់ស្តែង នៅថ្ងៃទី៣១ ខែឧសភា និងថ្ងៃទី១មិថុនា ឆ្នាំ២០១១ យន្តហោះយោធាថៃធុន L19 បានហោះនៅក្នុងលំហអាកាសកម្ពុជាតាមបណ្ដោយខ្សែព្រំដែន ឆ្ពោះទៅក្រុងប៉ោយប៉ែត កាត់តាមស្រុកអូរជ្រៅ ស្រុកស្វាយចេក និងស្រុកថ្មពួកក្នុងខេត្តបន្ទាយមានជ័យ។ នៅព្រឹកថ្ងៃទី៣ ខែមិថុនា ឆ្នាំ២០១១ ទាហានឈុតខ្មៅថៃក៏បានជិះឆ័ត្រយន្ត១គ្រឿងហោះស៊ើបការណ៍តាមបណ្ដោយព្រំដែនក្នុងភូមិសាស្ត្រ ស្រុកភ្នំព្រឹក ក្នុងខេត្តបាត់ដំបងទៀត។
អ្នកនាំពាក្យក្រសួងការពារជាតិបានថ្កោលទោសទាហានថៃ និងបានស្នើឲ្យបញ្ឈប់ជាដាច់ខាតនូវរាល់សកម្មភាពញុះញង់បង្កហេតុដែលអាចនាំឲ្យកើតអំពើហិង្សានៅតាមបណ្ដោយព្រំដែន។ ក្រសួងការពារជាតិបានព្រមានថា ស្ថានភាពផុយស្រួយនៅតាមព្រំដែនអាចប្រឈមនឹងការផ្ទុះអាវុធជាយថាហេតុឡើងវិញ ដោយសារតែទាហានថៃមិនគោរពការពង្រឹងកិច្ចសហការដែលភាគីទាំងពីរបានឯកភាពគ្នា។ ក្រសួងការពារជាតិកម្ពុជាបានព្រមានអំពីការប្រើសិទ្ធិស្វ័យការពារបូរណភាពទឹកដីរបស់ខ្លួនក្នុងករណីចាំបាច់។
ពេលវិលត្រឡប់ពីក្រុងឡាអេកាលពីថ្ងៃព្រហស្បតិ៍ លោក ហោ ណាំហុង រដ្ឋមន្ត្រីការបរទេសកម្ពុជាបានប្រាប់ឲ្យដឹងថា ក្នុងអំឡុងពេលរង់ចាំការសម្រេចចាត់វិធានការបន្ទាន់របស់តុលាការយុត្តិធម៌អន្តរជាតិក្រុងឡាអេ កងទ័ពកម្ពុជាត្រៀមខ្លួនជានិច្ចទាំងយប់ ទាំងថ្ងៃដើម្បីទប់ទល់បញ្ហាដែលអាចកើតមានជាយថាហេតុដែលបង្កដោយភាគីថៃ។ ប្រមុខការទូតកម្ពុជាព្រមានថា បើថៃបង្កសង្គ្រាមនៅពេលនេះ នោះសហគមន៍អន្តរជាតិនឹងមើលឃើញកាន់តែច្បាស់ពីមហិច្ឆតាឈ្លានពានរបស់ថៃមកលើកម្ពុជា។
សូមបញ្ជាក់ថា តុលាការក្រុងឡាអេទើបតែបានបើកសវនាការកាលពីថ្ងៃទី៣០ និង៣១ឧសភា ដើម្បីពិនិត្យមើលសំណើរបស់កម្ពុជាសុំចាត់វិធានការបន្ទាន់ដើម្បីការពារប្រាសាទព្រះវិហារ។ នៅក្នុងសវនាការនោះ លោក ហោ ណាំហុង បានស្នើឲ្យតុលាការចេញបញ្ជាទៅកងទ័ពថៃ ឲ្យដកចេញពីតំបន់ព្រះវិហារ និងសុំតុលាការឲ្យចាត់វិធានការបញ្ឈប់ការឈ្លានពានរបស់ទាហានថៃមកលើបូរណភាពទឹកដីកម្ពុជា។ យ៉ាងណាក៏ដោយ ថៃនៅតែបន្តបំពានចូលដែនដី និងដែនអាកាសកម្ពុជាជាបន្តបន្ទាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ