បារាំងបើកប្រតិបត្តិការបង្រ្កាបក្រុមអ៊ីស្លាមជ្រុលនិយម
ចុះផ្សាយនៅថ្ងៃ៖
ស្តាប់ - ០៧:៤៧
នៅព្រឹកថ្ងៃសុក្រទី ៣០ មីនានេះ ប៉ូលិសស៊ើបការណ៍សម្ងាត់បារាំងបានបើកប្រតិបត្តិការដាក់សំណាញ់ចាប់ក្រុមមនុស្សដែលមានចលនាអ៊ីស្លាមនិយមជ្រុល នៅទូទាំងប្រទេសបារាំង។ ក្នុងខេត្តToulouse Nantes Marseille និងជាយក្រុងប៉ារីស ប៉ូលិសចាប់ដាក់ឃុំជនសង្ស័យ១៩នាក់ និងរឹបអូសបានអាវុធជាច្រើនដើម។
លោកប្រធានាធិបតីបារាំងNicolas Sarkozy បាននិយាយប្រាប់វិទ្យុ Europe 1ថា ក្រុមអ៊ីស្លាមជ្រុលនិយម ដែលប៉ូលិសបើកបេសកកម្មបោសសម្អាត នៅព្រឹកមិញនេះ មិនពាក់ព័ន្ធឧក្រិដ្ឋជន Mohamed Merah ដែលប៉ូលិសពិសេសបាញ់សម្លាប់ កាលពីថ្ងៃសុក្រសប្តាហ៍មុន នៅខេត្តToulouse ទេ។
ប្រតិបត្តិការរបស់ប៉ូលិស ជាផ្នែកមួយនៃបទបញ្ជារបស់ប្រធានាធិបតី បារាំង នៅក្រោយព្រឹត្តិការណ៍នៅក្នុងខេត្តToulouse គឺបន្ទាប់ពីប៉ូលិស និងភ្នាក់ងារស៊ើបការណ៍សម្ងាត់បារាំងខកខាន មិនបានទប់ស្កាត់មុន ឧក្រិដ្ឋជនអ៊ីស្លាមជុ្រលនិយម Merah។
យុវជន Merah បានអះអាងថា ខ្លួនធ្លាប់ហ្វឹកហាត់ជាមួយក្រុមអ៊ីស្លាមជីហាត ដែលជាក្រុមភេរវជន និងជាបណ្តាញអាល់កៃដា។ Mohamed Merah បានបាញ់សម្លាប់ទាហាន និងកូនសិស្សសាលាជ្វីវ៧នាក់ ខេត្តToulouse និង Montauban។
ដើម្បីទប់ស្កាត់កុំឲ្យមានករណីMerah ជាលើកទីពីរ ប្រធានាធិបតីបារាំងបានចេញបញ្ជាឲ្យប៉ូលិសវាយតម្លៃពីកម្រិតគ្រោះថ្នាក់របស់ក្រុមមនុស្សដែល មានទំនាក់ទំនងល្អ និងមានសមាណចិត្ត ជាមួយពួកអ៊ីស្លាមជ្រុលនិយម។ ប៉ូលិសបារាំងត្រូវដាក់ក្រោមការតាមដានរាល់សកម្មភាពរបស់មនុស្សដែលចូលមើលវិបសៃត៍របស់ពួកភេរវជន ឬ ជនដែលធ្វើដំណើរទៅប្រទេសដែលសម្បូរដោយក្រុមអ៊ីស្លាមជ្រុលនិយម។
អំណើះតទៅ ប៉ូលិសនឹងចាប់មនុស្សដែលមាននិន្នាការអ៊ីស្លាមជ្រុលនិយម និងដែលគេសង្ស័យថា អាចធ្វើសកម្មភាពគ្រោះថ្នាក់ ដូចយុវជន Mohamed Merah។
មេដឹកនាំសាសនាអ៊ីស្លាមដែលមាននិន្នាការជ្រុលនិយមហាមមិនឲ្យចូលទឹកដីបារាំង
ប្រមុខដឹកនាំសាសនាអ៊ីស្លាម ទាំងអស់៤នាក់ ដែលបារំាងបដិសេធមិនផ្តល់ទិដ្ឋាការឲ្យចូលក្នុងប្រទេសបារាំង។ ម្នាក់ជាជនជាតិប៉ាឡេស្ទីន ពីរនាក់មកពីប្រទេសអារ៉ាប៊ី សាអ៊ូឌីត និងម្នាក់ ជាអេហ្ស៊ីប។ ពួកគេត្រូវសមាគមជនជាតិអ៊ីស្លាមអញ្ជើញឲ្យចូលរួមក្នុងសន្និបាតអង្គការអ៊ីស្លាមក្នុងប្រទេសបារាំងដែលត្រូវប្រព្រឹត្តិធ្វើ នៅថ្ងៃ ទី ៩មេសាខាងមុខ នៅទីក្រុងBourget ដែលស្ថិតនៅភាគខាងជើងក្រុងប៉ារីស។
ក្រសួងការបរទេសបារាំងបានអះអាងថា គេមិនឲ្យទិដ្ឋាការ ឬវីសា ក៏ព្រោះតែគេខា្លចថា ប្រមុខដឹកនាំសាសនាទាំងនោះនិយាយអ្វីដែលនឹងអាចប៉ះពាល់ដល់សណ្តាប់ធ្នាប់សាធារណៈបារាំង។ បើតាមភ្នាក់ងារស៊ើបការណ៍សម្ងាត់បារាំង ប្រមុខដឹកនាំសាសនា មានជំហរអ៊ីស្លាមជ្រុលនិយម និងនិន្នាការស្អប់ជនជាតិជ្វីវ ឬ ឧទាហរណ៍ក្នុងចំណោមជនទាំងបួននាក់ អ៊ីម៉ាំ Safwat al Hijaziជនជាតិអេហ្ស៊ីបធ្លាប់បាននិយាយតាមទូរទស្សន៍ នៅឆ្នាំ ២០០៩ គាត់ស្អប់ជនជាតិជ្វីវ និងថា បើកុំតែមានសម្ព័ន្ធអារ៉ាប់ កុំអី ក្រុមអ៊ីស្លាមនឹងហែកហួរជនជាតិជ្វីវឲ្យណាណីតែម្តង។ លោក Akrima Sabri វិញធ្លាប់និយាយថា មានស្ត្រីប៉ាឡេស្ទីនជាច្រើនរយនាក់ដែលត្រៀមខ្លួន បូជាជិវិតដើម្បីសេរីភាពទឹកដីប៉ាឡេស្ទីន នោះបើទោះបីជាគេត្រូវលះបង់កូន ដែលជាវត្ថុមានដ៏មានតម្លៃ។
ចំណែកសកម្មជនអ៊ីស្លាម Abdallah Basfar បានថ្លែងចំៗ នៅក្នុងសន្និបាតនៅបារាំង កាលពីឆ្នាំ ២០០៨ ថា បុរសមានសិទ្ធិស្របច្បាប់វាយប្រពន្ធរបស់គេ ប្រសិនបើនាងៗទាំងនោះមិនគោរពប្តីរបស់ខ្លួន។
សំដីទាំងនេះត្រូវអាជ្ញាធរបារាំងចាត់ទុកជាសំដីញុះញង់ និងប្រមាថមិនអាចទទួលយកបាន ជាពិសេស ក្នុងកាលៈទេសៈដែលបារាំងកំពុងរងគ្រោះដោយព្រឹត្តិការណ៍ដែលយុវជនអ៊ីស្លាមជីហាតបានបាញ់សម្លាប់ជនជាតិជ្វីវ ក្នុងខេត្តToulouse ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ