គណបក្សសង្គ្រោះជាតិនៅតែដង្ហែក្បួន ទោះបីក្រសួងមហាផ្ទៃមិនអនុញ្ញាត
លោកឧបនាយករដ្ឋមន្ត្រី ស ខេង បានអនុញ្ញាតអោយគណបក្សសង្គ្រោះជាតិរៀបចំបាតុកម្ម ដូចការសម្រេចរបស់សាលារាជធានីភ្នំពេញដែរ ប៉ុន្តែមិនបានអនុញ្ញាតអោយដង្ហែក្បួនឡើយ។ នេះបើតាមការអះអាងរបស់អ្នកនាំពាក្យរបស់ក្រសួងមហាផ្ទៃ លោកឧត្តមសេនីយឯក ខៀវ សុភ័គ។ ប៉ុន្តែមន្ត្រីជាន់ខ្ពស់គណបក្សសង្គ្រោះជាតិបញ្ជាក់ថា គណបក្សនេះនឹងនៅតែដង្ហែក្បួនតាមការគ្រោងទុក។
ចុះផ្សាយនៅថ្ងៃ៖
ស្តាប់ - ០១:៥១
លោកឧបនាយករដ្ឋមន្ត្រី ស ខេង បានសម្រេច នៅព្រឹកថ្ងៃអង្គារនេះ មិនអនុញ្ញាតអោយគណបក្សសង្គ្រោះជាតិដង្ហែក្បួនបាតុកម្មរបស់ពួកគេឡើយ ប៉ុន្តែអនុញ្ញាតអោយពួកគេ ត្រឹមជួបជុំសម្តែងមតិនៅលើទីលានប្រជាធិបតេយ្យ។ នេះបើតាមការអះអាងរបស់អ្នកនាំពាក្យរបស់ក្រសួងមហាផ្ទៃ លោក លោកឧត្តមសេនីយឯក ខៀវ សុភ័គ។
គណបក្សសង្គ្រោះជាតិដែលកើតចេញពីការរួមគ្នារវាង គណបក្សសម រង្ស៊ី និងគណបក្សសិទ្ធិមនុស្សនោះ បានស្នើសុំធ្វើបាតុកម្មអហិង្សានៅថ្ងៃទី២៤ មេសា ដើម្បីដង្ហែក្បួនទាមទារអោយ គជប កែទម្រង់នីតិវិធីបោះឆ្នោតអោយមានឯករាជ្យភាព តម្លាភាព និងសុក្រិតភាព។
អ្នកនាំពាក្យរបស់ក្រសួងមហាផ្ទៃ លោកឧត្តមសេនីយឯក ខៀវ សុភ័គ បានប្រាប់វិទ្យុបារាំងអន្តរជាតិនៅថ្ងៃនេះថា ក្រសួងមហាផ្ទៃមិនអនុញ្ញាតអោយបាតុករដង្ហែក្បួន ដោយសារតែបញ្ហាចរាចរណ៍។
មន្ត្រីជាន់ខ្ពស់គណបក្សសង្គ្រោះជាតិធ្លាប់បានប្រកាសអោយដឹងថា មនុស្សប្រមាណ៤០០០នាក់នឹងចូលរួមក្នុងបាតុកម្មនេះ ហើយបានស្នើជួបជុំគ្នានៅលើទីលានប្រជាធិបតេយ្យ មុននឹងដង្ហែក្បួនទៅកាន់ទីស្នាក់ការកណ្តាលរបស់ គជប ដែលស្ថិតនៅក្នុងក្រសួងមហាផ្ទៃ។
បើទោះជារដ្ឋមន្ត្រីក្រសួងមហាផ្ទៃមិនអនុញ្ញាតអោយមានការដង្ហែក្បួនក៏ដោយ សមាជិកជាន់ខ្ពស់របស់គណបក្សសង្គ្រោះជាតិ និងជាអ្នកដឹកនាំក្បួនបាតុកម្មផង គឺលោក ហូ វ៉ាន់ បានបញ្ជាក់នៅថ្ងៃនេះហើយថា គណបក្សសង្គ្រោះជាតិនឹងនៅធ្វើតាមគម្រោងដដែល។ គម្រោងហែក្បួនដែលលោកនិងក្រុមការងារបាននិយាយព្រមព្រៀងគ្នាជាមួយអាជ្ញាធររាជធានីភ្នំពេញរួចហើយ។ លោក ហូ វ៉ាន់ ក៏មិនបានព្រួយបារម្ភអំពីលទ្ធភាពនៃការប៉ះទង្គិចគ្នារវាងបាតុករ និងក្រុមប៉ូលីសនៅថ្ងៃស្អែកដែរ។
គួររម្លឹកថា ក្រោយពីបានឃើញរបាយការណ៍របស់អង្គការ សង្កេតការណ៍បោះឆ្នោត Comfrel Nicfec NDI ស្តីពីការបាត់ឈ្មោះអ្នកបោះឆ្នោត គណបក្សសង្គ្រោះជាតិក៏ផ្តើមគំនិតរៀបចំបាតុកម្មទាមទារអោយ គជប រៀបចំបញ្ជីឈ្មោះអ្នកបោះឆ្នោតឡើងវិញ។ អង្គការខុមហ្វ្រែលបានប៉ាន់ស្មានទុកថា វានឹងអាចមានមនុស្សជាង១លាននាក់ ដែលអាចអាចមានបញ្ហារកឈ្មោះមិនឃើញ នៅក្នុងបញ្ជីឈ្មោះអ្នកបោះឆ្នោត។
យោងតាមរបាយការណ៍របស់គណៈកម្មាធិការជាតិរៀបចំការបោះឆ្នោត ចំនួនអ្នកបោះឆ្នោតសរុបមានជាង៩លាន៦សែននាក់ នៅក្នុងការការបោះឆ្នោតនីតិកាលទី៥ ថ្ងៃទី២៨ កក្កដា ខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ