រដ្ឋមន្ត្រីការពារជាតិកម្ពុជា-ថៃព្រមព្រៀងពន្លឿនការដោះស្រាយជម្លោះព្រំដែន
នៅព្រឹកថ្ងៃចន្ទទី២៨ឧសភានេះ រដ្ឋមន្ត្រីការពារជាតិកម្ពុជា លោកនាយឧត្តមសេនីយ៍ទៀ បាញ់ និងរដ្ឋមន្ត្រីការពារជាតិថៃSukumpol Suwanatat បានសន្យារួមគ្នាដើម្បីពន្លឿនការដោះស្រាយបញ្ហាព្រំដែនរវាងប្រទេសទាំងពីរ។ ក្នុងកិច្ចប្រជុំដោយបិទទ្វារនោះ រដ្ឋមន្ត្រីការពារកម្ពុជា-ថៃ បានព្រមព្រៀងឲ្យក្រុមការងារចម្រុះរបស់ក្រសួងការពារជាតិ ជួបប្រជុំគ្នាជាថ្មីម្តងទៀត នៅដើមខែមិថុនាខាងមុខដើម្បីនិយាយពីការដកទ័ពចេញពីព្រំដែនប្រាសាទព្រះវិហារ តាមដីការបស់តុលាការយុត្តិធម៌អន្តរជាតិទីក្រុងឡាអេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
រដ្ឋមន្ត្រីការពារជាតិថៃ លោក Sukumpol Suwanatat បានថ្លែងទៅកាន់ក្រុមអ្នកកាសែត នៅថ្ងៃចន្ទនេះដោយទទួលស្គាល់ថា ការអូសបន្លាយពេលវេលា ក្នុងការដោះស្រាយបញ្ហាព្រំដែនរវាងកម្ពុជា និងថៃ មិនមែនជារឿងល្អទេ។ ដូច្នេះលោករដ្ឋមន្ត្រី បានជំរុញឲ្យក្រុមការងាររួម កម្ពុជា-ថៃ ដោះស្រាយឲ្យបានឆាប់រហ័ស ដោយប្រទេសថៃ មានភាពស្មោះត្រង់អនុវត្តចំពោះបញ្ហានេះ។
ការលើកឡើងដូច្នេះ បានធ្វើឡើងបន្ទាប់ពីកិច្ចប្រជុំរវាងរដ្ឋមន្ត្រីការពារជាតិកម្ពុជា និងរដ្ឋមន្ត្រីការពារជាតិថៃ នៅព្រឹកថ្ងៃចន្ទនេះ នៅក្រសួងការពារជាតិ ក្នុងទីក្រុងភ្នំពេញ។ រដ្ឋមន្ត្រីការពារជាតិកម្ពុជា និងថៃ បានឯកភាពគ្នាឲ្យក្រុមការងារនៃគណៈកម្មការរួមកម្ពុជានិងថៃដែលដឹកនាំដោយក្រសួងការពារជាតិជួបប្រជុំគ្នាជាលើកទី២នៅដើមខែមិថុនាខាងមុខនេះនៅក្នុងប្រទេសកម្ពុជា។ ជាកិច្ចប្រជុំ ដែលលោកឧបនាយករដ្ឋមន្ត្រីទៀ បាញ់រដ្ឋមន្ត្រីក្រសួងការពារជាតិកម្ពុជា លើកឡើងថា ក្រុមការងាររួមកម្ពុជា-ថៃ នឹងបន្តការពិភាក្សាស្តីពីការដកកងទ័ពចេញពីតំបន់ព្រំដែនទំហំជាង ១៧គីឡូម៉ែត្រក្រឡានៅជិតប្រាសាទព្រះវិហារ តាមដីការបស់តុលាការយុត្តិធម៌អន្តរជាតិទីក្រុងឡាអេ។
លោកឧបនាយករដ្ឋមន្ត្រី ទៀ បាញ់ បានបញ្ជាក់ពីបំណងកម្ពុជា ដែលចង់ឲ្យមានការដោះស្រាយបញ្ហាព្រំដែន និងការដកកងទ័ព ចេញពីព្រំដែនជម្លោះ ឲ្យបានឆាប់តាមដែលអាចធ្វើទៅបាន។
កាលពីដើមខែមេសា ក្រុមការងាររួមកម្ពុជា-ថៃ ហៅកាត់ថា JWG ( Joint Working Group ) ដែលដឹកនាំដោយលោកនាយឧត្តមសេនីយ៍ នាង ផាត រដ្ឋលេខាធិការក្រសួងការពារជាតិកម្ពុជា បានជួបប្រជុំជាលើកដំបូង នៅទីក្រុងបាងកក ប្រទេសថៃ។ លទ្ធផលនៃកិច្ចប្រជុំក្រុមការងាររួម កាលណោះ បានត្រឹមតែឯកភាព និងប្តេជ្ញាបន្តអនុវត្តដីកាសម្រេចរបស់តុលាការយុត្តិធម៌អន្តរជាតិទីក្រុងឡាអេ ស្តីពី ការដកកងទ័ពកម្ពុជា-ថៃ ចេញពីតំបន់គ្មានកងទ័ពបណ្តោះអាសន្ន នៅជិតប្រាសាទព្រះវិហារ។ ចំណែកថ្ងៃខែ នៃការដាក់អ្នកសង្កេតការណ៍ និងការដកកងទ័ព មិនទាន់កំណត់ពេល ហើយអូសបន្លាយដល់ពេលនេះ។
ការយឺតយ៉ាវ ត្រូវបានរដ្ឋមន្ត្រីការពារជាតិថៃ ប្រាប់អ្នកកាសែតនៅថ្ងៃចន្ទនេះថា មកពីតំបន់ព្រំដែនជិតប្រាសាទព្រះវិហារ មានគ្រាប់មីន ដែលជាឧបសគ្គរារាំងដល់ដំណើរការស្វែងរកសន្តិភាពតាមព្រំដែនរវាងប្រទេសទាំងពីរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ