បារាំងឲ្យសម្ភារៈសឹកទៅលីបង់ ដើម្បីប្រឆាំងនឹងអង្គការរដ្ឋអ៊ីស្លាម
ប្រទេសបារាំងនឹងផ្តល់សម្ភារៈសព្វាវុធ តម្លៃប្រមាណ ៣ពាន់លានដុល្លារអាមេរិក ក្រោមជំនួយរបស់ប្រទេសអារ៉ាប៊ី សាអូឌីត ទៅកាន់សាធារណៈរដ្ឋ លីបង់ នៅថ្ងៃចន្ទស្អែកនេះ។ ជាការផ្តល់ជំនួយរបស់អារ៉ាប៊ី សាអូឌីត ដើម្បីគាំទ្រប្រទេសជាសម្ព័ន្ធមិត្តរបស់ខ្លួន ក្នុងការប្រយុទ្ធប្រឆាំង នឹងក្រុមអង្គការរដ្ឋអ៊ីស្លាម និងក្រុមភេរវនិយមផ្សេងទៀត ដែលកំពុងតែរស់នៅតាមបណ្តោយព្រំដែនប្រទេសស៊ីរី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៦
រថក្រោះប្រឆាំងមីស៊ីលត្រូវបានគេបញ្ជាក់ថា នឹងបញ្ជូនទៅកាន់ព្រលានយន្តហោះយោធាក្នុងក្រុងបេរូត ក្រោមការចូលរួមត្រួតពិនិត្យ របស់រដ្ឋមន្ត្រីការពារជាតិបារាំង ហ្សង់-វ្យែស ឡឺ ឌ្រីយ៉ង់ (Jean-Yves Le Drian) និងសមភាគីលីបង់របស់លោក គឺលោក ស៊ីមៀរ មុកបែល (Samir Mokbel)។
បារាំងនឹងបញ្ជូននូវសម្ភារៈសឹក ប្រមាណ ២៥០គ្រឿង ដែលមានទាំងរថយន្តសម្រាប់ដឹកជញ្ជូនកងទ័ព ឧទ្ធម្ភាគចក្រ Cougar ប្រាំពីរគ្រឿង នាវាចម្បាំងខ្នាតតូច៣គ្រឿង ឧបករណ៍ចាប់សញ្ញាឃ្លាំមើល និងវិទ្យុទាក់ទង ដែលសម្ភារៈសឹក ទំនើបទាំងអស់នេះមានតម្លៃប្រមាណ៣ពាន់លានដុល្លារអាមេរិក ឬប្រហែល ២.៨ពាន់លានអឺរ៉ូ។
សព្វាវុធទាំងអស់នេះ ត្រូវបានឧបត្ថមដោយប្រទេសអារ៉ាប៊ីសាអូឌីត ដែលមានគោលដៅចង់ឲ្យកងទ័ពលីបង់ការពារព្រំដែនរបស់ខ្លួនប្រឆាំងនឹងក្រុមជីហាត ជាពិសេសពីក្រុមអង្គការរដ្ឋអ៊ីស្លាមជីហាត និងក្រុម Al-Nusra ដែលជាប់ទាក់ទងនឹងក្រុម Al-Gaeda។ ការផ្តល់ជំនួយនេះ ទៅឲ្យលីបង់ គឺជំនួសឲ្យការផ្តល់ជំនួយទៅឲ្យក្រុមសកម្មប្រយុទ្ធ Hezbollah ដែលគាំទ្រដោយគូប្រជែងរបស់អារ៉ាប៊ីសាអូឌីត គឺអ៊ីរ៉ង។
នៅក្នុងកិច្ចសន្យានៃការផ្តល់សព្វាវុធនេះផងដែរ ក៏មានការសន្យាជួយបង្វឹកកងទ័ពលីបង់ប្រមាណ៧ម៉ឺននាក់ និងជួយជួសជុលសម្ភារៈសឹកទាំងនោះក្នុងរយៈពេល១០ឆ្នាំ។ លោករដ្ឋមន្ត្រីការពារជាតិបារាំង បានបញ្ជាក់ថា នៅក្នុងគម្រោងនេះ គឺអាចជួយឲ្យកងទ័ពប្រទេសលីបង់មានសមត្ថភាពគ្រប់គ្រាន់ ដើម្បីឆ្លើយតបនឹងសភាពការជាក់ស្តែង។
សូមបញ្ជាក់ថា ចាប់តាំងពីសង្គ្រាមក្នុងប្រទេសស៊ីរី ជាប្រទេសជិតខាងរបស់ខ្លួន បានផ្ទុះឡើងពីឆ្នាំ២០១១មក លីបង់បានជួបនឹងការគំរាមកំហែងជាច្រើន ដូចជាការកើនឡើងនៃចំនួនជនភៀសខ្លួនរាប់លាននាក់ ដែលចូលមកក្នុងប្រទេស និងការកើនឡើងនៃពួកជីហាតនៅតាមព្រំដែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ