ក្រុមប្រឹក្សាសន្តិសុខថ្កោលទោសការបាញ់សាកល្បងរ៉ុកកែតរបស់កូរ៉េខាងជើង
ក្រុមប្រឹក្សាសន្តិសុខអ.ស.ប.បានចេញសេចក្តីថ្លែងការណ៍មួយ កាលពីយប់ថ្ងៃពុធ ម្សិលមិញ ថ្កោលទោសការបាញ់សាកល្បងរ៉ុកកែតដោយកូរ៉េខាងជើង។ ក៏ប៉ុន្តែ ចិននៅតែបន្ទជំទាស់មិនឲ្យក្រុមប្រឹក្សាសន្តិសុខដាក់ទណ្ឌកម្មលើរបបដឹកនាំក្រុងព្យុងយ៉ាង ដែលជាសម្ព័ន្ធមិត្តរបស់ខ្លួន។ ក្នុងពេលជាមួយគ្នានេះ រដ្ឋាភិបាលកូរ៉េខាងត្បូងបានបញ្ជាក់ទទួលស្គាល់ថា នៅពេលនេះ ផ្កាយរណបដែលបាញ់បង្ហោះដោយកូរ៉េខាងជើងកំពុងតែធ្វើដំណើរលើគន្លងតារាវិថីជាធម្មតា ដែលជាការបញ្ជាក់អំពីជោគជ័យរបស់កូរ៉េខាងជើង។
ចុះផ្សាយនៅថ្ងៃ៖
ស្តាប់ - ០១:៤៥
ក្រុមប្រឹក្សាសន្តិសុខអ.ស.ប.បានបើកកិច្ចប្រជុំបន្ទាន់ កាលពីម្សិលមិញ ភ្លាមៗ ក្រោយពីកូរ៉េខាងជើងបានធ្វើការបាញ់សាកល្បងរ៉ុកកែត ដោយអះអាងថាជាការបាញ់បង្ហោះផ្កាយរណប។ នៅក្រោយពីបញ្ចប់កិច្ចប្រជុំ ក្រុមប្រឹក្សាសន្តិសុខក៏បានចេញសេចក្តីថ្លែងការណ៍មួយថ្កោលទោសការបាញ់សាកល្បងរ៉ុកកែតរបស់កូរ៉េខាងជើង ដោយអះអាងថា វាជាការរំលោភយ៉ាងជាក់ច្បាស់ទៅលើសេចក្តីសម្រេចពីររបស់ក្រុមប្រឹក្សាសន្តិសុខ។
គួររំឭកឡើងវិញថា កាលពីឆ្នាំ២០០៦ និងឆ្នាំ២០០៩ ក្រុមប្រឹក្សាសន្តិសុខអ.ស.ប.ធ្លាប់បានចេញសេចក្តីសម្រេចចំនួនពីរ ដែលហាមឃាត់មិនឲ្យកូរ៉េខាងជើងធ្វើសកម្មភាពសាកល្បងណាមួយដែលទាក់ទងនឹងនុយក្លេអ៊ែរ ឬបច្ចេកវិទ្យាមីស៊ីលរយៈចម្ងាយឆ្ងាយ (Ballistic Missile)។ បើទោះជាកូរ៉េខាងជើងអះអាងថា ការបាញ់សាកល្បង កាលពីថ្ងៃពុធ គឺជាការបាញ់បង្ហោះផ្កាយរណប ក៏ប៉ុន្តែ ក្រុមប្រឹក្សាសន្តិសុខចាត់ទុកថា តួរ៉ុកកែតដែលផ្ទុកផ្កាយរណបនោះ គឺប្រើបច្ចេកវិទ្យាមីស៊ីល។
កាលពីម្សិលមិញនេះ ចិន ដែលជាសម្ព័ន្ធមិត្តរបស់កូរ៉េខាងជើង ក៏បានអនុម័តគាំទ្រសេចក្តីថ្លែងការណ៍ ដែលថ្កោលទោសកូរ៉េខាងជើងនេះដែរ ក៏ប៉ុន្តែ ចិននៅតែបន្តជំទាស់មិនឲ្យក្រុមប្រឹក្សាសន្តិសុខដាក់ទណ្ឌកម្មលើរបបដឹកនាំក្រុងព្យុងយ៉ាងដដែល បើទោះជាមានការទទូចទាមទារពីសំណាក់សហរដ្ឋអាមេរិកយ៉ាងណាក៏ដោយ។ ចិនទទូចថា ការដាក់ទណ្ឌកម្មមិនមែនជាមធ្យោបាយល្អ ក្នុងការដោះស្រាយវិបត្តិកូរ៉េខាងជើងនោះទេ គឺមានតែបង្កឲ្យមានភាពតានតឹងកាន់តែខ្លាំងឡើងថែមទៀត។
ក្រសួងការពារជាតិកូរ៉េខាងត្បូងបានប្រកាសឲ្យដឹង នៅថ្ងៃព្រហស្បតិ៍នេះថា ផ្កាយរណបដែលបាញ់បង្ហោះដោយកូរ៉េខាងជើង កំពុងធ្វើដំណើរជាធម្មតានៅលើគន្លងតារាវិថី។ នេះជាការបញ្ជាក់បន្ថែមថា ការបាញ់សាកល្បងរ៉ុកកែតរបស់កូរ៉េខាងជើង កាលពីថ្ងៃពុធ គឺពិតជាទទួលបានជោគជ័យក្នុងការបញ្ជូនផ្កាយរណបទៅក្នុងតារាវិថីពិតមែន ក៏ប៉ុន្តែ គេនៅតែមិនទាន់អាចសន្និដ្ឋានបាននៅឡើយទេថា ផ្កាយរណបនេះនឹងអាចដំណើរការបានពិតប្រាកដមែន។ តើផ្កាយរណបនេះមានបេសកកម្មអ្វីពិតប្រាកដ ក៏គេនៅតែមិនទាន់អាចដឹងច្បាស់នៅឡើយដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ