ព្រំដែន ៖ កម្ពុជាសង្ឃឹមថាតុលាការក្រុងឡាអេនឹងចាត់វិធានការបន្ទាន់
បន្ទាប់ពីបានយកលិខិតស្នើសុំឱ្យបកស្រាយសាលក្រមឆ្នាំ១៩៦២របស់ រាជរដ្ឋាភិបាលកម្ពុជាទៅដាក់នៅតុលាការយុត្តិធម៌អន្តរជាតិក្រុងឡាអេ កាលពីថ្ងៃទី២៨មេសារួចមក លោក ហោ ណាំហុង រដ្ឋមន្ត្រីការបរទេសកម្ពុជាបានវិលត្រឡប់មកដល់កម្ពុជាវិញហើយ នៅព្រឹកថ្ងៃទី៣០មេសានេះ។ លោកបានថ្លែងពីក្តីសង្ឃឹមថាតុលាការក្រុងឡាអេនឹងចាត់វិធានការជា បន្ទាន់ ដើម្បីបញ្ឈប់ការឈ្លានពាន និងបកស្រាយឱ្យច្បាស់ថា ផ្ទៃដី៤,៦គីឡូម៉ែត្រក្រឡាដែលថៃទាមទារជារបស់អ្នកណា? នៅឯព្រំដែនឯណោះវិញ ទាហានថៃនៅតែបន្តបំពានកិច្ចព្រមព្រៀងឈប់បាញ់ហើយបន្តផ្ទុះអាវុធ ទៀតកាលពីយប់និងព្រឹកមិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៥
ថ្លែងប្រាប់សន្និសីទកាសែតនៅឯព្រលានយន្តហោះអន្តរជាតិភ្នំពេញកាលពីព្រឹកមិញ លោកហោ ណាំហុង បានអះអាងថា លោកបានដាក់ពាក្យស្នើសុំឱ្យបកស្រាយសាលក្រមឆ្នាំ១៩៦២ទៅតុលាការក្រុងឡាអេរួចរាល់ហើយ។ ប្រមុខការទូតកម្ពុជាបានពន្យល់ថា កម្ពុជាបានស្នើសុំឱ្យតុលាការក្រុងឡាអេបកស្រាយសាលក្រមឆ្នាំ១៩៦២ ឡើងវិញដោយហេតុថា តុលាការអន្តរជាតិមួយនេះបានកាត់ឱ្យកម្ពុជាឈ្នះក្តីប្រទេសថៃក្នុងរឿងព្រះវិហារដោយយោងតាមផែនទីឧបសម្ព័ន្ធទី១។ ដូច្នេះកម្ពុជាសុំឱ្យតុលាការនេះបកស្រាយឡើងវិញនូវសាលក្រមនេះដើម្បីបញ្ជាក់ឱ្យច្បាស់ថា តើដីទំហំ ៤,៦ គ.ម ក្រឡាជាប់ប្រាសាទព្រះវិហារជារបស់អ្នកណា ?
លោក ហោ ណាំហុងពន្យល់ថា កម្ពុជាបានចរចាជាមួយថៃតាំងពីឆ្នាំ២០០៨មកអំពីបញ្ហាព្រំដែននេះ ប៉ុន្តែការចរចានោះគ្មានទទួលបានលទ្ធផលអ្វីទេ ពីព្រោះតែមេដឹកនាំថៃក្រឡេចក្រឡុចយ៉ាងខ្លាំង។ រដ្ឋមន្ត្រីការបរទេសកម្ពុជាបានសម្តែងការខកចិត្តយ៉ាងខ្លាំងថា កម្ពុជាពិតជាអភ័ព្វខ្លាំងណាស់ដែលមានប្រទេសជិតខាងមួយមានមេដឹកនាំក្រឡេចក្រឡុចមិនអាចយកជាការបាន។
ទន្ទឹមនឹងការបកស្រាយ សាលក្រមឆ្នាំ១៩៦២ឡើងវិញ កម្ពុជាក៏បានស្នើសុំឱ្យតុលាការឡាអេចាត់វិធានការបន្ទាន់ ដើម្បីការពារប្រាសាទ និងបញ្ឈប់ការផ្ទុះអាវុធផងដែរ ពីព្រោះថៃបានបំពានបទឈប់បាញ់ជាបន្តបន្ទាប់ សូម្បីតែកិច្ចព្រមព្រៀងដែលបានធ្វើរវាងមេទ័ពប្រទេសទាំងពីរយៈពេល២ថ្ងៃចុងក្រោយនេះ។ លោកហោ ណាំហុង សង្ឃឹមថា តុលាការឡាអេនឹងចាត់វិធានការបន្ទាន់ក្នុងពេលឆាប់ៗនេះ។ រីឯការបកស្រាយសាលក្រមឡើងវិញអាចនឹងប្រើពេលយូរបន្តិច ពីព្រោះ តុលាការត្រូវការពេលវេលាដើម្បីស្រាវជ្រាវឯកសារឡើងវិញ។
នៅឯតំបន់ជាយដែនខេត្តឧត្តរមានជ័យឯណោះ ទាហានថៃនៅតែបន្តបាញ់ផ្លោងចូលក្នុងទឹកដីកម្ពុជាដដែលកាលពីយប់និងព្រឹកមិញបើទោះបីជាមេទ័ពទាំងសងខាងបានចរចាគ្នាពីរលើក និងព្រមព្រៀងឈប់បាញ់គ្នាក៏ដោយ។ កិច្ចព្រមព្រៀងឈប់បាញ់ទាំងពីរលើកត្រូវបានបំពានជាបន្តបន្ទាប់នៅប៉ុន្មានម៉ោងក្រោយការចរចា។ លោកនាយករដ្ឋមន្ត្រីហ៊ុន សែនធ្លាប់បានហៅសមភាគីថៃថាជាមនុស្សដែលចុះហត្ថលេខានឹងដៃរួចហើយលុបវិញនឹងជើង។
លោក ហោ ណាំហុងក៏បានប្រាប់ឱ្យដឹងថា ចុងក្រោយនេះថៃបានស្នើចំណុចឈរជើងរបស់អ្នកសង្កេតការណ៍ឥណ្ឌូណេស៊ីចំនួន៤ចំណុចដែលក្នុងនោះមានមួយចំណុចស្ថិតក្នុងដីកម្ពុជា។ ក្រសួងការបរទេសកម្ពុជាកំពុងតវ៉ារឿងនេះទៅរដ្ឋមន្ត្រីការបរទេសឥណ្ឌូណេស៊ី។ ទាំងនេះជាភស្តុតាងដែលកម្ពុជាសម្រេចចិត្តដាក់ពាក្យស្នើទៅតុលាការក្រុងឡាអេឱ្យបកស្រាយសាលក្រមឆ្នាំ១៩៦២ឡើងវិញ និងចាត់វិធានការបន្ទាន់ប្រឆាំងការឈ្លានពានរបស់ថៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ