ប្រធានាធិបតីអាហ្វ្រិកខាងត្បូងមិនអាចរុញលោកកាដាហ្វីឲ្យចេញពីតំណែង
ក្នុងពេលដែលកងកម្លាំងអូតង់កំពុងបន្តសម្រុកទម្លាក់គ្រាប់បែកលើក្រុងទ្រីប៉ូលី ប្រធានាធិបតីប្រទេសអាហ្វ្រិកខាងត្បូង លោក ហ្សាកុប ហ្សូម៉ា (Jacob Zuma) បានអញ្ជើញទៅកាន់ទីក្រុងនេះ នៅថ្ងៃទី ចន្ទទី ៣០ ឧសភា ម្សិលមិញ ដើម្បីជួបចរចាជាមួយនឹងប្រមុខដឹកនាំលីប៊ី លោក កាដាហ្វី។ នេះជាលើកទីពីរហើយដែលប្រធានាធិបតីអាហ្វ្រិកខាងត្បូងធ្វើដំណើរទៅលីប៊ី ក្នុងនាមជាអន្តរការីរបស់សហភាពអាហ្វ្រិក ប៉ុន្តែលើកនេះក៏ដូចលើកមុន ការចរចាត្រូវជាប់គាំងដោយ លោក កាដាហ្វី មិនយល់ព្រមដើរចេញពីតំណែង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១៧
គឺនៅក្នុងដំណាក់ បាប អាល់អាហ្ស៊ីហ្ស៊ីយ៉ា នាទីក្រុងទ្រីប៉ូលី ដែល លោក កាដាហ្វ្រី បានបើកទ្វារទទួលប្រធានាធិបតីអាហ្វ្រិកខាងត្បូង លោក ហ្សាកុប ហ្សូម៉ា។ យប់មិញ រូបភាពប្រមុខដឹកនាំផ្តាច់ការ កាដាហ្វី បានលេចមុខជូបសាធារណជនជាថ្មី តាមរយៈកញ្ចក់ទូរទស្សន៍ជាតិលីប៊ី។
នៅក្នុងជំនួបរយៈពេលពីរម៉ោង អន្តរការីសហភាពអាហ្វ្រិកបានខិតខំសាកល្បងបញ្ចុះបញ្ចូលលោកកាដាហ្វី ឲ្យទទួលយកផែនទីចង្អុលផ្លូវមួយ ដែលផ្តោតទៅលើចំណុចគោលសំខាន់បី ៖ បទឈប់បាញ់ បើកច្រកទទួលជំនួយមនុស្សធម៌ និងបង្កើតដំណាក់កាលអន្តរកាល។
លោក ហ្សាកុប មិនបានធ្វើអត្ថាធិប្បាយអ្វីមួយម៉ាត់ក្រោយជំនួបនេះទេ លោកគ្រាន់តែលើកឡើងថា យុទ្ធនាការរបស់អង្គការអូតង់ បានបំផ្លាញកិច្ចការរបស់សហភាពអាហ្វ្រិកក្នុងការស្វែងរកសន្តិភាព។ បើតាមទីភ្នាក់ងារសារព័ត៌មានលីប៊ីវិញ ក្នុងពេលជំនួបនេះ ក្រុងទី្រប៉ូលីបានបរិហារថា អូតង់ បានរំលោភលើសេចក្តីសម្រេចចិត្តរបស់អង្គការសហប្រជាជាតិ និងបានទាមទារឲ្យសិក្សាឡើងវិញការអនុវត្តន៍សេចក្តីសម្រេចចិត្តនេះ។
ប៉ុន្តែឧបសគ្គចំបងបំផុត គឺលោក កាដាហ្វី បដិសេធមិនព្រមចុះចេញពីអំណាច។ ការទាមទារចុះចេញពីតំណែង ដែលជាលក្ខខណ្ឌរបស់ក្រុមអ្នកបះបោរ នៅបិនហ្កាហ្ស៊ី មុននឹងឈានដល់ការចរចា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ