ប្រឈមនឹងការខ្វះទ័ព អ៊ុយក្រែនអនុម័តច្បាប់រើសទ័ពក្នុងចំណោមអ្នកទោសជាប់ពន្ធនាគារ
ទាល់តម្រិះ ខ្វះទ័ពនៅក្នុងសមរភូមិ សភាអ៊ុយក្រែនបានបោះឆ្នោតអនុម័តសេចក្តីព្រាងច្បាប់ថ្មីដែលអនុញ្ញាតបើកផ្លូវឲ្យគេរើសទ័ពនៅក្នុងចំណោមអ្នកទោស ជាប់ពន្ធនាគារ។ នៅចំពោះមុខសត្រូវដែលមានប្រៀបទាំងកម្លាំងទ័ព និងសព្វាវុធដូចជារុស្ស៊ី អ៊ុយក្រែនបានធ្វើវិសោធនកម្មច្បាប់ ដើម្បីអាចទ័ពបន្ថែម មុននឹងបោះឆ្នោតលើសេចក្តីព្រាងច្បាប់កាលពីថ្ងៃពុធទី ៨ ឧសភា ដើម្បីរើសទ័ពក្នុងពន្ធនាគារ។
ចុះផ្សាយនៅថ្ងៃ៖
ស្តាប់ - ០៣:៥៩
នៅក្នុងសង្រ្គាមឈ្លានពានរបស់រុស្ស៊ីជាង២ឆ្នាំមកនេះ អ៊ុយក្រែនឈានចូលដំណាក់កាលមួយ ខ្វះទាំងអាវុធ និងទាហានដើម្បីប្រយុទ្ធតស៊ូនឹងរុស្ស៊ី ដែលមានកម្លាំងខ្លាំងទាំងចំនួនទ័ព និងសព្វាវុធ។ នៅខែមេសាកន្លងទៅ អ៊ុយក្រែនបានអនុម័តច្បាប់ដ៏ចម្រូងចម្រាសដើម្បីសម្រួលដល់ការរើសទ័ព និងងាយដាក់ទោសអ្នកដែលរត់គេចវេសពីកាតព្វយោធា។ ច្បាប់ថ្មីនៅបានទម្លាក់អាយុ ចូលបម្រើកងទ័ព ពី២៧ មកនៅឆ្នាំ ២៥ឆ្នាំ នៅក្នុងគោលបំណងរើសបញ្ចូលទ័ពឲ្យបានច្រើនបំផុតដើម្បីទប់ទល់នឹងរុស្ស៊ី ប៉ុន្តែ ហាក់មិនសូវមានប្រសិទ្ធិភាព។
នៅដើមដំបូងនៃសង្រ្គាមឈ្លានពានរបស់រុស្ស៊ី ប្រជាជនអ៊ុយក្រែន ធ្លាប់ពុះកញ្ច្រោលដោយគំនិតស្នេហាជាតិ ការពារមាតុភូមិ ស្ម័គ្រចិត្ត ស្រុះគ្នាកាន់អាវុធ រហូតធ្វើឲ្យចំនួនទ័ពអ៊ុយក្រែនបានកើនឡើងយ៉ាងលឿនស្លេវ ពីជាង ២សែននាក់ (២៦០ ០០០) ទៅ ជាង៧សែននាក់។ ប៉ុន្តែ នៅជាង២ឆ្នាំនៃសង្រ្គាមវាយប្រហារយ៉ាងចាស់ដៃរបស់រុស្ស៊ី ដែលសម្លាប់ទាហានអ៊ុយក្រែន យ៉ាងហោច ជាង ៣ម៉ឺននាក់ (តាមការអះអាងរបស់ប្រធានាធិបតីអ៊ុយក្រែន និងជាង ៧ម៉ឺននាក់ និងរបួសជាង ១សែននាក់ តាមកាសែតអាមេរិក ) បានធ្វើឲ្យប្រជាជនអ៊ុយក្រែនលែងមានទឹកចិត្តចង់ចូលបម្រើទ័ព។ ហេតុផលទី១ គឺអំពើពុករលួយ ទី២ គឺភាពមិនច្បាស់លាស់របស់ច្បាប់ថ្មី ដែលមិនបានបញ្ជាក់ពីរយៈពេល ដែលគេត្រូវឈរនៅជួរមុខក្នុងសមរភូមិ។ ទាហានអ៊ុយក្រែនភាគច្រើន ប្រយុទ្ធជាប់រហូតនៅក្នុងសង្រ្គាមជាង២ឆ្នាំមកនេះ ហត់នឿយខ្លាំង គ្មានពេលឈប់សម្រាក ត្រលប់មកលេងគ្រួសារ ដោយសារតែគ្មានទ័ពថ្មីមកជំនួស។
ជួបការលំបាកក្នុងការរើសទ័ពក្នុងចំណោមប្រជាជនអ៊ុយក្រែនជាទូទៅ សភាអ៊ុយក្រែន នៅថ្ងៃពុធកន្លងទៅ បានអនុម័តសេចក្តីព្រាងច្បាប់ថ្មី ដែលអនុញ្ញាតឲ្យគេរើសទ័ពនៅតាមពន្ធនាគារ។
អ៊ុយក្រែនកំពុងដើរតាមផ្លូវរបស់រុស្ស៊ី នៅពេលក្រុមហ៊ុនទាហានស៊ីឈ្នួលរុស្ស៊ី វ៉ាក់ណែរ បានរើសទ័ពនៅក្នុងចំណោមអ្នកទោសរុស្ស៊ី ដើម្បីយកទៅប្រយុទ្ធក្នុងសមរភូមិក្តៅ។ កាលណោះ ក្រុមហ៊ុនវ៉ាក់ណែរបានរងការរិះគន់ខ្លាំងក្នុងចំណោមប្រជាជនរុស្ស៊ីផ្ទាល់តែម្តង ក្នុងហេតុផលថា គេផ្តល់សេរីភាព និងលាភសក្តារៈដល់អ្នកទោស ដែលតាមធ្លាប់ប្រព្រឹត្តបទឧក្រិដ្ឋធ្ងន់ធ្ងរ ដូចជាសម្លាប់មនុស្សជាដើម។
នៅអ៊ុយក្រែនឯណោះវិញ ដើម្បីជៀសវាង បង្ការពាក្យរិះគន់ សេចក្តីព្រាងច្បាប់ថ្មីរបស់អ៊ុយក្រែនសំដៅរើសអ្នកទោសទាំងឡាយណាដែលជិតរួចទោស និងដោយឈរលើការស្ម័គ្រចិត្ត។ បើតាមការពន្យល់របស់អ្នកតំណាងរាស្រ្តអ៊ុយក្រែន លោកស្រី Chouliak មានតែអ្នកទោសដែលនៅសល់ការអនុវត្តទោសក្រោម៣ឆ្នាំ ប៉ុណ្ណោះដែលអាចចូលបម្រើទ័ព នោះបើសិនពួកគេស្ម័គ្រចិត្ត មានកាយសម្បទារគ្រប់គ្រាន់ និងមានការយល់ព្រមព្រៀងពីក្រសួងការពារជាតិ។
ក្រៅពីនោះ អ្នកទោសដែលធ្លាប់ប្រព្រឹត្តឧក្រិដ្ឋកម្មធ្ងន់ធ្ងរ សម្លាប់មនុស្សចាប់ពី ២នាក់ឡើងទៅ ប្រព្រឹត្តអំពើហិង្សាផ្លូវភេទ ប្រព្រឹត្តអំពើពុករលួយ ឬរំលោភច្បាប់សន្តិសុខជាតិជាដើម នឹងត្រូវរួចផុតពីកំណែនទ័ពអ៊ុយក្រែន។
បើតាមការពន្យល់របស់អ្នកតំណាងរាស្រ្តដែលជាអ្នកស្នើច្បាប់ខាងលើ អ្នកទោសដែលស្ម័គ្រចិត្តចូលបម្រើទ័ព នឹងទទួលបានមកវិញ សិទ្ធិសេរីភាព ដូចជាការដោះលែងជាមួយលក្ខខណ្ឌ ហើយនិងត្រូវបញ្ចូលក្នុងកម្លាំងទ័ពពិសេសរបស់អ៊ុយក្រែន។ ប៉ុន្តែ អង្គការការពារអ្នកទោសអ៊ុយក្រែនវិញ វាយតម្លៃថា សេចក្តីច្បាប់ថ្មីមានលក្ខណៈរើសអើង ព្រោះថា មិនបានចែងច្បាស់ពីពេលវេលាឲ្យអ្នកទោសទាំងនោះបានឈប់សម្រាកទាល់សោះ។ ប្រធានអង្គការការពារអ្នកទោសអ៊ុយក្រែនព្រួយបារម្ភថា អ្នកទោសទាំងនោះនឹងត្រូវប្រយុទ្ធរហូតដល់ថ្ងៃចប់សង្រ្គាម ដែលមិនខុសអ្វីពីការជាប់ទោសដ៏យូរអង្វែង គ្មានថ្ងៃចេញនោះទេ។ មួយវិញ គេខ្លាចថា អ្នកទោសអ៊ុយក្រែនអាចមានវាសនាអាក្រក់ដូចអ្នកទោសរុស្ស៊ីដែលក្រុមវ៉ាក់ណែរយកទៅដាក់នៅជួរមុខ ដើម្បីរាំងគ្រាប់ ពាំងការពារទាហានរុស្ស៊ី នៅក្នុងសមរភូមិប្រយុទ្ធ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ