កូរ៉េ​ខាង​ជើង​ត្រៀម​ធ្វើ​ការ​សាក​ល្បង​នុយក្លេអ៊ែរ​សា​ជា​ថ្មី

វិទ្យាស្ថានសិក្សាអាមេរិកនៃសកលវិទ្យាល័យ Johns Hopkins University បានវិភាគរូបភាព សាតឺលីត ថតបានចុងក្រោយនៅ ថ្ងៃទី ១៣ធ្នូ សន្និដ្ឋានថា ប្រទេសកូរ៉េខាងជើង ប្រហែលជាអាចនឹងសាកល្បងអាវុធនុយក្លេអ៊ែរ ក្នុងពីរសប្តាហ៍ខាងមុខនេះ ប្រសិនបើទឹកដែលមាន នៅក្នុងផ្លូវចូលនៃរូងដីខាងត្បូង មិនបង្កជាបញ្ហាចំបងដល់ដំណើរការនេះទេ។ ប៉ុន្តែ គេនៅមិនទាន់ដឹងថា តើក្រុងPyuongYang បានធើ្វការដោះស្រាយបញ្ហាទឹក នេះហើយរឺនៅ។

ទន្ទឹមគ្នានេះដែរ ក្រសួងការពារជាតិរបស់កូរ៉េខាងត្បូងបានរាយការណ៍ថា បានរើសប្រមូលបាននូវកំទេចចលករកាំជ្រួច ដែលបាញ់សាកល្បងដោយ កូរ៉េខាងជើងកាលពីថ្ងៃ ១២ធ្នូកន្លងមក។ កូរ៉េខាងត្បូងនឹងយកកំទេចទាំងនេះ ទៅធ្វើការវិភាគសិក្សាលើបច្ចេកទេសមីស៊ីលរបស់ ក្រុង Pyuong Yang។

បើសិនជា កូរ៉េខាងជើងសាកល្បងនុយក្លេអ៊ែរសាជាថ្មី ក្នុងពេលខាងមុខពិតមែន ការសាកល្បងនេះ គឺជាការសាកល្បងលើកទីបីហើយ។ ការសាកល្បង នុយក្លេអ៊ែរ របស់ក្រុង Pyuong Yang បានធ្វើឡើង ពីរលើករួចមកហើយ កាលពីខែ តុលា ឆ្នាំ ២០០៦ និង ខែ ឧសភា ឆ្នាំ២០០៩។ កាលពី ថ្ងៃ១២ធ្នូកន្លងមក កូរ៉េខាងជើងបានធ្វើការសាកល្បងបង្ហោះផ្កាយរណប ប្រកបដោយជោគជ័យ ធ្វើអោយសហរដ្ឋអាមេរិក និងប្រទេសសម្ព័ន្ធមិត្ត ព្រមទាំងក្រុមប្រឹក្សាសន្តិសុខអង្គការសហប្រជាជាតិ ថ្កោលទោសថា ជាការសាកល្បង មីស៊ីល បាលីស្ទីក គំរាមកំហែងដល់សន្តិភាពអន្តរទ្វីប។

លើសពីនេះ ប្រទេសលោកខាងលិច និងប្រទេសសម្ព័ន្ធមិត្តនៅអាស៊ី បានចោទក្រុងPyuong Yang ថាមានគ្រាប់បែកនុយក្លេអ៊ែរជាច្រើនគ្រាប់ ដែលអាចធ្វើពិសោធន៍ឈានទៅដល់ការដាក់អោយមាននៅអាវុធនុយក្លេអ៊ែរ។

ទោះជាយ៉ាងណាក្តី អ្នកជំនាញភាគច្រើនប្រមើលមើលថា កូរ៉េខាងជើងត្រូវការពេលវេលាច្រើនទៀត ដើម្បីសំរេចបាននូវអាវុធនុយក្លេអ៊ែរ ដែលអាចបាញ់បានក្នុងអន្តរទ្វីប៕