សង្គ្រាមជំរុញអោយឥណ្ឌូណេស៊ីនិងកម្ពុជាចុះហត្ថលេខាលើការបញ្ជូនអ្នកសង្កេតការណ៍
ប្រធានអាស៊ាន គឺលោករដ្ឋមន្ត្រីការបរទេសឥណ្ឌូណេស៊ី នឹងមកជួបប្រមុខការទូតកម្ពុជា លោកហោ ណាំហុង នៅព្រឹកថ្ងៃចន្ទទី២៥ស្អែកនេះ ដើម្បីចុះហត្ថលេខាលើលក្ខខណ្ឌប្រតិបត្តិការងារនៃអ្នកសង្កេតការណ៍ឥណ្ឌូណេស៊ីនៅតាមព្រំដែន លើទឹកដីកម្ពុជា។ ការសម្រេចចុះហត្ថលេខារវាងប្រធានអាស៊ាន និងកម្ពុជាត្រូវធ្វើឡើងភ្លាម នៅពេលដែលកម្ពុជាកំពុងទប់ទល់នឹងការវាយប្រហាររបស់ទាហានថៃ នៅព្រំដែនប្រាសាទតាក្របី និងប្រជុំប្រាសាទតាមាន់នៅថ្ងៃអាទិត្យនេះទៀត។
ចុះផ្សាយនៅថ្ងៃ៖
ស្តាប់ - ០២:១៩
រដ្ឋមន្ត្រីការបរទេសឥណ្ឌូណេស៊ី លោក Marty Natalegawa ដែលជាប្រធានអាស៊ាន នឹងមករាជធានីភ្នំពេញ នៅព្រឹកថ្ងៃចន្ទទី២៥ស្អែកនេះ ដើម្បីជួបជាមួយលោកហោ ណាំហុង ប្រមុខការទូតកម្ពុជា។ អ្នកនាំពាក្យក្រសួងការបរទេសកម្ពុជា លោកកុយ គួង បានប្រាប់វិទ្យុបារាំងអន្តរជាតិ នៅថ្ងៃអាទិត្យនេះថា ប្រធានអាស៊ាន និងរដ្ឋមន្ត្រីការបរទេសកម្ពុជា នឹងចុះហត្ថលេខាជាមួយគ្នាលើលក្ខខណ្ឌការងារ នៃក្រុមអ្នកសង្កេតការណ៍ឥណ្ឌូណេស៊ី នៅលើព្រំដែនប្រាសាទព្រះវិហារ លើទឹកដីកម្ពុជា។
គម្រោងចុះហត្ថលេខា លើឯកសារស្តីពីប្រតិបត្តិការការងារអាចនឹងត្រូវធ្វើឡើងជាការប្រញាប់ នៅពេលដែលថៃមិនបានគោរពសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ និងការសម្រេចរបស់អាស៊ាន ហើយបានបញ្ជូនកងទ័ពវាយប្រហារមកលើកងទ័ពកម្ពុជានោះ។ កងទ័ពថៃបានចូលឈ្លានពាន វាយឆ្មក់លើកងទ័ពខ្មែរ នៅព្រំដែនប្រាសាទតាក្របី និងប្រជុំប្រាសាទតាមាន់ រយៈពេល៣ថ្ងៃជាប់គ្នាមកហើយ។
អ្នកនាំពាក្យក្រសួងការបរទេសកម្ពុជាបានបញ្ជាក់ថា ក្រោយពីការចុះហត្ថលេខាជាមួយកម្ពុជា ដោយភ្ជាប់ជាមួយនឹងការធ្វើសន្និសីទកាសែតផងនោះ លោករដ្ឋមន្ត្រីការបរទេសឥណ្ឌូណេស៊ី នឹងចេញដំណើរភា្លម ទៅជួបជាមួយលោកកាស៊ីត ភិរម្យ រដ្ឋមន្ត្រីការបរទេសថៃ ក្នុងទីក្រុងបាងកក។ បេសកកម្មរបស់ប្រមុខការទូតឥណ្ឌូណេស៊ីនៅពេលនេះ ត្រូវបានគេជឿថា ជាបេសកកម្មថ្មីមួយទៀត ដើម្បីធ្វើអន្តរាគមន៍បញ្ឈប់ការបាញ់គ្នាជាបន្ទាន់ រវាងកងទ័ពថៃ និងកម្ពុជា នៅព្រំដែន។ តាមពិត ឥណ្ឌូណេស៊ី ក្នុងនាមជាប្រធានអាស៊ាន បានចេញធ្វើអន្តរាគមន៍មួយជំហានធំរួចហើយ រហូតឈានដល់ការសម្រេចព្រមព្រៀងអោយមានបទឈប់បាញ់ជាអចិន្ត្រៃយ៍ រវាងកម្ពុជានិងថៃ កាលពីថ្ងៃទី២២កុម្ភៈ នៅទីក្រុងហ្សាការតា។
ក្រោយពីពេលនោះមក ឥណ្ឌូណេស៊ីបានធ្វើសេចក្តីព្រាងនៃបែបបទការងារជាហូរហែ សម្រាប់ការឈរជើងនៃអ្នកសង្កេតការណ៍ឥណ្ឌូណេស៊ី នៅលើទឹកដីកម្ពុជា ដែលក្នុងនោះក៏មានការកែប្រែខ្លឹមសារមួយចំនួនផង។ កម្ពុជាបានយល់ស្របលើរាល់សំណើរបស់ឥណ្ឌូណេស៊ី។ ចុងក្រោយនេះ បើគ្មានការប្រែប្រួលអ្វីទៀតនោះ កម្ពុជានឹងត្រូវទទួលយកអ្នកសង្កេតការណ៍ឥណ្ឌូណេស៊ីចំនួន១៥រូប ដែលត្រូវឈរជើងនៅសមរភូមិ៣កន្លែង គឺតាសឹម ចាក់ច្រែង និង តំបន់៥មករា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ