កូរ៉េខាងជើងដំឡើងមីស៊ីលថ្មីពីរគ្រឿងបន្ថែមទៀត
កូរ៉េខាងជើងទើបតែបានដំឡើងមីស៊ីលថ្មីពីរគ្រឿងបន្ថែមទៀត នាពេលថ្មីៗនេះ នៅឆ្នេរភាគខាងកើតប្រទេស។ នេះបើយោងតាមការលើកឡើងរបស់សារព័ត៌មាន Yonhap នៅកូរ៉េខាងត្បូង នៅថ្ងៃអាទិត្យនេះ។ មីស៊ីលទាំងពីរថ្មីនេះ ជាប្រភេទមីស៊ីលScud បាញ់បានរយៈចំងាយខ្លី។ ទង្វើនេះបញ្ជាក់ថា កូរ៉េខាងជើងត្រៀមកំពុងត្រៀមសាកល្បងបាញ់មីស៊ីលជាថ្មីម្តងទៀត។
ចុះផ្សាយនៅថ្ងៃ៖
ស្តាប់ - ០២:១៥
សារព័ត៌មាន Yonhap នៅកូរ៉េខាងត្បូង បានប្រាប់នៅថ្ងៃអាទិត្យនេះថា កូរ៉េខាងជើងទើបតែបានដំឡើងមីស៊ីលថ្មីពីរគ្រឿងបន្ថែមទៀត នៅឆ្នេរភាគខាងកើតប្រទេស។ មីស៊ីលពីរថ្មីរបស់ក្រុងព្យុងយ៉ាងនេះ ជាប្រភេទមីស៊ីលScud បាញ់បានរយៈចំងាយខ្លី។ សារព័ត៌មាន Yonhap បានទទួលព័ត៌មាននេះពីអ្នកទទួលខុសត្រូវជាន់ខ្ពស់មួយរូប នៅកូរ៉េខាងត្បូង។
យោងតាមសារព័ត៌មាននេះ កូរ៉េខាងត្បូងបានរកឃើញថា ក្រុងព្យុងយ៉ាងទើបតែបានដំឡើងមីស៊ីលថ្មីទាំងពីរនេះ នៅក្រោយថ្ងៃ ១៦ មេសា កន្លងទៅប៉ុណ្ណោះ។ ក្រសួងការពារជាតិកូរ៉េខាងត្បូងពុំទាន់បានបញ្ជាក់អះអាងថាតើព័ត៌មាននេះ ជាការពិតរឺក៏យ៉ាងណានៅឡើយទេ។
ភ្នាក់ងារស៊ើបការនានានៅកូរ៉េខាងត្បូង បានប្រាប់ថា នាពេលថ្មីៗនេះ កូរ៉េខាងជើងបានដំឡើងមីស៊ីលចំនួន៧ នៅឆ្នេរភាគខាងកើតនោះ។ ក្នុងចំណោមមីស៊ីលទាំង៧ មានមីស៊ីលពីរជាប្រភេទ Musudan ដែលអាចបាញ់បានចំងាយ ៤០០០ គីឡូម៉ែត្រ។ ដូច្នេះ តាមរយៈចំងាយនេះ កូរ៉េខាងជើងអាចបាញ់មីស៊ីលវាយប្រហារកូរ៉េខាងត្បូង ជប៉ុន និងកោះ Guam នៅសហរដ្ឋអាមេរិកបាន ដូចជាការគំរាមរបស់ខ្លួនយ៉ាងពិតប្រាកដ។
អស់រយៈពេលច្រើនសប្តាហ៍មកហើយដែលកូរ៉េខាងត្បូង និងប្រទេសដៃគូនានា រង់ចាំមើលថា តើកូរ៉ខាងជើងនឹងបាញ់មីស៊ីលសារជាថ្មីដូចដែលខ្លួនធ្លាប់បានប្រកាសនោះដែររឺទេ។ អ្នកវិភាគនានាធ្លាប់បានគិតថា ក្រុងព្យុងយ៉ាងនឹងបាញ់មីស៊ីលក្នុងកំឡុងថ្ងៃ១៥មេសា ដើម្បីរំលឹកខួប១០១ឆ្នាំនៃការចាប់កំណើតរបស់ស្ថាបនិក Kim Il-Sung។ ប៉ុន្តែ គ្មានការបាញ់ណាមួយបានធ្វើឡើងដូចជាការគិតនេះទេ។ យោងតាមសារព័ត៌មាន Yonhap អ្នកទទួលខុសត្រូវជាន់ខ្ពស់នៅកូរ៉េខាងត្បូងមួយរូបទៀត បានរំពឹងថា ការបាញ់មីស៊ីលនឹងធ្វើឡើងនៅថ្ងៃ២៥មេសា ដែលជាថ្ងៃខួបនៃការបង្កើតកងទ័ពកូរ៉េខាងជើង។
ទោះយ៉ាងណាក្តី ការដែលក្រុងព្យុងយ៉ាងដំឡើងមីស៊ីលច្រើនគ្រឿងជាបន្តបន្ទាប់នោះ បញ្ជាក់អោយឃើញថា រដ្ឋាភិបាលកូរ៉េខាងជើងកំពុងត្រៀមសាកល្បងបាញ់មីស៊ីលជាថ្មីម្តងទៀត យ៉ាងពិតប្រាកដ។ ប្រសិនបើក្រុងព្យុងយ៉ាងបាញ់មីស៊ីលសារជាថ្មីមែននោះ ទង្វើនេះជាការប្រឆាំងទៅនឹងសេចក្តីសំរេចចិត្តរបស់អង្គការសហប្រជាជាតិ។
ក្រុងព្យុងយ៉ាងធ្លាប់ផ្គើនសហគមន៍អន្តរជាតិ និងគំរាមវាយប្រហារកូរ៉េខាងត្បូង និងសហរដ្ឋអាមេរិក ជាច្រើនលើកច្រើនសារមកហើយ ចាប់ពីពេលដែលអង្គការសហប្រជាជាតិ បានដាក់ទណ្ឌកម្មថ្មីបន្ថែមទៀតទៅកូរ៉េខាងជើង។ ទណ្ឌកម្មថ្មីរបស់អង្គការសហប្រជាជាតិ ជាការឆ្លើយតបនឹងការសាកល្បងនុយក្លេអ៊ែរ ដែលក្រុងព្យុងយ៉ាងបានធ្វើ កាលពីថ្ងៃ១២កុម្ភៈកន្លងទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ