ឥណ្ឌូណេស៊ី បញ្ជាក់ពីចំណុចឈរជើង សម្រាប់អ្នកសង្កេតការណ៍នៅព្រំដែនកម្ពុជា
អ្នកនាំពាក្យក្រសួងការបរទេសកម្ពុជា បានប្រកាសថា នៅថ្ងៃទី១២មេសា លោក ហោ ណាំហុង រដ្ឋមន្ត្រីការបរទេស បានទទួលលិខិតមួយច្បាប់ពីលោក ម៉ារទី ណាតាល់ឡេហ្គាវ៉ា (Marty Natalegawa) រដ្ឋមន្ត្រីការបរទេសឥណ្ឌូណេស៊ី ស្តីពីលក្ខខណ្ឌប្រតិបត្តិថ្មី សម្រាប់អ្នកសង្កេតការណ៍ឥណ្ឌូណេស៊ី នៅតាមព្រំដែនកម្ពុជា-ថៃ។ រដ្ឋមន្ត្រីការបរទេសឥណ្ឌូណេស៊ី បានលើកឡើងពីទីតាំង ៣ ចំណុច ដើម្បីដាក់អ្នកសង្កេតការណ៍ ឈរជើង ត្រួតពិនិត្យបទឈប់បាញ់ នៅព្រំដែនព្រះវិហារ។ កម្ពុជាបានទទួលយល់ព្រមភ្លាមៗ ដោយឥតលក្ខខណ្ឌ ខណៈដែលថៃ មិនទាន់ឆ្លើយតបអ្វីសោះ។
ចុះផ្សាយនៅថ្ងៃ៖
សេចក្តីរាយការណ៍របស់ លី ម៉េងហួរ ពីទីក្រុងភ្នំពេញ
សេចក្តីថ្លែងការណ៍របស់អ្នកនាំពាក្យក្រសួងការបរទេសកម្ពុជា ចុះថ្ងៃ១៣មេសា ឆ្នាំ២០១១ បានលើកឡើងថា លោក ម៉ារទី ណាតាល់ឡេហ្គាវ៉ា រដ្ឋមន្ត្រីបរទេសឥណ្ឌូណេស៊ី ដែលជាប្រធានអាស៊ាន បានស្នើឲ្យមានចំណុចឈរងសម្រាប់អ្នកង្កេតការណ៍ឥណ្ឌូណេស៊ី ចំនួន ៣ ទីតាំង គឺទី១-ចំណុច ៥ មករា ទី២-តាសឹម និងទី៣-ចាក់ច្រែង។
ទីតាំងទាំង៣ ចំណុចនៅតំបន់ព្រំដែន ជិតប្រាសាទព្រះវិហារ បានកើតមានការផ្ទុះអាវុធ ជាលក្ខណៈសង្គ្រាម ដែលបង្កឡើងដោយកងទ័ពថៃ កាលពីថ្ងៃទី៤ ដល់ថ្ងៃទី៧កុម្ភៈ។
អ្នកនាំពាក្យក្រសួងការបរទេស លោក កុយ គួង បានបញ្ជាក់ថា នៅថ្ងៃ១២មេសា ឆ្នាំ២០១១ ដដែលនោះ លោកប្រមុខការទូត ហោ ណាំហុង បានឆ្លើយតបវិញភ្លាមៗ ដោយយល់ព្រមទាំងស្រុង លើសេចក្តីព្រាងលក្ខខណ្ឌប្រតិបត្តិថ្មី សម្រាប់ដាក់អ្នកសង្កេតការណ៍ឥណ្ឌូណេស៊ី ដើម្បីចុះមកត្រួតពិនិត្យបទឈប់បាញ់ជាអចិន្ត្រៃយ៍នៅតំបន់ព្រំដែនព្រះវិហារ។
តាមអ្នកនាំពាក្យ ការឆ្លើយតបរបស់ប្រមុខការទូតកម្ពុជា ដោយឥតលក្ខខណ្ឌនេះ ជាសុឆន្ទៈថ្មីមួយទៀតរបស់កម្ពុជា ដោយឈរលើស្មារតីគោរពការឈប់បាញ់អចិន្ត្រៃយ៍ ដែលអាចនាំទៅដល់ការដោះស្រាយជម្លោះព្រំដែនកម្ពុជា-ថៃ ដោយសន្តិវិធី។
យ៉ាងណាក៏ដោយ លោករដ្ឋមន្ត្រីការបរទេសឥណ្ឌូណេស៊ី បានឆ្លើយតបលិខិតមកលោករដ្ឋមន្ត្រីការបរទេស ហោ ណាំហុង ដោយបញ្ជាក់ពីការពេញចិត្ត។ ប៉ុន្តែលោកប្រមុខការទូតឥណ្ឌូណេស៊ី ក្នុងនាមជាអ្នកសម្របសម្រួលដោះស្រាយជម្លោះព្រំដែនកម្ពុជា-ថៃ តាមយន្តការអាស៊ាន លើកឡើងក្នុងលិខិតទៅកាន់ប្រមុខការទូតកម្ពុជា និងថៃ ចុះថ្ងៃទី១៣កុម្ភៈថា មកដល់ពេលនេះ ឥណ្ឌូណេស៊ី នៅតែរង់ចាំចម្លើយពីភាគីថៃប៉ុណ្ណោះ ចំពោះការបញ្ជូនអ្នកសង្កេតការណ៍ ចុះមកកាន់ព្រំដែនជម្លោះ។
ប្រមុខការទូតកម្ពុជា ថៃ និងឥណ្ឌូណេស៊ី បានជួបគ្នាមួយភ្លែត នៅក្រៅកិច្ចប្រជុំអាស៊ាន ជប៉ុន កាលពីថ្ងៃទី៩មេសា ប៉ុន្តែមិនបាននិយាយដល់ការព្រមព្រៀងលើបញ្ជូនអ្នកសង្កេតការណ៍ឥណ្ឌូណេស៊ីឡើយ។ ថៃតែងតែគេចវេះ និងមិនចង់បានអ្នកសង្កេតការណ៍ទេ។
កាលពីពេលថ្មីៗនេះ រដ្ឋាភិបាលក្រុងបាងកក បានប្រកាសតាមកាសែតថា អ្នកសង្កេតការណ៍ឥណ្ឌូណេស៊ី ១៥ នាក់ ដែលត្រូវបញ្ជូនមកកាន់ព្រំដែនកម្ពុជា និង ១៥ នាក់ នៅខាងព្រំដែនថៃ ជិតប្រាសាទព្រះវិហារ ត្រូវតែជាជនស៊ីវិល មិនកាន់អាវុធ មិនពាក់ឯកសណ្ឋានយោធា និងមក ក្នុងនាមអ្នកការទូត។ ថៃក៏មិនអនុញ្ញាតឲ្យអ្នកសង្កេតការណ៍ ដែលត្រួតពិនិត្យលើបទឈប់បាញ់ ចូលក្នុងតំបន់ដី ដែលថៃហៅថា ៤,៦ គីឡូម៉ែត្រក្រឡា ជាប់ប្រាសាទព្រះវិហារឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ