ក្រុមហាម៉ាសបន្ទន់ជំហរជាលើកដំបូងជាមួយអ៊ីស្រាអែល ដោយប្រកាសកែប្រែកម្មវិធីនយោបាយថ្មី
ចុះផ្សាយនៅថ្ងៃ៖
ស្តាប់ - ០៥:៣៨
ល្ងាចថ្ងៃចន្ទ១ឧសភា ម្សិលមិញ ក្រុមហាម៉ាសប៉ាឡេស្ទីន ដែលអាមេរិក និងអឺរ៉ុបចាត់ទុកថា ជាក្រុមភេរវជន បានប្រកាសថា បានកែប្រែកម្មវិធីនយោបាយរបស់ខ្លួន។ កម្មវិធីនយោបាយថ្មីនេះ មានខ្លឹមសារ ទទួលស្គាល់រដ្ឋប៉ាឡេស្ទីនស្ថិតក្នុងដែនកំណត់ព្រំដែនឆ្នាំ១៩៦៧ ជាខ្លឹមសារដែលស្របតាមខ្លឹមសារនយោបាយដែលរដ្ឋអំណាចប៉ាឡេស្ទីនដាក់ចរចាជាមួយអ៊ីស្រាអែលកន្លងមក។
ការប្រកាសកែប្រែកម្មវិធីនយោបាយរបស់ក្រុមហាម៉ាស ធ្វើឡើងតែ២ថ្ងៃប៉ុណ្ណោះ មុនប្រធានាធិបតីអាមេរិកដូណាល់ ត្រាំ ទទួលជួបប្រធានរដ្ឋអំណាចប៉ាឡេស្ទីន លោកម៉ាមូត អាបាស នៅសេតវិមាន ថ្ងៃពុធស្អែកនេះ។
ក្រុមហាម៉ាសកែប្រែកម្មវិធីនយោបាយថ្មី ជាការបន្ទន់ជំហររកអ៊ីស្រាអែល
ខ្លឹមសារថ្មីនេះបំពេញបន្ថែមក្នុងកម្មវិធីនយោបាយចំណាស់ជិត៣០ឆ្នាំរបស់ចលនាហាម៉ាស។ ក្នុងខ្លឹមសារបន្ថែមថ្មី ក្រុមហាម៉ាសទទួលស្គាល់រដ្ឋប៉ាឡេស្ទីន ដែលស្ថិតក្នុងដែនកំណត់ព្រំដែនឆ្នាំ១៩៦៧ និយាយទៅ ជាព្រំដែនដែលបានគូសឡើង មុនអ៊ីស្រាអែលចូលកាន់កាប់ស៊ីសហ្ស៊កដានី ហ្កាហ្សា និងហ្សេរុយហ្សាឡិមខាងកើត។ ខ្លឹមសារកម្មវិធីរបស់ក្រុមហាម៉ាស ដែលចុះផ្សាយជាសាធារណៈ បានលើកឡើងពីរដ្ឋប៉ាឡេស្ទីនដែលចេញពីទន្លេជួរដាំង Jourdain ទៅដល់សមុទ្រមេឌីទែររ៉ាណេ។
ក្រុមហាម៉ាសប្រាប់ថា ដែនដីរដ្ឋប៉ាឡេស្ទីនបែបនេះ ជារូបមន្តនៃការមូលមតិជាតិ។ ក្រុមហាម៉ាសចង់មានន័យថា ខ្លឹមសារនយោបាយកែប្រែថ្មីនេះ ជារូបមន្តជួយក្នុងការផ្សះផ្សារវាងក្រុមខ្លួន និងក្រុមហ្វាតារបស់លោកម៉ាមូត អាបាស ដែលជាប្រធានរដ្ឋអំណាចប៉ាឡេស្ទីននោះឯង។ គេមើលឃើញដែរថា ខ្លឹមសារនយោបាយដែលកែប្រែថ្មីនេះ ជាការបន្ទន់ជំហររបស់ក្រុមហាម៉ាសទៅរកអ៊ីស្រាអែល។ សួរថា បន្ទន់ជំហរដូចម្តេច? បន្ទន់ជំហរ ដោយធ្វើអោយនយោបាយថ្មីរបស់ហាម៉ាស ស្របតាមនយោបាយដែលរដ្ឋអំណាចប៉ាឡេស្ទីន ដាក់លើតុចរចាជាមួយអ៊ីស្រាអែល។
ថ្ងៃពុធស្អែក ប្រធានរដ្ឋអំណាចប៉ាឡេស្ទីន ម៉ាមូត អាបាស នឹងជួបលោកដូណាល់ ត្រាំ នៅសេតវិមាន។ លោកអាបាសចង់អោយលោកត្រាំ ជួយជំរុញកិច្ចពិភាក្សាសន្តិភាពរវាងប៉ាឡេស្ទីននិងអ៊ីស្រាអែល ដែលជាប់គាំង៣ឆ្នាំមកហើយ។ ដូច្នេះ បើក្រុមហាម៉ាសអាចបន្ទន់ជំហរកម្មវិធីខ្លួនបន្តិចដែរ ស្របតាមរដ្ឋអំណាចប៉ាឡេស្ទីន នោះអាមេរិកអាចពិចារណាឡើងវិញ ចំពោះបញ្ហាប៉ាឡេស្ទីន លោកត្រាំអាចនឹងខិតខំជួយប៉ាឡេស្ទីនពេញដៃពេញជើង ក្នុងកិច្ចពិភាក្សាជាមួយអ៊ីស្រាអែលបាន។
សូមបញ្ជាក់ថា ក្រុមហាម៉ាសកាន់កាប់ហ្កាហ្សា១០ឆ្នាំហើយ។ ក្នុងខ្លឹមសារកម្មវិធីនយោបាយដែលហាម៉ាសកែប្រែថ្មី ក្រុមហាម៉ាសនៅតែបញ្ជាក់ថា មិនទទួលស្គាល់រដ្ឋអ៊ីស្រាអែល ប៉ុន្តែសង្កត់ធ្ងន់ថា ការដែលហាម៉ាសប្រយុទ្ធប្រឆាំងអ៊ីស្រាអែលនោះ មិនមែនជាការប្រឆាំងជនជាតិជ្វីហ្វ សាសនាជ្វីហ្វអ៊ីស្រាអែលទេ តែជាការប្រឆាំងនយោបាយឈ្លានពានរបស់អ៊ីស្រាអែលទៅលើប៉ាឡេស្ទីន។ អាចថា ក្រុមហាម៉ាសចង់ប្រាប់ទៅលោកដូណាល់ ត្រាំ ថា ក្រុមហាម៉ាសស្អប់ខ្ពើមតែនយោបាយឈ្លានពានរបស់អ៊ីស្រាអែលប៉ុណ្ណោះ មិនបានស្អប់ខ្ពើមជនជាតិជ្វីហ្វទេ។ ក្រុមហាម៉ាសលើកឡើងថា ការកាប់សម្លាប់ជនជាតិជី្វហ្វជារឿងប្រវត្តិសាស្ត្រនៅអឺរ៉ុបរវាងអឺរ៉ុបនិងអ៊ីស្រាអែល មិនមែនរវាងអ៊ីស្រាអែលនិងប្រជាជនអារ៉ាប់ទេ។
អាមេរិក និងអឺរ៉ុបចាត់ទុកក្រុមហាម៉ាស ជាក្រុមភេរវជន។ តាមរយៈការកែប្រែខ្លឹមសារកម្មវិធីថ្មីនេះ ក្រុមចលនាហាម៉ាសប្រហែលចង់អោយអាមេរិកនិងអឺរ៉ុបពិចារណារឿងនេះឡើងវិញ។ លោកខាលេត មេកស្ហាអាល់ Khaled Meshaal ជាប្រធានចលនាហាម៉ាសប្រាប់ថា ហាម៉ាសសង្ឃឹមថាបណ្តាប្រទេសអឺរ៉ុបអាចប្តូរជំហរទាក់ទងហាម៉ាស។
ប្រតិកម្មរបស់ចលនាហ្វាតា និងអ៊ីស្រាអែល
ក្រោយក្រុមហាម៉ាសប្រកាសការកែប្រែកម្មវិធីថ្មីនេះ អ្នកនាំពាក្យចលនាហ្វាតាដែលគ្រប់គ្រងរដ្ឋអំណាចប៉ាឡេស្ទីនបានបញ្ចេញប្រតិកម្មថា ទំរាំក្រុមហាម៉ាសប្រកាន់ជំហរដូចក្រុមហ្វាតា គឺគេត្រូវរង់ចាំដល់ទៅ៣ទស្សវត្ស។ ចលនាហ្វាតាទាមទារអោយហាម៉ាសធ្វើការសូមទោស ចំពោះការដែលហាម៉ាសបានចោទថា ហ្វាតាធ្វើទង្វើក្បត់៣០ឆ្នាំមកនេះ។
ហាម៉ាសគ្រប់គ្រងហ្កហ្សា១០ឆ្នាំហើយ។ កន្លងមក ក្រុមហាម៉ាសចោទរដ្ឋអំណាចប៉ាឡេស្ទីនដែលដឹកនាំដោយក្រុមហ្វាតា ថាលែងចាប់អារម្មណ៍ពីហ្កាហ្សាទៀត។ ហាម៉ាសបានតែងតាំងគណៈកម្មកាធិការរដ្ឋបាលមួយដើម្បីគ្រប់គ្រងសកម្មភាពរបស់ក្រសួងផ្សេងៗនៅហ្កាហ្សា។ រដ្ឋអំណាចប៉ាឡេស្ទីនខឹងនឹងហាម៉ាស បានប្រាប់អ៊ីស្រាអែលអោយលែងផ្តល់អគ្គិសនីទៅហ្កាហ្សាទៀត។ បើហាម៉ាសចង់ផ្សះផ្សា និងមានវត្តមានក្នុងការចរចាអន្តរជាតិ ដោះស្រាយជម្លោះអ៊ីស្រាអែល-ប៉ាឡេស្ទីននឹងគេដែរនោះ ហាម៉ាស ត្រូវតែបន្ទន់ជំហរ សូមទោសចលនាហ្វាតាហើយមើលទៅ។
ខាងអ៊ីស្រាអែលពិបាកនឹងជឿក្រុមហាម៉ាសណាស់។ អ៊ីស្រាអែលប្រតិកម្មថា ក្រុមហាម៉ាសកំពុងសើចចំអកមនុស្សគ្រប់គ្នា ព្រោះក្រុមហាម៉ាសនៅតែបន្តធ្វើសកម្មភាពបាញ់មីស៊ីលប្រឆាំងអ៊ីស្រាអែល។
តាមរយៈការកែប្រែកម្មវិធីនយោបាយថ្មី ក្រុមហាម៉ាសកំពុងចង់ខិតទៅរកប្រទេសអារ៉ាប់ក្នុងតំបន់ ពិសេសអេហ្ស៊ីប
គេមើលឃើញថា ការបើកចំហររបស់ក្រុមហាម៉ាស តាមរយៈការកែប្រែកម្មវិធីនយោបាយ អោយទូលាយជាងមុន ក្រុមហាម៉ាសចង់ខិតទៅរកប្រទេសអារ៉ាប់ក្នុងតំបន់ ដើម្បីកុំអោយក្រុមខ្លួននៅឯកាខ្លាំងពេក ក្នុងឆាកអន្តរជាតិ។ សព្វថ្ងៃ មានតែប្រទេសកាតា និងតួកគីទេ ដែលនៅបន្តគាំទ្រហាម៉ាស។ ហាម៉ាសលែងមានទំនាក់ទំនងជាមួយស៊ីរី រឺក៏អ៊ីរ៉ង់ទៀតហើយ។ និយាយពីទំនាក់ទំនងជាមួយអេហ្ស៊ីបវិញ គឺមិនល្អតែម្តង តាំងពីក្រុមភាតរអ៊ីស្លាមបាត់បង់អំណាច និងក្លាយជាសត្រូវរបស់រដ្ឋាភិបាលថ្មីនៅអេហ្ស៊ីប។
ក្រុមហាម៉ាសមានដើមកំណើតមកពីចលនាភាតរអ៊ីស្លាម។ ដើម្បីខិតទៅរកអេហ្ស៊ីប ក្រុមហាម៉ាសត្រូវតែដើរអោយឆ្ងាយពីក្រុមភាតរអ៊ីស្លាម។ ក្នុងខ្លឹមសារកម្មវិធីនយោបាយកែប្រែថ្មី ក្រុមហាម៉ាសបានបង្ហាញជំហរឃ្លាតឆ្ងាយ មិនពាក់ព័ន្ធក្រុមភាតរអ៊ីស្លាមនៅអេហ្ស៊ីប។ ក្រុមហាម៉ាសលើកឡើងថា ហាម៉ាសមិនជំទាស់រាល់អន្តរាគមន័៍ក្នុងកិច្ចការផ្ទៃក្នុងរបស់ប្រទេសផ្សេងទេ។ ក្រុមហាម៉ាសចង់ប្រាប់អេហ្ស៊ីបដោយប្រយោលថា ហាម៉ាសមិនលូកដៃក្នុងកិច្ចការរដ្ឋាភិបាលអេហ្ស៊ីបទេ អេហ្ស៊ីបចង់ដាក់ទោសក្រុមភាតរអ៊ីស្លាមយ៉ាងម៉េចក៏ដោយចុះ។
សូមបញ្ជាក់ថា អេហ្ស៊ីបគាំទ្រប៉ាឡេស្ទីន។ ដើម្បីប៉ាឡេស្ទីន ក្នុងប្រវត្តិសាស្ត្រ អេហ្ស៊ីបនិងប្រទេសអារ៉ាប់ធ្លាប់ធ្វើសង្គ្រាមច្រើនដងហើយ ប្រឆាំងអ៊ីស្រាអែល។ ជាទូទៅ ប្រជាជនប៉ាឡេស្ទីនត្រូវការអេហ្ស៊ីបណាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ