អគ្គនាយិកាមូលនិធិរូបិយវត្ថុអន្តរជាតិត្រូវតុលាការពិសេសបារាំងកោះហៅ
លោកស្រីChristine Lagarde អគ្គនាយិការមូលនិធិរូបិយវត្ថុអន្តរជាតិ FMI ត្រូវបានតុលាការយុត្តិធម៌បារាំង (La Cour de Justice de la République) ចេញដីកាកោះ ហៅមកសាកសួរជុំវិញរឿងចម្រូងចម្រាស់មួយដែលលោកស្រីធ្លាប់អន្តរាគម រហូតធ្វើឲ្យរដ្ឋបារាំងខាត បង់លុយ ៤០០លានអឺរ៉ូទៅអ្នកជំនួញបារាំងម្នាក់ឈ្មោះ Bernard Tapis។
ចុះផ្សាយនៅថ្ងៃ៖
ស្តាប់ - ០៣:២៦
នៅក្រោយសវនការរយៈពេល ១២ម៉ោង កាលពីថ្ងៃព្រហស្បតិ៍ ម្សិលមិញ លោកស្រី Christine Lagarde ប្រធានអគ្គនាយិកាFMI ត្រូវគេកោះហៅ នៅព្រឹកថ្ងៃសុក្រនេះម្តងទៀត នៅ តុលាការយុត្តិធម៌បារាំងក្នុងក្រុងប៉ារីស។ តុលាការយុត្តិធម៌បារំាង នេះជាជាតុលាការពិសេស ដែលបង្កើតឡើងនៅឆ្នាំ ១៩៩៣ មាននាទីជំនុំជម្រះលើអតីតមេដឹក ឬរដ្ឋមន្រ្តី ដែលធ្លាប់ប្រព្រឹត្តបទល្មើស ឬធ្វើការងារមិនត្រឹមត្រូវ នៅក្នុងតំណែងរបស់ខ្លួន។
ក្នុងករណីរបស់លោកស្រី Christine Lagarde តុលាការពិសេសចង់ដឹងពីមូលហេតុដែលធ្វើឲ្យលោកស្រី Christine Lagarde ក្នុងពេលលោកស្រីធ្វើជារដ្ឋមន្រ្តីសេដ្ឋកិច្ច ក្នុងអាណត្តិប្រធានាធិបតីមុន ហ៊ានសម្រេចចិត្ត ជ្រើសរើសក្រុមប្រឹក្សាអាជ្ញាកណ្តាល ដើម្បីដោះស្រាយជម្លោះរវាងមហាសេដ្ឋី Bernad Tapie និងធនាគាររដ្ឋបារាំង Le Credit lionais។
គួររំលឹកថា ធនាគាររដ្ឋបារាំងត្រូវបានលោកBernard Tapie ប្តឹងទាមទារជម្ងឺចិត្ត តាំងពីឆ្នាំ ១៩៩៣ ក្នុងរឿងទិញក្រុមហ៊ុនAdidas របស់គាត់ ក្នុងតម្លៃបោកប្រាស់។ បណ្តឹងក្តីក្តាំបានបន្តរហូតមក ដោយមិនអាចដោះស្រាយបាននៅតុលាការដំបូង ឬតុលាការឧទ្ធរណ៍បារាំង។
ប៉ុន្តែ នៅពេលចូលកាន់តំណែងជារដ្ឋមន្រ្តីសេដ្ឋកិច្ច ក្នុងអាណត្តិលោកប្រធានាធិបតីNicolas Sarkozy ពីឆ្នាំ ២០០៧ ដល់ឆ្នាំ ២០១១ លោកស្រី Christine Lagardeបានចូលអារកាត់ ឲ្យគេដោះស្រាយជម្លោះនេះ នៅត្រឹមក្រុមប្រឹក្សាអាជ្ញាកណ្តាល ដែលមានតំណាងមកពីគូភាគីជម្លោះ។ អ្វីដែលគេចង់បន្ទោសលោកស្រី Christine Lagarde ក្នុងរឿងនេះ គឺលោកស្រី បានធ្វើការសម្រេចចិត្ត ជាឯកជន ដោយមិនបានសុំយោបល់ពីប្រមុខរដ្ឋាភិបាល ក្នុងពេលដែលរឿងជម្លោះនោះមានស្ថាប័នរដ្ឋជាប់ពាក់ពន្ធ និងរងគ្រោះខាតបង់លុយ។
មួយវិញទៀត គេបន្ទោសលោកស្រីដែលប្រគល់កិច្ចការចម្រូងចម្រាស់នេះទៅឲ្យក្រុមប្រឹក្សាអាជ្ញាកណ្តាលមួយដែលមានជំហរលំអៀង ជាអ្នកធ្វើ។ សេចក្តីសម្រេចរបស់ក្រុមប្រឹក្សាអាជ្ញាកណ្តាលដែលស្នើឡើងដោយលោកស្រី Christine Lagardeបានធ្វើឲ្យធនាគាររដ្ឋបារាំងខាតបង់លុយ ដោយត្រូវចេញសងថ្លៃខូចខាត និងជម្ងឺចិត្តដល់ទៅ ៤០០លានអឺរ៉ូ គឺទាំងដើម ទាំងការ ទៅឲ្យលោកBernard Tapie គឺច្រើនជាងការសម្រេចរបស់តុលាការដំបូងរបស់បារាំងទៅទៀត។
នៅចុងបញ្ចប់ គេបន្ទោសលោកស្រី Christine Lagardeថា បានផ្សំគំនិត ចូលរួមឲ្យគេកែខ្លឹមសារអត្ថបទច្បាប់ ដែលជាលទ្ធផល រដ្ឋបារាំងត្រូវចេញសងបន្ថែម ៤៥លានអឺរ៉ូទៀតទៅឲ្យគ្រួសារមហាសេដ្ឋីTapie។
រហូតមក លោកស្រី Christine Lagardeដែលបាននិយាយការពារខ្លួនថា លោកស្រីមិនបានអន្តរាគមក្នុងរឿងនេះ ដើម្បីប្រយោជន៍ផ្ទាល់ខ្លួនទេ ប៉ុន្តែ ដើម្បីបិទបញ្ចប់រឿងក្តីវែងអន្លាយ ដែលអាចនឹងធ្វើឲ្យរដ្ឋបារាំងខាតបង់កាន់តែច្រើន។ ទោះជាយ៉ាងណា គេមើលឃើញថា ការលូកដៃរបស់លោកស្រី Christine Lagardeក្នុងរឿងក្តីTapie ធ្វើឡើង ក្នុងពេលដែលលោកTapie កំពុងមានទំនាក់ទំនងជិតស្និទ្ធជាមួយ មេកើយ របស់លោកស្រី គឺNicolas Sarkozy លោកប្រធានាធិបតីបារាំង។
តើលោកស្រី Christine Lagarde អគ្គនាយិការបស់FMI ដែលកំពុងរួបរឹតដោយរឿងក្តីក្តាំ នៅតុលាការបារាំង អាចនឹងបាត់បង់តំណែងរបស់គាត់ដែរឬទេ? ពីទីក្រុងញូវយ៉ក ក្រុមប្រឹក្សាភិបាលIFM បានបញ្ជាក់ហើយថា លោកស្រី Christine Lagardeនឹងមិនត្រូវគេបណ្តេញចេញពីតំណែងជាប្រធានFMI ទេ បើទោះបីជាលោកស្រីត្រូវរងផ្តន្ទាទោសដោយតុលាការបារាំងក្តី។
ចំណែក រដ្ឋាភិបាលបារាំងបច្ចុប្បន្នមកពីគណបក្សសង្គមនិយម បានអះអាងថា គេនឹងសុំឲ្យលោកស្រី Christine LagardeលាលែងពីមុខតំណែងFMI ប្រសិនបើតុលាការរកឃើញថា លោកស្រីបានប្រព្រឹត្តកំហុសពិតមែន។ បទល្មើសក្នុងពេលបំពេញមុខងារ អាចធ្វើឲ្យលោកស្រី Christine Lagardeទទួលទោសជាប់ពន្ធនាគារ ១០ឆ្នាំ និងប្រាក់ពិន័យ១សែន៥ម៉ឺនអឺរ៉ូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ