លោកហ៊ុន សែន គ្រោងលើកបញ្ហាសង្គ្រាមខ្មែរថៃនៅកិច្ចប្រជុំកំពូលអាស៊ានលើកក្រោយ
លោកនាយករដ្ឋមន្ត្រីខ្មែរ ហ៊ុន សែន នឹងលើកយកបញ្ហាផ្ទុះអាវុធរវាងកងទ័ពកម្ពុជា-ថៃនៅក្នុងកិច្ចប្រជុំ កំពូលអាស៊ានលើកក្រោយនេះ ប្រសិនបើការពិភាក្សារវាងរដ្ឋមន្ត្រីការបរទេសកម្ពុជា និងថៃនៅពេលខាងមុខត្រូវបរាជ័យនោះ។ កិច្ចប្រជុំកំពូលអាស៊ាននឹងត្រូវរៀបចំនៅក្នុងប្រទេសឥណ្ឌូណេស៊ីដែល ជាប្រធានវិលជុំក្នុងពេលបច្ចុប្បន្ន។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ លាង ដឺលុច ពីទីក្រុងភ្នំពេញ
ថ្វីដ្បិតកាលបរិច្ឆេទនៃកិច្ចប្រជុំកំពូលអាស៊ានដែលត្រូវរៀបចំដោយឥណ្ឌូណេស៊ីនៅមិនទាន់ប្រកាសអោយដឹងក៏ដោយ ក៏ប៉ុន្តែរបៀបវារៈមួយនៃកិច្ចពិភាក្សាក្នុងកិច្ចប្រជុំកំពូលនោះត្រូវបានប្រកាសដោយលោកនាយករដ្ឋមន្ត្រី ហ៊ុន សែន រួចហើយ។ លោក ហ៊ុន សែន បានប្រកាសនៅថ្ងៃនេះថា លោកនឹងលើកយកបញ្ហាផ្ទុះអាវុធរវាងកម្ពុជាថៃ នៅក្នុងខែកុម្ភៈ កន្លងទៅ នោះ ដាក់លើតុនៃកិច្ចប្រជុំកំពូលអាស៊ានលើកក្រោយនេះ ប្រសិនបើកិច្ចពិភាក្សារវាងរដ្ឋមន្ត្រីការបរទេសកម្ពុជា និងថៃត្រូវបរាជ័យ។
យោងតាមការអញ្ជើញ និងការរៀបចំរបស់រដ្ឋមន្ត្រីការបរទេសឥណ្ឌូណេស៊ី ក្នុងនាមជាប្រធានអាស៊ាននោះ ឥណ្ឌូណេស៊ីបានកំណត់ពេលវេលានៃកិច្ចប្រជុំសាជាថ្មី សម្រាប់ការដោះស្រាយវិបត្តិព្រំដែនកម្ពុជាថៃ នៅថ្ងៃទី៧-៨ខែមេសា ក្នុងក្របខ័ណ្ឌនៃកិច្ចប្រជុំគណៈកម្មការព្រំដែនទូទៅ និងកិច្ចប្រជុំគណៈកម្មការចម្រុះខណ្ឌសីមាព្រំដែនគោកនៅក្នុងទីក្រុងបូហ្គោប្រទេសឥណ្ឌូណេស៊ី។ ទន្ទឹមគ្នានេះផងដែរ រដ្ឋមន្ត្រីការបរទេសឥណ្ឌូណេស៊ីក៏បានស្នើរៀបចំកិច្ចប្រជុំក្រៅផ្លូវការរវាងរដ្ឋមន្ត្រីការបរទេសកម្ពុជាថៃផងដែរ ដែលគោលដៅគឺសំដៅដោះស្រាយបញ្ហាព្រំដែនកម្ពុជាថៃដូចគ្នា។
សេចក្តីថ្លែងរបស់លោកនាយករដ្ឋមន្ត្រី ហ៊ុន សែន នៅថ្ងៃនេះ ដែលគ្រោងលើកយកបញ្ហាសង្គ្រាមឈ្លានពានរបស់ថៃដាក់លើតុអាស៊ាន អាចជាការព្រមានទុកជាមុនចំពោះរដ្ឋាភិបាលក្រុងបាងកក ខណៈពេលដែលក្រុងបាងកកកំពុងតែខ្លាច មិនចង់អោយជម្លោះកម្ពុជាត្រូវបានផ្សព្វផ្សាយជាអន្តរជាតិ ក្នុងក្របខ័ណ្ឌអាស៊ានក្តី និងអង្គការសហប្រជាជាតិក្តី។
នៅពេលដែលទីក្រុងបាងកកនៅតែទន្ទេញជាប់មាត់ថាចង់ដោះស្រាយជម្លោះដោយទ្វេភាគីជាមួយកម្ពុជា នៅលើសង្វៀនថៃ ឬកម្ពុជាក៏បាននោះ លោក ហ៊ុន សែន កាលពីព្រឹកមិញនេះក៏បានឆ្លើយតបសាជាថ្មីម្តងទៀត ថាកម្ពុជានឹងមិនផ្លាស់ប្តូរជំហរនោះឡើយ។ ពោលគឺ ដោយមិនបំបាក់មុខក្រុមប្រឹក្សាសន្តិសុខអង្គការសហប្រជាជាតិ និងអាស៊ានដែលបានអន្តរាគមលូកដៃក្នុងសំណុំរឿងនេះហើយនោះ ការដោះស្រាយជម្លោះកម្ពុជា-ថៃ ត្រូវតែប្រព្រឹត្តទៅលើប្រទេសទី៣៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ