ការស្រុតចុះនៃកំណើនសេដ្ឋកិច្ចចិនគឺជាការគំរាមដល់កំណើនសេដ្ឋកិច្ចនៅអាស៊ី
ការធ្លាក់ចុះនៃកំណើនសេដ្ឋកិច្ចចិនគឺជាកត្តាគំរាមមួយដ៏ធ្ងន់ធ្ងរដល់សន្ទុះកំណើនសេដ្ឋកិច្ចនៅទ្វីបអាស៊ី។ នេះជាការគូសបញ្ជាក់នៅថ្ងៃពុធនេះដោយការអង្កេតដែលបានស៊ើបសួរប្រមុខដឹកនាំនិងឥស្សរជនសំខាន់ៗនៅក្នុងតំបន់អាស៊ី-ប៉ាស៊ីហ្វិក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
បើយោងតាមការអង្កេតរបស់ក្រុមប្រឹក្សានៃសហប្រតិបត្តិការសេដ្ឋកិច្ចនៅតំបន់ប៉ាស៊ីហ្វិក Conseil de coopération économique du Pacifique (PECC) ៥៦%នៃជនដែលគេស៊ើបសួរអង្កេតបានថ្លែងថា “គេត្រូវប្រុងប្រៀបរៀបចំខ្លួនសម្រាប់ទប់ទល់នឹងស្ថានភាពនៃសេដ្ឋកិច្ចចិនដែលអាចស្គាល់ការធ្លាក់ស្រុតចុះ នារយៈកាល១២ខែខាងមុខនេះ” ទល់នឹង៣៦%ដែលមានការវិនិច្ឆ័យបែបនេះកាលពីឆ្នាំទៅ។
ការស៊ើបអង្កេតនេះបានសាកសួរក្នុងចំណោមអ្នកដឹកនាំប្រមាណ៥០០នាក់ក្នុងតំបន់ ដែលចេញពីមជ្ឈដ្ឋានកិច្ចការពាណិជ្ជកម្ម មជ្ឈដ្ឋានសភាបណ្ឌិត ឬអ្នកទទួលខុសត្រូវរដ្ឋាភិបាល។ គេបានចេញផ្សាយការស៊ើបអង្កេតទាំងនេះ នៅខណៈពេលដែលជំនួបកំពូលហ្វ័ររូមសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិក Apec ដែលត្រូវប្រព្រឹត្តទៅនៅចុងសប្តាហ៍នេះនៅទីក្រុង Vladivostok នៃប្រទេសរុស្ស៊ី។
លទ្ធផលនេះបង្ហាញឲ្យឃើញពីតួនាទីកាន់តែសំខាន់ឡើងៗនៃប្រទេសចិន ដែលជាមហាអំណាចសេដ្ឋកិច្ចទីពីរពិភពលោកហើយដែលជាក្បាលម៉ាស៊ីនជួយអូសទាញឲ្យសេដ្ឋកិច្ចពិភពលោកមានសន្ទុះកើនទៅមុខ។ នេះជាការគូសបញ្ជាក់របស់លោក Donald Campbell សហប្រធាននៃក្រុមប្រឹក្សានៃសហប្រតិបត្តិការសេដ្ឋកិច្ចនៅតំបន់ប៉ាស៊ីហ្វិក Conseil de coopération économique du Pacifique (PECC)។
គួរកត់សម្គាល់ថា កាលពីដប់ឆ្នាំមុន តំបន់អាស៊ី-ប៉ាស៊ីហ្វិកតំណាងតែ២០%នៃផលិតផលសេដ្ឋកិច្ច។ ឥឡូវនេះតំណាងដល់ទៅ៣៥% ដូច្នេះ តំបន់អាស៊ី-ប៉ាស៊ីហ្វិកគឺជាតំបន់ដែលមានសន្ទុះនិងមានថាមពលជាងគេ ហើយក៏ដោយសារតែមានប្រទេសចិនជាអ្នកជួយអូសទាញ។
សូមបញ្ជាក់ថា ប្រទេសចិនធ្លាប់បានបង្ហាញឲ្យឃើញនូវសមត្ថភាពរបស់ខ្លួនរួចហើយ ក្នុងការទប់ទល់នឹងវិបត្តិសេដ្ឋកិច្ចនិងវិបត្តិហិរញ្ញវត្ថុនៅអឺរ៉ុប ហើយនិងវិបត្តិសេដ្ឋកិច្ចនៅសហរដ្ឋអាមេរិក ប៉ុន្តែនារយៈពេលចុងក្រោយនេះ សេដ្ឋកិច្ចនៃប្រទេសចិនក៏បានបង្ហាញឲ្យឃើញនូវភាពចុះទន់ខ្សោយរបស់ខ្លួន។
បើយោងតាមការចេញផ្សាយឲ្យដឹងដោយធនាគារ HSBC នៅខែសីហាកន្លងទៅ សកម្មភាពកម្មន្តសាលចិនបានធ្លាក់ចុះដល់កម្រិតមួយដ៏ទាបពុំដែលកើតមាន ចាប់តាំងពីខែមីនាឆ្នាំ២០០៩មក ហើយផលិតផលដុលសរុបរបស់ប្រទេសចិនបានកើនឡើងតែ៧.៦%ប៉ុណ្ណោះ ដែលជាសមិទ្ធិផលមួយដ៏អន់ថយបំផុតសម្រាប់រយៈកាលបីឆ្នាំចុងក្រោយនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ