អាល្លឺម៉ង់ចាប់បានចារកិច្ចម្នាក់ដែលធ្វើការឲ្យអាមេរិក
ចុះផ្សាយនៅថ្ងៃ៖
ស្តាប់ - ០៥:៥៥
នៅយប់ថ្ងៃសុក្រម្សិលមិញ ក្រសួងការបរទេសអាល្លឺម៉ង់បានកោះហៅ ឯកអគ្គរដ្ឋទូតអាមេរិក ប្រចាំក្នុងក្រុងប៊ែរឡាំង បន្ទាប់ពីប៉ូលិសអាល្លឺម៉ង់ចាប់បានបុរសម្នាក់ ដែលបានសារភាពថា គេបានលួចយកការណ៍ពី សភាអាល្លឺម៉ង់ ទៅឲ្យទីភ្នាក់ងារស៊ើបការណ៍សម្ងាត់របស់អាមេរិក។
តាមប៉ូលិសអាល្លឺម៉ង់ បុរសនោះមានអាយុ៣១ឆ្នាំ ជាបុគ្គលិកធ្វើការឲ្យទីភ្នាក់ងារស៊ើបការណ៍សម្ងាត់ជាតិអាល្លឺម៉ង់។ ដំបូងឡើយ គេចាប់ខ្លួនបុរសម្នាក់នោះ ដោយសារតែគេសង្ស័យថា គាត់ព្យាយាមលួចទាក់ទងជាមួយភ្នាក់ងារស៊ើបការណ៍សម្ងាត់រុស្ស៊ី។ ប៉ុន្តែ នៅពេលចាប់ខ្លួន និងសួរចម្លើយ បុរសម្នាក់នោះបានសារភាពថា ខ្លួនគេបានលួចស៊ើបការណ៍ពីសភាអាល្លឺម៉ង់ ដែលពេលនេះកំពុងបើកការស៊ើបអង្កេតទៅលើចារកម្មរបស់ទីភ្នាក់ងារNSA អាមេរិក មកលើប្រទេសអាល្លឺម៉ង់។
តាមទស្សនាវដ្តីអាល្លឺម៉ង់ ដែលដកស្រង់សំដីពីប្រភពប៉ូលិស បុរសដែលគេចាប់ខ្លួន ខំលួចយកឯកសារសម្ងាត់ពីគណៈកម្មការស៊ើបការណ៍របស់សភា ដើម្បីយកលក់ឲ្យភ្នាក់ងារសម្ងាត់អាមេរិក។ អាមេរិកអាចទិញព័ត៌មានទាក់ទងនឹងការងារស៊ើបអង្កេតរបស់សភាអាល្លឺម៉ង់ ព្រោះអាមេរិកចង់ដឹងថា តើសភាអាល្លឺម៉ង់ អាចប្រមូលបានព័ត៌មានអ្វីខ្លះ ទាក់ទងនឹងការងារលួចយកការណ៍របស់ទីភ្នាក់ងារNSA របស់អាមេរិកនោះ។
សូមបញ្ជាក់ថា នៅក្រោយផ្ទុះរឿងរ៉ាវលួចស្តាប់របស់ទីភ្នាក់ងារអាមេរិកទៅលើប្រជាជនអាល្លឺម៉ង់ និងទៅលើលោកស្រីនាយករដ្ឋមន្រ្តីអាល្លឺម៉ង់ គណៈកម្មការស៊ើបការណ៍សម្ងាត់របស់អាល្លឺម៉ង់បានបើកការស៊ើបអង្កេត និងព្យាយាមទាក់ទងទៅយុវជន Edward Snowden ដែលជាអ្នកទម្លាយឯកសារសម្ងាត់របស់អាមេរិក កាលពីឆ្នាំ ២០១៣។ បច្ចុប្បន្ននេះ គណៈកម្មការស៊ើបអង្កេតរបស់សភាអាល្លឺម៉ង់ កំពុងសាកសួរអតីតមន្រ្តីជាន់ខ្ពស់ម្នាក់របស់ទីភ្នាក់ងារNSA។ លោកWilliam Binney ដែលធ្លាប់បម្រើការឲ្យNSA រយៈពេល៣០ឆ្នាំ បាននិយាយរិះគន់យ៉ាងចាស់ដៃ សកម្មភាពលួចស្តាប់របស់ទីភ្នាក់ងារNSA អាមេរិក និងថា NSA បានធ្វើការសហការគ្នាយ៉ាងស្អិតល្មួតជាមួយទីភ្នាក់ងារស៊ើបការណ៍សម្ងាត់អាល្លឺម៉ង់ BND។
អាល្លឺម៉ង់អាចអន់ចិត្ត និងបោះបង់ចោលអាមេរិកក្នុងសំណុំរឿងអ៊ុយក្រែន និងវិបត្តិនុយក្លែអ៊ែរអ៊ីរ៉ង់
ចាប់តាំងពីយុវជនEdward Snowden បានបង្ហាញឯកសាររបស់អាមេរិក ដែលថា ទីភ្នាក់ងារNSA បានលួចស្តាប់ និងចូលមើលព័ត៌មានផ្ទាល់ខ្លួនរបស់ប្រជាជនអាល្លឺម៉ង់ ទំនាក់ទំនងអាល្លឺម៉ង់ និងអាមេរិក ក៏ចាប់ផ្តើមមានភាពល្អក់កករ ប៉ុន្តែ មិនឈានដល់ថ្នាក់ប្រឈមមុខដាក់គ្នាទេ។ ទូរស័ព្ទរបស់លោកស្រី នាយករដ្ឋមន្រ្តីអាល្លឺម៉ង់ ក៏ត្រូវទីភ្នាក់ងារអាមេរិកលួចស្តាប់ដែរ ប៉ុន្តែ លោកស្រីអង់ហ្គែឡា ម៉ែរគែល ចង់ជៀសវាងវិបត្តិការទូតជាមួយអាមេរិក។ យ៉ាងណាក៏ដោយ នៅក្នុងពេលលោកស្រីជួបលោកប្រធានាធិបតីអាមេរិក កាលពីខែឧសភាកន្លងទៅ នៅទីក្រុងវ៉ាស៊ីនតោន លោកស្រីនៅតែទាមទារសុំឲ្យអាមេរិកបកស្រាយបំភ្លឺ ថាតើអាមេរិកកំពុងតែលួចស្តាប់ទូរស័ព្ទរបស់គាត់ និងរបស់ប្រជាជនអាល្លឺម៉ង់ពិតមែនឬយ៉ាងណា? កាលណោះ លោកអូបាម៉ាបានឆ្លើយបញ្ជាក់ថា លោកមិនបានដឹងថា គេបានលួចស្តាប់ខ្សែទូរស័ព្ទរបស់លោកស្រីនាយករដ្ឋមន្រ្តីអាល្លឺម៉ង់។
លោកស្រីអង់ហ្គែឡា ម៉ែរគែលអាចយោគយល់ អាមេរិក ព្រោះថា អាមេរិកជាសម្ព័ន្ធមិត្តរបស់អាល្លឺម៉ង់ និងអឺរ៉ុបទាំងមូល។ ប៉ុន្តែ នៅក្នុងប្រទេស ប្រមុខដឹកនាំអាល្លឺម៉ង់ រងការដាក់សម្ពាធទាំងពីគណបក្សប្រឆាំង និងពីប្រជាជនអាល្លឺម៉ង់។ ប្រជាជនអាល្លឺម៉ង់ ដែលធ្លាប់ស្គាល់រសជាតិ ត្រូវពួកStasi ស្តាប់យកការណ៍អស់ជាច្រើនឆ្នាំ ពេលនេះ ស្អប់ណាស់ រឿងស្តាប់យកការណ៍ ដែលពួកគេចាត់ទុកថា ជាការំលោភទៅលើជីវិតឯកជន។ ដោយសារតែមានការទាមទារពីប្រជាជន និងពីគណបក្សប្រឆាំងអាល្លឺម៉ង់ គណៈកម្មការសភាបានបើកការស៊ើបអង្កេតទៅលើសកម្មភាពចារកិច្ចរបស់NSA អាមេរិកទៅលើអាល្លឺម៉ង់។ កាលពីខែមុនទៀត រដ្ឋអាជ្ញាអាល្លឺម៉ង់ក៏បានបើកការស៊ើបអង្កេតទៅលើការលួចស្តាប់ទូរស័ព្ទរបស់នាយករដ្ឋមន្រ្តីអាល្លឺម៉ង់ ពីសំណាក់NSA ដែរ។
ចំណាត់ការទំាងនោះ ធ្វើឡើង គ្រាន់តែ ដើម្បីបង្ហាញដល់មតិសាធារណៈថា អាល្លឺម៉ង់ មិនមែន ព្រងើយកន្តើយ មិនចាត់ការ ប្រឆាំងនឹងអាមេរិកទេ នៅក្នុងរឿងចារកម្មរបស់អាមេរិកមកលើអាល្លឺម៉ង់ ។ ប៉ុន្តែ មើលទៅចំណាត់ខាងលើមិនអាចទៅឆ្ងាយ បាន ព្រោះត្រូវដឹងថា ភ្នាក់ងារស៊ើបការណ៍សម្ងាត់អាល្លឺម៉ង់ ក៏ជាដៃគូ ធ្លាប់ធ្វើការជាមួយភ្នាក់ងារអាមេរិក តាំងពីសម័យសង្រ្គាមត្រជាក់ម្ល៉េះ។ រឿងស្តាប់យកការណ៍ពីប្រជាជន អាចជារឿងសំខាន់ សម្រាប់អាល្លឺម៉ង់ ប៉ុន្តែ សម្រាប់អាមេរិក វាជារឿងតូចតាច ដែលអាល្លឺម៉ង់ក៏មិនត្រូវផ្តល់សារៈសំខាន់ រហូតធ្វើឲ្យទំនាក់ទំនងសម្ព័ន្ធមិត្តទាំងពីរចុះល្អក់កករដែរ។
ក្នុងនាមជាមហាអំណាចពិភពលោក អាមេរិកអាចមើលមិនសូវឃើញតម្លៃរបស់អាល្លឺម៉ង់ ដោយសារអាល្លឺម៉ង់ បានបាត់បង់អំណាច ចាប់តាំងពីចាញ់សង្រ្គាម លោកលើកទាំងពីរ។ ប៉ុន្តែ អាមេរិកក៏មិនអាចមើលរំលងសក្តានុពលរបស់អាល្លឺម៉ង់ ដែលបច្ចុប្បន្នជាប្រទេសមានសេដ្ឋកិច្ចនាំមុខគេនៅអឺរ៉ុប។ នៅក្នុងបរិបទបច្ចុប្បន្ននេះទៀត អាល្លឺម៉ង់កំពុងមានដើរតួនាទីយ៉ាងសំខាន់ ទាំងនៅក្នុងរឿងវិបត្តិនុយក្លេអ៊ែរអ៊ីរ៉ង់ ដែលអាល្លឺម៉ង់ជាភាគីចរចាមួយដែរ និងរឿងអ៊ុយក្រែន ដែលរហូតមកដល់ពេលនេះ ប៊ែរឡាំងជាអ្នកសម្របសម្រួល អាចនិយាយបញ្ចុះបញ្ចូលប្រធានាធិបតីពូទីនឲ្យមកចូលរួមដោះស្រាយវិបត្តិអ៊ុយក្រែន។ ដូច្នេះ បើសិនជាអាមេរិកនៅតែបន្តធ្វើឲ្យប្រជាជនអាល្លឺម៉ង់ខឹងសម្បារ ដោយសារតែនៅបន្តលួចស្តាប់យកការណ៍ពីអាល្លឺម៉ង់ នោះវាអាចដែរថា អាល្លឺម៉ង់ នឹងមិនអាចអត់ធ្មត់តទៅទៀត និងអាចដើរចេញ ទុកឲ្យអាមេរិកដោះស្រាយបញ្ហានុយក្លេអ៊ែរ អ៊ីរ៉ង់ និងវិបត្តិអ៊ុយក្រែនតែម្នាក់ឯង ក៏អាចថាបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ