លោក ឡូរ៉ង់ បាក់បូ បណ្តេញកងទ័ពអង្គការសហប្រជាជាតិ និងទ័ពបារាំងចេញពីកូតឌីវ័រ
ចុះផ្សាយនៅថ្ងៃ៖
ស្តាប់ - ០៥:៥២
ស្ថានភាពនៅប្រទេសកូតឌីវ័រកាន់តែធ្លាក់ដុនដាបខ្លាំងឡើងៗ នៅថ្ងៃសៅរ៍ម្សិលមិញ លោក ឡូរ៉ង បាក់បូ ដែលមិនព្រមចាកចេញពីតំណែងប្រធានាធិបតី បានផ្គើនតបនឹងសហគមន៍អន្តរជាតិ ប្រកាសបណ្តេញកងទ័ពមួយខៀវ និងកងទ័ពបារាំង ឲ្យចាកចេញជាបន្ទាន់ពីកូតឌីវ័រ។
រដ្ឋាភិបាលកូតឌីវ័ររបស់លោក ឡូរ៉ង់ បាក់បូ (Laurent Gbagbo) នឹងមិនអនុញ្ញាត ឲ្យកងទ័ពមួកខៀវ បន្តអាណត្តិ (ដែលនឹងត្រូវផុតនៅថ្ងៃទី ៣១ធ្នូ ២០១០) នៅលើទឹកដីកូតឌីវ័រទៀតទេ ។
ការបណ្តេញចេញកងទ័ពបារាំង ចំនួន ៩០០នាក់ និងមួកខៀវប្រមាណ១ម៉ឺននាក់ ចេញ ពីប្រទេសនេះ ត្រូវបានរដ្ឋាភិបាលលោក បាក់បូ ផ្តល់ហេតុផលច្រើនយ៉ាង ៖
អង្គការសហប្រជាជាតិ គាំទ្រកងទ័ពកម្លាំងថ្មី ដែលជាសម្ព័ន្ធមិត្តរបស់លោកវ៉ាត់តារ៉ា ដោយផ្តល់ជាអាវុធ និងជួយឃោសនាបំរើឲ្យផលប្រយោជន៍ក្រុមប្រឆាំង -ប្រើប្រាស់ប្រព័ន្ធវិទ្យុដើម្បីបំផុសបំផុល ញុះញង់ឲ្យមានការស្អប់ខ្ពើមគ្នា។ ជាពិសេសទៅទៀត អង្គការសហប្រជាជាតិមិនគោរពសេចក្តីសម្រេចរបស់ក្រុមប្រឹក្សា ធម្មនុញ្ញ ដែលបានប្រកាសលទ្ធផលនៃការបោះឆ្នោតឲ្យលោកបាក់បូ ជាអ្នកឈ្នះ។
ខាងលោក វ៉ាត់តារ៉ា (Ouatara)បានចាត់ទុកការបណ្តេញកងទ័ពអន្តរជាតិ ថាជារឿងគួរឲ្យអស់សំណើច និងកំពុងតែនាំប្រទេសកូតឌីវ័រឲ្យក្លាយទៅប្រទេសរ្វ៉ាន់ដាទីពីរ និងមិនអាចយកមកអនុវត្តបានឡើយ ព្រោះលោកបាក់បូ មិនមែនជាប្រធានាធិបតីស្របច្បាប់ទៀតទេ។
ហេតុដូច្នេះហើយបានជា លោកអគ្គលេខាធិការអង្គការសហប្រជាជាតិ បាន គីមូន បានច្រានចោលសំណើរបស់រដ្ឋាភិបាលលោកបាក់បូ ភ្លាមមួយរំពេច និងបានប្រកាសបំពេញតួនាទី និងបន្តបេសកកម្ម ត្រួតពិនិត្យរាល់គ្រប់សកម្មភាពរំលោភសិទ្ធិមនុស្ស និងការញុះញង់ឲ្យស្អប់ខ្ពើមគ្នា ការវាយប្រហារមកលើកងទ័ពអង្គការសហប្រជាជាតិ។ លោកបានគីមូន ព្រមទាំងបានព្រមានជាថ្មី ថាក្រុមអ្នកដៃដល់ ប្រមាថវាយប្រហារ ឬ បង្កសកម្មភាពប្រឆាំងនឹងអង្គការសហប្រជាជាតិ នឹងត្រូវទទួលរងផលវិបាកយ៉ាងធ្ងន់ធ្ងរ។
ប៉ុន្តែ លោក Charles Blé Goudé រដ្ឋមន្ត្រីក្រសួងយុវជន និងការងារ របស់រដ្ឋាភិបាលលោក បាក់បូ ដែលមានងារ “មេដឹកនាំក្រុមបះបោរតាមថ្នល់” បានប្រកូកប្រកាស ប្រមូលផ្តុំយុវជន ឲ្យងើបឈរឡើង ប្រយុទ្ធប្រឆាំង និងកម្ទេចក្រុមបក្សព័ន្ធនឹងលោក វ៉ាត់តារ៉ា រហូតដល់ដំណក់ឈាមចុងក្រោយ ដើម្បីបុព្វហេតុ បូរណភាពដែនដី និងដើម្បីការពារភាពថ្លៃថ្នូរ និងសេរីភាពជាតិ ! មេដឹកនាំយុវជនរូបនេះ បានស្បថថានឹងមិនបង្កឲ្យមានហិង្សាទេ ប៉ុន្តែ សូមជម្រាបថា កាលពីឆ្នាំ២០០៣ និង២០០៤ គឺ Charles Blé Goudé នេះតែម្តង ដែលជាមេខ្លោងដឹកនាំបាតុកម្មហិង្សាប្រឆាំងនឹងបារាំង។
ចំណែកខាងកងទ័ពថ្មី កំពុងស្ថិតក្នុងស្ថានភាពត្រៀមអាសន្នជាងពេលណាៗទាំងអស់។ បក្សពួកលោកវ៉ាត់តារ៉ា ក៏ស្ថិតក្នុងលក្ខណៈប្រមូលផ្តុំជានិច្ចដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ