គណបក្សនយោបាយនៅអាស៊ី ថ្លែងការណ៍បារម្ភលើស្ថានភាពព្រំដែនកម្ពុជា-ថៃ
គណៈកម្មាធិការអចិន្ដ្រៃយ៍របស់សន្និសីទអន្ដរជាតិ នៃគណបក្សនយោបាយនៅអាស៊ី ហៅកាត់ជាភាសាអង់គ្លេសថា ICAPP បានសម្ដែងការព្រួយបារម្ភយ៉ាងខ្លាំង ចំពោះស្ថានភាពដែលបានកើតឡើងនៅព្រំដែនកម្ពុជា និងថៃ ពិសេសការប្រយុទ្ធគ្នាថ្មីៗនេះ។ ក្នុងកិច្ចប្រជុំ នៅទីក្រុងកូឡាឡាំពួរ ប្រទេសម៉ាឡេស៊ី កាលពីថ្ងៃ៥ឧសភាម្សិលមិញ ក្រុមគណបក្សនយោបាយនៅអាស៊ី បានអំពាវនាវឲ្យកម្ពុជា-ថៃ ដោះស្រាយបញ្ហាដោយសន្ដិវិធី និងជំរុញឱ្យភាគីទាំងពីរ គោរពនូវសន្ធិសញ្ញាអន្ដរជាតិ និងកតិកាសញ្ញានានា។ ក្រុមគណបក្សនយោបាយអាស៊ី ក៏បានអំពាវនាវឲ្យមេដឹកនាំកំពូលអាស៊ាន ដែលជួបប្រជុំគ្នានៅថ្ងៃសៅរ៍ និងថ្ងៃអាទិត្យនេះ ខិតខំរកដំណោះស្រាយលើជម្លោះព្រំដែនកម្ពុជា-ថៃ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៨
ICAPP ជាអង្គការតំណាងឱ្យគណបក្សភាគច្រើន នៃគណបក្សកាន់អំណាច គណបក្សប្រឆាំង និងគណបក្សឯករាជ្យ នៅតំបន់អាស៊ី ដែលរួមមានទាំងគណបក្សប្រជាជនកម្ពុជា និងគណបក្សនៅប្រទេសថៃ ជាសមាជិក។ កាលពីខែធ្នូ ចុងឆ្នាំមុន ICAPP បានបើកកិច្ចប្រជុំនៅភ្នំពេញ។ កាលណោះកម្ពុជាបានដឹកនាំគណៈប្រតិភូជាច្រើននាក់ ចុះទៅទស្សនាដោយផ្ទាល់នៅប្រាសាទព្រះវិហារ។
ដោយឡែកក្នុងកិច្ចប្រជុំ នៅទីក្រុងកូឡាឡាំពួរ ប្រទេសម៉ាឡេស៊ី នាថ្ងៃទី៥ ខែឧសភា ឆ្នាំ២០១១ គណបក្សនយោបាយនៅអាស៊ី ICAPP បានថ្លែងការណ៍ សម្ដែងការព្រួយបារម្ភ យ៉ាងខ្លាំង ចំពោះស្ថានភាពដែលបានកើតឡើង នៅព្រំដែនរវាងកម្ពុជា និងថៃ ពិសេសការពើបប្រយុទ្ធគ្នាថ្មីៗនេះ រួមទាំងការបាញ់ផ្លោងកាំភ្លើងធំទ្រង់ទ្រាយធំ ការប្រើគ្រាប់បែកចង្កោម និងការឈ្លានពានដោយទ័ពថ្មើរជើង។
ក្នុងសេចក្តីថ្លែងការណ៍ ដែលគណៈរដ្ឋមន្ត្រីរបស់រដ្ឋាភិបាលកម្ពុជា បានផ្សព្វផ្សាយ នៅថ្ងៃទី៦ឧសភានេះ បានបង្ហាញថា គណៈកម្មាធិការអចិន្ដ្រៃយ៍របស់ ICAPP បានប្រកាសគាំទ្រសេចក្ដីថ្លែងការណ៍របស់លោក បាន គីមូន អគ្គលេខាធិការអង្គការសហប្រជាជាតិ ដែលបានខិតខំជំរុញឱ្យប្រទេសកម្ពុជា និងថៃ ចាប់យកវិធានការបន្ទាន់ ដើម្បីឱ្យមានបទឈប់បាញ់គ្នាមួយប្រកបដោយប្រសិទ្ធិភាព និងដែលអាចត្រួតពិនិត្យបាន។
ក្នុងសេចក្តីថ្លែងការណ៍អង្គការ ICAPP ក៏បានជំរុញឱ្យភាគីកម្ពុជា-ថៃ បង្កើតឱ្យបាននូវបទឈប់បាញ់គ្នាជាអចិន្ដ្រៃយ៍មួយ និងដោះស្រាយបញ្ហាដោយសន្ដិវិធី តាមរយៈកិច្ចពិភាក្សានយោបាយប្រកបដោយប្រសិទ្ធិភាព។ គណៈកម្មាធិការអចិន្ដ្រៃយ៍របស់ ICAPP ក៏សូមស្វាគមគំនិតផ្ដួចផ្ដើមរបស់អាស៊ាន តាមរយៈឥណ្ឌូណេស៊ី ជាប្រធាន ដែលបានរៀបចំឱ្យមានកិច្ចពិភាក្សារវាងកម្ពុជានិងថៃ។
ICAPP ក៏បានជំរុញឱ្យភាគីកម្ពុជា និងថៃ គោរពនូវសន្ធិសញ្ញាអន្ដរជាតិ និងកតិកាសញ្ញានានា ដែលស្ថិតក្រោមច្បាប់អន្ដរជាតិ និងធម្មនុញ្ញរបស់អង្គការសហប្រជាជាតិ។
ជាចុងក្រោយ ក្រុមបណ្តាសមាជិកគណបក្សនយោបាយនៅអាស៊ី បានស្នើសុំឱ្យមេដឹកនាំទាំងឡាយរបស់អាស៊ាន ដែលនឹងជួបប្រជុំ នៅទីក្រុងហ្សាការតា ពីថ្ងៃទី៧ ដល់ថ្ងៃទី៨ ខែឧសភា ឆ្នាំ២០១១ ឱ្យប្រឹងអស់លទ្ធភាពក្នុងការដាក់បញ្ចូលបញ្ហាព្រំដែនកម្ពុជា-ថៃ ទៅក្នុងដំណើរការនៃកិច្ចប្រជុំកំពូលអាស៊ាន ដើម្បីឱ្យមានកិច្ចឈប់បាញ់គ្នាមួយប្រកបដោយប្រសិទ្ធិភាព និងដែលអាចត្រួតពិនិត្យបាន ដោយរាប់បញ្ចូលទាំងអ្នកសង្កេតការណ៍យោធាឥណ្ឌូណេស៊ី តាមការចាត់តាំងរបស់អាស៊ាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ