លីបង់ខឹងបារាំងក្នុងរឿងដឹកជញ្ជូនអាវុធយឺតយ៉ាវ
ប្រឈមមុខនឹងការស្ទុះឡើងនៃពួកជីហាតអ៊ីស្លាមជ្រុលនិយម រាតត្បាតដល់ភាគខាងកើតប្រទេស លីបង់បានបញ្ចេញសំឡេង សម្តែងអាការៈមិនសប្បាយចិត្ត នៅថ្ងៃអង្គារទី ៥ សីហា នេះ ចំពោះប្រទេសបារាំងដែលយឺតយ៉ាវក្រដឹកជញ្ជូនអាវុធមកប្រគល់ឱ្យលីបង់តាមការបញ្ជាទិញ។ អាវុធយុទ្ធភណ្ឌដែលលីបង់ត្រូវការជាចាំបាច់សម្រាប់ប្រយុទ្ធប្រឆាំងនឹងពួកឧទ្ទាមអ៊ីស្លាមជីហាត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៤
ខុសពីទម្លាប់សព្វមួយដង ប្រមុខដឹកនាំយោធាលីបង់ដែលធ្លាប់តែសំងំមិនសូវចេញស្តី បានបញ្ចេញប្រតិកម្មហួសចិត្តនឹងភាពយឺតយ៉ាវរបស់បារាំងក្នុងបញ្ជូនអាវុធយុទ្ធភណ្ឌទៅប្រទេសខ្លួន។ ហួសចិត្តដ្បិតតាំងពីថ្ងៃសៅរ៍មក អំពើហិង្សាបានរាលដាលមកស៊ីរី ទាហានលីបង់ដែលទន់ខ្សោយ ត្រូវប្រឈមមុខប្រយុទ្ធជាមួយនឹងជីហាតមកស៊ីរី។ ក្រុងទ្រីប៉ូលី ក្រុងធំជាងគេរបស់លីបង់ កំពុងវក់វីនឹងអំពើហិង្សា។ គ្រោះថ្នាក់មានកាន់ធំសម្រាប់លីបង់។
កងកម្លាំងរដ្ឋាភិបាលលីបង់ ដែលខ្វះសព្វខ្វះគ្រប់ ក្នុងពេលបច្ចុប្បន្ននេះ លីបង់ ត្រូវការជាចាំបាច់ពន្លឿនជំនួយយោធា ដោយបំពាក់ សម្ភារៈ អាវុធយុទ្ធភ័ណ្ឌ និងបច្ចេកវិទ្យាទំនើបៗ ដែលមានក្នុងបញ្ជីរាយឈ្មោះទិញពីប្រទេសបារាំង ឱ្យបានទាន់ពេលវេលា។ គ្រាន់តែបានឮប្រតិកម្មរបស់លីបង់នេះភ្លាម ភាគីបារាំងបានបញ្ជាក់គ្មានបង្អង់ ថានឹងឆ្លើយតបឱ្យបានឆាប់រហ័សទៅនឹងសំណើរបស់លីបង់ ប៉ុន្តែមិនទាន់ពន្យល់បំភ្លឺពីភាពយឺតយ៉ាវឡើយ។
សូមបញ្ជាក់ថា លីបង់ ក្នុងក្របខ័ណ្ឌជំនួយពិសេសដល់យោធា បានបញ្ជាទិញអាវុធពីប្រទេសបារាំង ដោយមានជំនួយហិរញ្ញវត្ថុពីប្រទេសអារ៉ាប៊ីសាអ៊ូឌីត ក្នុងទំហំទឹកប្រាក់ ៣ពាន់លានដុល្លារ។ អារ៉ាប៊ីសាអ៊ូឌីតបានព្រមព្រៀងជួយយោធាលីបង់តាំងពីខែចុងខែធ្នូ ! នៅពាក់កណ្តាលខែមិថុនា នាឱកាសសន្និសីទក្រុងរ៉ូម សហគមន៍អន្តរជាតិ ក៏បានប្រកាសគាំទ្រកងកម្លាំងលីបង់ ដោយព្រមជួយបណ្តុះបណ្តាលទាហានឱ្យមានសមត្ថភាពទប់ទល់នឹងពួកភេរវនិយម និងផលវិបាកនៃសង្គ្រាមនៅ ស៊ីរី។ ក្រុមប្រឹក្សាសន្តិសុខអង្គការសហប្រជាជាតិ ក៏បានសម្តែងឆន្ទៈគាំទ្រទាហានលីបង់ក្នុងបុព្វហេតុប្រយុទ្ធប្រឆាំងនឹងភេរវនិយមនេះដែរ ព្រោះទាហានលីបង់គឺជាទន្ទល់នៃស្ថិរភាព និងការរួបរួមជាតិ។
តាំងពីវិបត្តិនៅស៊ីរីបានផ្ទុះឡើង លីបង់ បានជួបអំពើហិង្សាសាសនាជាញឹកញយ និងមានភាពប្រេះឆាជាតិកាន់តែខ្លាំង។ ហើយពេលនេះស្ថានភាពកាន់តែដុនដាប កាលពីថ្ងៃសៅរ៍មានការប្រយុទ្ធគ្នានៅភាគខាងកើត បង្កឱ្យស្លាប់ទាហានលីបង់១៦នាក់។ ទាហាន ប៉ូលិសប្រមាណជាង៤០នាក់ដែលបាត់ខ្លួន ទំនងជាកំពុងស្ថិតក្នុងកណ្តាប់ដៃ ពួកអ៊ីស្លាមជ្រុលនិយមផង។ នេះបើតាមប្រភពយោធានិងប៉ូលិស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ