ជម្លោះកម្ពុជា ថៃ៖ រឿងអ្នកសង្កេតការណ៍ឥណ្ឌូណេស៊ី នៅព្រំដែន រឹតតែគ្មានពន្លឺ
នៅព្រឹកថ្ងៃសុក្រនេះ រដ្ឋមន្រ្តីការបរទេសឥណ្ឌូណេស៊ីបានជួបពិភាក្សាដាច់ដោយឡែកពីគ្នា ជាមួយរដ្ឋមន្រ្តីការបរទេសកម្ពុជា និងបន្ទាប់មកបានជួបជាមួយរដ្ឋមន្រ្តីការបរទេសថៃ ដើម្បីពិភាក្សាអំពីជម្លោះព្រំដែនកម្ពុជា-ថៃ។ បន្ទាប់ពីជំនួបនេះ លោកប្រមុខការទូតឥណ្ឌូណេស៊ី ដែលជាប្រធានអាស៊ានផងនោះ បានថ្លែងថា កម្ពុជា និងថៃ សុទ្ធតែបានព្រមព្រៀងលើលក្ខខណ្ឌប្រតិបត្តិ ស្តីពីការបញ្ជូនអ្នកសង្កេតការណ៍ឥណ្ឌូណេស៊ីទៅព្រំដែន ក៏ប៉ុន្តែ នៅមានលក្ខខណ្ឌមួយចំនួនទៀត ដែលត្រូវបំពេញ មុននឹងអ្នកសង្កេតការណ៍អាចដាក់ពង្រាយនៅព្រំដែនបាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៩:៤៧
ប្រសាសន៍របស់លោករដ្ឋមន្ត្រីក្រសួងការបរទេសឥណ្ឌូណេស៊ី ៖
“មកដល់ពេលនេះយើងបានឈានដល់កិច្ចព្រមព្រៀងមួយហើយ ស្តីពីលក្ខខណ្ឌប្រតិបត្តិនៃអ្នកសង្កេតការណ៍ឥណ្ឌូណេស៊ី នៅព្រំដែន។ និយាយឲ្យខ្លី ទាក់ទងនឹងលក្ខខណ្ឌប្រតិបត្តិ អ្វីៗត្រូវបានដោះស្រាយចប់សព្វគ្រប់អស់ហើយ។
បញ្ហាដែលនៅសេសសល់ គឺទាក់ទងនឹងលក្ខខណ្ឌមួយចំនួន ដែលត្រូវដោះស្រាយ មុននឹងអ្នកសង្កេតការណ៍ឥណ្ឌូណេស៊ីអាចដាក់ពង្រាយលើដីជាក់ស្តែងបាន។
អស់លោកបានដឹងស្រាប់ហើយថា ភាគីថៃមានជំហរផ្ទាល់របស់ថៃ អំពីលក្ខខណ្ឌដែលត្រូវបំពេញ មុននឹងអនុញ្ញាតឲ្យអ្នកសង្កេតការណ៍ទៅកាន់តំបន់ព្រំដែន។ ហើយភាគីកម្ពុជាក៏មានជំហរផ្ទាល់របស់កម្ពុជាដែរ។
សម្រាប់ឥណ្ឌូណេស៊ី ដែលជាប្រទេសត្រូវបញ្ជូនអ្នកសង្កេតការណ៍ យើងយល់ថា បញ្ហាដែលនៅសេសសល់នេះ គឺជាលក្ខខណ្ឌអនុវត្ត នៃការដាក់ពង្រាយអ្នកសង្កេតការណ៍។
ដូច្នេះ នៅថ្ងៃនេះ ហើយប្រហែលជានៅថ្ងៃស្អែកទៀត ខ្ញុំនឹងជជែកជាមួយរដ្ឋមន្រ្តីការបរទេសកម្ពុជា និងរដ្ឋមន្រ្តីការបរទេសថៃ ដើម្បីកំណត់ឲ្យបានច្បាស់ថា តើត្រូវមានលក្ខខណ្ឌអ្វីខ្លះ ដើម្បីឲ្យក្រុមអ្នកសង្កេតការណ៍អាចដាក់ពង្រាយនៅព្រំដែនបាន”។
លក្ខខណ្ឌ ដែលរដ្ឋមន្រ្តីឥណ្ឌូណេស៊ីបានលើកឡើងនេះ គឺគ្មានអ្វីក្រៅពីការទាមទាររបស់ថៃនោះទេ ដែលបានទាមទារឲ្យកម្ពុជាដកកងទ័ពចេញពីតំបន់ ៤.៦គីឡូម៉ែត្រ ជុំវិញប្រាសាទព្រះវិហារ។ ការទាមទារ ដែលលោករដ្ឋមន្រ្តីការបរទេសកម្ពុជា ហោ ណាំហុង បានច្រានចោលទាំងស្រុង នៅក្រោយជំនួបជាមួយរដ្ឋមន្រ្តីការបរទេសឥណ្ឌូណេស៊ី។
ប្រសាសន៍របស់លោក ហោ ណាំហុង
នៅក្នុងពេលប្រជុំថ្នាក់រដ្ឋមន្រ្តីការបរទេសអាស៊ាន លោកហោ ណាំហុងរដ្ឋមន្រ្តីការបរទេសកម្ពុជាក៏បានលើកឡើងផងដែរពីជម្លោះព្រំដែនជាមួយថៃ។ នៅក្នុងបទសម្ភាសន៍ក្រោយពីបិទបញ្ចប់កិច្ចប្រជុំ លោកហោ ណាំហុងបានបញ្ជាក់ថា លោកបានប្រាប់អង្គប្រជុំអាស៊ានថា ការដែលថៃដាក់លក្ខខណ្ឌដែលកម្ពុជាមិនអាចទទួលយកបាន គឺជាចេតនារបស់ថៃ ដែលចង់ច្រានចោលមិនចង់ឲ្យមានអ្នកសង្កេតការណ៍ឥណ្ឌូណេស៊ីនៅព្រំដែនកម្ពុជា ថៃ។
មួយវិញទៀត បើយោងតាមលោករដ្ឋមន្ត្រីការបរទេសកម្ពុជា នឹងអាចមានជំនួបត្រីភាគី ក្រៅផ្លូវការ រវាងរដ្ឋមន្ត្រីការបរទេសឥណ្ឌូណេស៊ី ថៃ និងកម្ពុជា អាចនឹងប្រព្រឹត្តទៅក្រោយពេលស្រស់ស្រូបអាហារពេលល្ងាចនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ