លោកនាយករដ្ឋមន្ត្រី ហ៊ុន សែន ជំរុញឲ្យថៃប្រញាប់ឆ្លើយតបចំពោះសំណើអាស៊ាន
នៅថ្ងៃព្រហស្បតិ៍នេះ លោកនាយករដ្ឋមន្ត្រី ហ៊ុន សែន បានជំរុញទៅកាន់សមភាគីថៃ ឲ្យឆ្លើយតបជាប្រញាប់ ចំពោះលិខិតរបស់រដ្ឋមន្ត្រីការបរទេសអាស៊ាន ដែលបានដើរតួជាអ្នកសម្របសម្រួលស្វែងរកដំណោះស្រាយលើជម្លោះព្រំដែន កម្ពុជា-ថៃ។ នោះគឺការកោះប្រជុំគណៈកម្មការព្រំដែន នៅថ្ងៃទី២៤ និងថ្ងៃទី២៥មីនា ព្រមទាំងការកំណត់ទីតាំង និងលក្ខខណ្ឌ សម្រាប់ក្រុមអ្នកសង្កេតការណ៍ឥណ្ឌូនេស៊ី មកត្រួតពិនិត្យបទឈប់បាញ់ នៅព្រំដែនជម្លោះកម្ពុជា-ថៃ ជិតប្រាសាទព្រះវិហារ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ លី ម៉េងហួរ ពីទីក្រុងភ្នំពេញ
ជាសេចក្តីអំពាវនាវ ដែលលោកនាយករដ្ឋមន្ត្រី ហ៊ុន សែន បានជំរុញទៅកាន់សមភាគីថៃ ពិសេសលោកនាយករដ្ឋមន្ត្រី អាប់ភិស៊ីត វេចាជីវ៉ា ឲ្យប្រញាប់ប្រញាល់ឆ្លើយតប ចំពោះលិខិតកោះប្រជុំគណៈកម្មការព្រំដែនកម្ពុជា-ថៃ JBC និង GBC នៅប្រទេសឥណ្ឌូនេស៊ី នាថ្ងៃទី២៤ និងថ្ងៃទី២៥ មីនា ឆ្នាំ២០១១។ សំណើរបស់រដ្ឋមន្ត្រីការបរទេសឥណ្ឌូនេស៊ី ក្នុងនាមជាប្រធានអាស៊ាន ក៏ចង់ឲ្យថៃបញ្ជាក់ពីទីតាំង សម្រាប់ក្រុមអ្នកសង្កេតការណ៍ឥណ្ឌូនេស៊ី មកត្រួតពិនិត្យបទឈប់បាញ់ នៅព្រំដែនព្រះវិហារផងដែរ។
ក្នុងពិធីកាត់ឫសសីមា ក្នុងវត្តមួយ នៅខេត្តបាត់ដំបង ជាប់ព្រំដែនប្រទេសថៃ នៅព្រឹកមិញ លោកនាយករដ្ឋមន្ត្រី ហ៊ុន សែន បានលើកឡើងថា ការអំពាវនាវទៅកាន់សមភាគីថៃ ឲ្យប្រញាប់ឆ្លើយតប និងទទួលយកកិច្ចសម្របសម្រួលរបស់ឥណ្ឌូនេស៊ី ដើម្បីឈានទៅរកដំណោះស្រាយមួយ ចៀសវាងការបង្ហូរឈាម នៅព្រំដែនកម្ពុជា-ថៃ។
លោកនាយករដ្ឋមន្ត្រី ហ៊ុន សែន បានអំពាវនាវឲ្យនាយករដ្ឋមន្ត្រីថៃ អាប់ភិស៊ីត វេចាជីវ៉ាឆ្លើយតបទៅកាន់រដ្ឋមន្ត្រីការបរទេស ឲ្យបានលឿនជាទីបំផុត តាមដែលអាចធ្វើទៅបាន អំពីការប្រជុំ ឬមិនប្រជុំគណៈកម្មការចម្រុះព្រំដែនកម្ពុជា-ថៃ? ហើយថាតើឲ្យអ្នកសង្កេតការណ៍ឥណ្ឌូនេស៊ី មក ឬមិនមកត្រួតពិនិត្យតំបន់ព្រំដែនព្រះវិហារ។
ជាមួយនឹងសេចក្តីអំពាវនាវខាងលើ លោកប្រមុខរដ្ឋាភិបាល ហ៊ុន សែន ក៏បានលើកឡើងនូវខ្លឹមសារលិខិតរបស់រដ្ឋមន្ត្រីការបរទេសឥណ្ឌូនេស៊ី ផ្ញើទៅកាន់រដ្ឋមន្ត្រីការបទេសកម្ពុជា និងរដ្ឋមន្ត្រីការបរទេសថៃ ព្រមទាំងចម្លងជូនរដ្ឋមន្ត្រីការបរទេសអាស៊ានទាំងអស់ ជុំវិញសេចក្តីព្រាងក្របខ័ណ្ឌប្រណិប័តន៍ ស្តីពី ការពង្រាយអ្នកសង្កេតការណ៍ឥណ្ឌូនេស៊ី នៅព្រំដែនជម្លោះកម្ពុជា-ថៃ។
តាមលោកនាយករដ្ឋមន្ត្រី ខ្លឹមសារលិខិត ចុះថ្ងៃទី៨ មីនា ឆ្នាំ២០១១ របស់រដ្ឋមន្ត្រីការបរទេសឥណ្ឌូនេស៊ី ក្នុងនាមជាប្រធានអាស៊ាន ក៏បានដាស់តឿនថៃឲ្យពិចារណា ប្រកបដោយវិជ្ជមាន និងឆ្លើយតបជាបន្ទាន់។ លិខិតនោះ ក៏បានសួរថៃ ពីការមិនទាន់ឆ្លើយតប ទទួលយកការកោះប្រជុំគណៈកម្មការដោះស្រាយព្រំដែនកម្ពុជា-ថៃ ខណៈដែលរដ្ឋមន្ត្រីការបរទេសឥណ្ឌូនេស៊ី បានទទួលការយល់ព្រមពីកម្ពុជារួចហើយ។
យ៉ាងណាក៏ដោយ ការមិនទាន់ឆ្លើយតបរបស់ថៃ លើការស្វែងរកដោះស្រាយលើជម្លោះព្រំដែន ត្រូវបានលោកនាយករដ្ឋមន្ត្រី ហ៊ុន សែន គូសបញ្ជាក់ប្រាប់អន្តរជាតិថា អ្វីៗស្ថិតលើដីថៃទាំងអស់។ នោះគឺអ្នកសង្កេតការណ៍ឥណ្ឌូនេស៊ី មកត្រួតពិនិត្យបទឈប់បាញ់ បាន ឬមិនបាន គឺនៅលើថៃ។ រីឯកម្ពុជា ឆ្លើយតបភ្លាមៗ និងបាននាំទៅរកភាពធូរស្រាល តាមរយៈយន្តការត្រួតពិនិត្យមួយរបស់អាស៊ាន ដើម្បីចៀសវាងការប៉ះទង្គិច ដោយកម្លាំងប្រដាប់អាវុធ នៃប្រទេសកម្ពុជា-ថៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ