នាយករដ្ឋមន្ត្រីអាល្លឺម៉ង់អញ្ជើញទៅប្រទេសចិនដែលកំពុងទទួលរងផលវិបាកនៃវិបត្តិតំបន់អឺរ៉ូ
លោកស្រីនាយករដ្ឋមន្ត្រីអាល្លឺម៉ង់ Angela Merkel បានត្រូវទទួលនៅថ្ងៃព្រហស្បតិ៍នេះនៅទីក្រុងប៉េកាំងដោយលោកនាយករដ្ឋមន្ត្រីចិន វិន ជាប៉ាវ។ ទាំងនេះក្នុងខណៈពេលដែលមហាអំណាចសេដ្ឋកិច្ចទី១អឺរ៉ុបហើយនិងមហាអំណាចសេដ្ឋកិច្ចទី២ពិភពលោកចង់រិះរកដំណោះស្រាយឲ្យវិបត្តិប្រាក់បំណុលនៅក្នុងតំបន់អឺរ៉ូ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៥
“វិបត្តិហិរញ្ញវត្ថុពិភពលោកហើយនិងវិបត្តិប្រាក់បំណុលនៅអឺរ៉ុបបានជះចេញជាផលវិបាកកាន់តែធ្ងន់ធ្ងរទៅៗនៅលើពិភពលោក។ ប្រទេសចិននិងប្រទេសអាល្លឺម៉ង់ក្នុងឋានៈជាមហាអំណាចសេដ្ឋកិច្ចនិងជាដៃគូយុទ្ធសាស្ត្រដ៏សំខាន់ត្រូវតែធ្វើការពង្រឹងយ៉ាងណាឲ្យអន្តរជាតិមានទំនុកចិត្តកក់ក្តៅឡើងវិញ ហើយត្រូវរិះរកដំណោះស្រាយជាមួយគ្នា” នេះជាសេចក្តីប្រកាសរបស់លោកនាយករដ្ឋមន្ត្រីចិន វិន ជាប៉ាវ នៅពេលទទួលលោកស្រីនាយករដ្ឋមន្ត្រីអាល្លឺម៉ង់ Angela Merkel ។
ទស្សនកិច្ចរបស់លោកស្រីនាយករដ្ឋមន្ត្រីអាល្លឺម៉ង់ Angela Merkel នៅប្រទេសចិនលើកនេះគឺជាទស្សនកិច្ចលើកទីពីរហើយនៅឆ្នាំ២០១២នេះ។ បើយោងតាមអ្នកវិភាគ ទីក្រុងប៉េកាំងយល់ថា ប្រទេសអាល្លឺម៉ង់មានតួនាទីកាន់តែសំខាន់ឡើងៗនៅក្នុងការរិះរកដំណោះស្រាយឲ្យវិបត្តិហិរញ្ញវត្ថុនៅក្នុងតំបន់ចាយប្រាក់អឺរ៉ូ។
ប្រទេសចិនដែលអត្រាកំណើនសេដ្ឋកិច្ចបានស្គាល់ការធ្លាក់ស្រុតចុះខ្លាំង ក៏ដោយហេតុតែសហភាពអឺរ៉ុបកំពុងទទួលរងគ្រោះនឹងវិបត្តិសេដ្ឋកិច្ចនិងវិបត្តិហិរញ្ញវត្ថុដ៏សែនធ្ងន់ធ្ងរពុំដែលកើតមាន។ ហើយម្យ៉ាងទៀត សហភាពអឺរ៉ុបគឺជាទីផ្សារទី១សម្រាប់ការនាំចេញរបស់ប្រទេសចិន។
សូមបញ្ជាក់ថា ប្រទេសអាល្លឺម៉ង់តំណាងដល់ទៅជិត៥០%នៃការនាំចេញអឺរ៉ុបចូលប្រទេសចិន ហើយតំណាងប្រមាណ២៥%នៃការនាំចេញរបស់ប្រទេសចិនចូលសហភាពអឺរ៉ុប។
ការដោះដូរពាណិជ្ជកម្មរវាងប្រទេសចិននិងប្រទេសអាល្លឺម៉ង់មានដល់ទៅ១៦៩ពាន់លានដុល្លារនៅឆ្នាំ២០១១ ពោលគឺបានកើនឡើង១៨,៩%បើប្រៀបធៀបទៅនឹងឆ្នាំកន្លងទៅ។ ទាំងនេះបានបណ្តាលឲ្យអ្នកដឹកនាំចិនយល់ថា “បើគេចង់ដោះស្រាយបញ្ហាអឺរ៉ុប គេត្រូវតែឆ្លងកាត់តាមប្រទេសអាល្លឺម៉ង់ចៀសពុំផុត”។
គួរកត់សម្គាលល់ថា លោកស្រីនាយករដ្ឋមន្ត្រីអាល្លឺម៉ង់ Angela Merkel នឹងអញ្ជើញទៅទីក្រុង Tianjin ឋិតនៅប៉ែកខាងជើងនៃប្រទេសចិននៅថ្ងៃសុក្រស្អែក ដើម្បីមើលឧស្សាហកម្មផ្គុំសាងសង់យន្តហោះ Airbus ។
នាឱកាសទស្សនកិច្ចរបស់លោកស្រីនាយករដ្ឋមន្ត្រីអាល្លឺម៉ង់កាលពីខែកុម្ភៈកន្លងទៅ លោកស្រីមែលគែលបានខិតខំថ្លែងប្រាប់ភាគីចិន ពីភាពរឹងមាំនៃរូបិយប័ណ្ណអឺរ៉ូ ហើយនិងពីសមត្ថភាពរបស់អឺរ៉ុបក្នុងការរិះរកដំណោះស្រាយឲ្យវិបត្តិសេដ្ឋកិច្ចនិងវិបត្តិហិរញ្ញវត្ថុនៅក្នុងតំបន់អឺរ៉ូ។
នាឱកាសទស្សនកិច្ចនេះ លោកស្រីនាយករដ្ឋមន្ត្រីអាល្លឺម៉ង់ Angela Merkel ក៏នឹងឆ្លៀតចរចាជាមួយអ្នកដឹកនាំចិនពីបញ្ហាដ៏ក្តៅគគុកនៅប្រទេសស៊ីរី នៅប្រទេសអ៊ីរ៉ង់ផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ