សម្តេចក្រុមព្រះនរោត្តមរណឫទ្ធិ ត្រូវគណបក្សហ៊្វុនស៊ិនប៉ិចប្រកាសប្តឹងពីបទពុករលួយ និងលួចលក់យន្តហោះ
គណបក្សហ្វ៊ុនស៊ិនប៉ិច បានចេញសេចក្តីប្រកាសព័ត៌មានខ្លីមួយ កាលពីយប់ថ្ងៃទី១០ ខែមីនាម្សិលមិញថា គណបក្សហ្វ៊ុនស៊ិនប៉ិចដាក់ពាក្យបណ្តឹងប្តឹងសម្តេចក្រុមព្រះ នរោត្តម រណឫទ្ធិ ពីបទពុករលួយនិងលួចឧទ្ធម្ភាគចក្រ ម៉ាក MI17 ( អ៊ឹមអាយ ១៧ ) របស់គណបក្សហ្វ៊ុនស៊ិនប៉ិច យកទៅលក់ ក្នុងពេលព្រះអង្គនៅជាប្រធានគណបក្សហ៊្វុនស៊ិនប៉ិច។ ក៏ប៉ុន្តែមកដល់រសៀលថ្ងៃចន្ទនេះ ពាក្យបណ្តឹងប្រឆាំងសម្តេចក្រុមព្រះមិនទាន់ដាក់ទៅកាន់តុលាការនៅឡើយទេ។ រីឯអ្នកស្និទ្ធនឹងសម្តេចក្រុមព្រះ នរោត្តម រណឫទ្ធិ ក៏បានបដិសេធហើយចាត់ទុកថា បណ្តឹងលើសម្តេចក្រុមព្រះ ជារឿងអយុត្តិធម៌។ អ្នកនាំពាក្យសម្តេចក្រុមព្រះក៏បានបដិសេធថា ព្រះអង្គ មិនយាងទៅចូលរួមជាមួយគណបក្សសង្គ្រោះជាតិ ដែលជាគណបក្សប្រឆាំង ដូចដំណឹងចុះផ្សាយឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៤
សេចក្តីប្រកាសខ្លីរបស់អ្នកនាំពាក្យគណបក្សហ៊្វុនស៊ិនប៉ិច បានបង្ហាញថា គណបក្សហ្វ៊ុនស៊ិនប៉ិចដាក់ពាក្យបណ្តឹងប្តឹងសម្តេចក្រុមព្រះ នរោត្តម រណឫទ្ធិ ពីបទពុករលួយនិងលួចឧទ្ធម្ភាគចក្រ ម៉ាក MI17 ( អ៊ឹមអាយ ១៧ ) របស់គណបក្សហ្វ៊ុនស៊ិនប៉ិចយកទៅលក់។
ក៏ប៉ុន្តែមកដល់រសៀលថ្ងៃចន្ទនេះ អ្នកនាំពាក្យគណបក្សហ្វ៊ុនស៊ិនប៉ិច លោក ទុំ សម្បុរ បានប្រាប់វិទ្យុបារាំងអន្តរជាតិថា គណបក្សហ្វ៊ុនស៊ិនប៉ិចមិនទាន់បានដាក់ពាក្យបណ្តឹងប្រឆាំងនឹងសម្តេចក្រុមព្រះ នរោត្តម រណឫទ្ធិ ទៅកាន់តុលាការនៅឡើយទេ។
លោក ទុំ សម្បុរ បានបញ្ជាក់ថា "ឥឡូវនេះ គណបក្សហ្វ៊ុនស៊ិនប៉ិចមិនទាន់បានដាក់ពាក្យបណ្តឹងអ្វីមួយជាផ្លូវការអីទេ។ ប៉ុន្តែគ្រាន់តែថា យើងកំពុងតែគិតថាតើត្រូវធ្វើយ៉ាងម៉េចទៅតាមនីតិវិធី ពីរឿងបញ្ហាដូចសេចក្តីប្រកាសព័ត៌មានពីយប់មិញអីចឹង គឺទី១ ពីបញ្ហាលក់ឧទ្ធម្ភាគច្រក និងទី២-ពីបញ្ហាពុករលួយ"។
លោក ទុំ សម្បុរ បានបន្ថែមថា បញ្ហាពុករលួយនិងការលួចយកយន្តហោះទៅលក់ ដែលគណបក្សហ្វ៊ុនស៊ិនប៉ិចប្រកាសប្តឹងសម្តេចក្រុមព្រះ នរោត្តម រណឫទ្ធិ គឺបានកើតឡើងក្នុងអំឡុងពេលព្រះអង្គនៅគង់ជាប្រធានគណបក្សហ្វ៊ុនស៊ិនប៉ិច។
សម្តេចក្រុមព្រះត្រូវបានគេទម្លាក់ចេញពីប្រធានគណបក្សហ៊្វុនស៊ិនប៉ិច តាមរយៈសមាជ ថ្ងៃ១៨ តុលា ឆ្នាំ២០០៦។
ការពន្យារពេលដាក់ពាក្យបណ្តឹង ទៅកាន់តុលាការប្រឆាំងនឹងសម្តេចក្រុមព្រះ នរោត្តម រណឫទ្ធិ នៅពេលនេះ ត្រូវបានអ្នកនាំពាក្យគណបក្សហ៊្វុនស៊ិនប៉ិច លោក ទុំ សម្បុរ លើកឡើងថា មិនមែនមកពីការសម្របសម្រួលណាមួយរវាងសម្តេចក្រុមព្រះជាមួយថ្នាក់ដឹកនាំគណបក្សហ្វ៊ុនស៊ិនប៉ិច លោក ញឹក ប៊ុនឆៃ ឡើយ។ មូលហេតុមានតែមួយគត់ គឺគណបក្សហ្វ៊ុនស៊ិនប៉ិចមិនទាន់រៀបចំឯកសាររួចរាល់។
លោក ទុំ សម្បុរ ក៏បានបដិសេធផងដែរថា សេចក្តីប្រកាសប្តឹងសម្តេចក្រុមព្រះ នរោត្តម រណឫទ្ធិ នៅពេលនេះ ក៏មិនមែនជាការគាបសង្កត់ នៅពេលមានដំណឹងថាសម្តេចក្រុមព្រះ យាងទៅចូលរួមធ្វើនយោបាយជាមួយគណបក្សសង្គ្រោះជាតិ ឬក៏សងសឹកព្យាបាទអ្វីទេ។
យ៉ាងណាក៏ដោយ លោក ប៉ែន សង្ហា ជាអ្នកស្និទ្ធនឹងសម្តេចក្រុមព្រះ បានចាត់ទុកការប្រកាសប្តឹងសម្តេចក្រុមព្រះ ថាជារឿងអយុត្តិធម៌និងជារឿងកំសាក និងអគុណធម៌នៃមេដឹកនាំបច្ចុប្បន្ន របស់គណបក្សហ៊្វុនស៊ិចប៉ិច។ ជាមួយគ្នានោះ លោក ប៉ែន សង្ហា ក៏បានបដិសេធនូវព័ត៌មានដែលមានលេចឮថា សម្តេចក្រុមព្រះ នរោត្តម រណប្ញទ្ធិ ទៅចូលរួមជាមួយគណបក្សសង្គ្រោះជាតិហើយទទួលបានតួនាទីជាប្រធានគណបក្សកិត្តិយស។
សូមរម្លឹកថា នៅក្រោយពេលគណបក្សហ្វ៊ុនស៊ិនប៉ិច បែកបាក់ជាពីរ តាមរយៈសមាជកាលពីថ្ងៃទី១៨ ខែតុលា ឆ្នាំ២០០៦ សម្តេចក្រុមព្រះ នរោត្តម រណឫទ្ធិ អតីតប្រធានគណបក្សហ្វ៊ុនស៊ិនប៉ិច ក៏ត្រូវបានគណបក្សហ្វ៊ុនស៊ិនប៉ិចដែលដឹកនាំដោយលោក ញឹក ប៊ុនឆៃ បានប្តឹង ចោទប្រកាន់ព្រះអង្គក្នុងរឿងលក់ដីទីស្នាក់ការគណបក្សហ្វ៊ុនស៊ិនប៉ិច ហើយព្រះអង្គក៏ត្រូវតុលាការផ្តន្ទាទោសកំបាំងមុខដាក់ពន្ធនាគារ នាំឲ្យព្រះអង្គភៀសព្រះកាយគង់នៅក្រៅប្រទេសមួយរយៈ។ កាលណោះ សម្តេចក្រុមព្រះ នរោត្តម រណឫទ្ធិ ក៏បានជាប់បណ្តឹងនៅតុលាការក្នុងសំណុំរឿងឯកពន្ធភាព ដែលព្រះអង្គមានមហេសីពីរផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ