សំណុំរឿងព្រះវិហារ ៖ បិទបញ្ចប់សវនាការតែមិនទាន់ចេញដីកា
សវនាការលើសំណុំរឿងព្រះវិហារ រយៈពេលពីរថ្ងៃមកនេះ ត្រូវបានបិទបញ្ចប់ហើយ កាលពីម្សិលមិញ។ ក៏ប៉ុន្តែ ចៅក្រមនៅមិនទាន់បានចេញសេចក្តីសម្រេចនៅឡើយទេ ដោយបានស្នើសុំឲ្យគូភាគីទាំងពីរ គឺកម្ពុជា និងថៃ ផ្តល់ព័ត៌មានបន្ថែមមួយចំនួនទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
សវនាការបានបិទបញ្ចប់ នៅម៉ោង ៦ និង១៥នាទីល្ងាច ថ្ងៃអង្គារ ៣១ ឧសភា ២០១១ (ត្រូវនឹងម៉ោង ១១ និង១៥នាទីយប់ ម៉ោងនៅកម្ពុជា)។
មុននឹងបិទបញ្ចប់សវនាការ ចៅក្រមម្នាក់ ជាជនជាតិប្រេស៊ីល បានស្នើឲ្យភាគីទាំងពីរ គឺកម្ពុជា និងថៃ ផ្តល់នូវព័ត៌មានលម្អិតទាក់ទងនឹងជនភៀសសឹកគេចពីការប៉ះទង្គិចដោយអាវុធតាមព្រំដែន ព្រោះ នៅក្នុងបណ្តឹងសុំចាត់វិធានការបន្ទាន់ គូភាគីបានលើកឡើងថា ការប៉ះទង្គិចដោយអាវុធ ចាប់តាំងពីថ្ងៃទី២២ មេសា ២០១១ នៅតំបន់ព្រះវិហារ និងនៅកន្លែងផ្សេងទៀតតាមបណ្តោយព្រំដែន បានបណ្តាលឲ្យមានអ្នកស្លាប់ របួស និងជនភៀសសឹក។ ចៅក្រមចង់ដឹងថា តើមានប្រជាជនប៉ុន្មាននាក់ដែលត្រូវជម្លៀសចេញពីតំបន់ព្រំដែន? តើពួកគេបានវិលត្រឡប់ទៅកាន់លំនៅដ្ឋានវិញដោយសុវត្ថិភាព និងដោយស្ម័គ្រចិត្តហើយឬនៅ? តើទីលំនៅរបស់ពួកគេស្ថិតនៅកន្លែងណាពិតប្រាកដ? តើពួកគេទៅតាំងទីលំនៅនៅទីនោះតាំងពីពេលណាមក? តើពួកគេរស់នៅប្រកបរបរអ្វី? តើនៅក្នុងតំបន់នោះមានដង់ស៊ីតេប្រជាជនប៉ុន្មាន?
គូភាគីត្រូវឆ្លើយនឹងសំណួរទាំងនេះ ជាលាយលក្ខណ៍អក្សរ ហើយបញ្ជូនទៅតុលាការយ៉ាងយូរបំផុតត្រឹមថ្ងៃទី ៧ មិថុនា ២០១១ ម៉ោង ៦ល្ងាច។ យោងតាមវិធានរបស់តុលាការ តុលាការនឹងបញ្ជូនចម្លើយរបស់ភាគីម្ខាង ទៅឲ្យភាគីម្ខាងទៀតបានដឹង ហើយអាចមានលទ្ធភាពធ្វើអត្ថាធិប្បាយតបនឹងចម្លើយទាំងនោះបាន។ អត្ថាធិប្បាយតបនេះ (បើសិនជាមាន) ត្រូវបញ្ជូនទៅឲ្យតុលាការវិញ យ៉ាងយូរបំផុតត្រឹមថ្ងៃទី១៤ មិថុនា ២០១១ ម៉ោង ៦ល្ងាច។
លោកចៅក្រមប្រធានអង្គជំនុំជម្រះបានប្រកាសថា សេចក្តីសម្រេច ស្តីពីវិធានការបន្ទាន់ នឹងត្រូវធ្វើឡើង នៅក្នុងពេលដ៏ឆាប់ខាងមុខ តាមដែលអាចធ្វើទៅបាន។ ការប្រកាសសេចក្តីសម្រេចនេះនឹងត្រូវធ្វើឡើងក្នុងអង្គសវនាការជាសាធារណៈ ទៅតាមកាលបរិច្ឆេទ ដែលតុលាការនឹងកំណត់នៅពេលក្រោយ។
បើមើលទៅលើកាលបរិច្ឆេទនៃការបញ្ជូនព័ត៌មានបន្ថែម គេអាចសន្និដ្ឋានបានថា សេចក្តីសម្រេចស្តីពីវិធានការបន្ទាន់នឹងមិនអាចធ្វើឡើងមុនថ្ងៃទី១៤ មិថុនា ២០១១បានទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ