ម៉ាកាវចង់ពង្រីកសហប្រតិបត្តិការជាមួយកម្ពុជា
អនុប្រធានគណៈកម្មាធិការជាតិនៃក្រុមប្រឹក្សាផ្នែកនយោបាយនៃសភាប្រជាជនចិន លោក អេតមុន ហូ (Edmund Ho) ដែលជាអតីតអភិបាលតំបន់ស្វយ័តម៉ាកាវ បានធ្វើទស្សនកិច្ចនៅកម្ពុជា ដើម្បីអញ្ជើញលោកនាយករដ្ឋមន្ត្រីហ៊ុន សែន អោយចូលរួមក្នុងវេទិកាសេដ្ឋកិច្ចទេសចរណ៍សាកលលើកទី២ ដែលនឹងប្រព្រឹត្តិទៅនៅម៉ាកាវ នាខែកញ្ញាខាងមុខ។ នៅក្នុងជំនួបជាមួយលោកនាយករដ្ឋមន្ត្រីកម្ពុជា និងលោកឧបនាយករដ្ឋមន្ត្រី គាត ឈន់ ភាគីទាំងពីរបានជជែកអំពីការពង្រឹងសហប្រតិបត្តិការផ្នែកទេសចរណ៍ និងពាណិជ្ជកម្ម។ កម្ពុជាបានស្នើអោយមានការហោះហើរត្រង់រវាងម៉ាកាវ និងកម្ពុជាទៀតផង។
ចុះផ្សាយនៅថ្ងៃ៖
ស្តាប់ - ០១:៤៧
ការពង្រីកសហប្រតិបត្តិការក្នុងវិស័យទេសចរណ៍និងពាណិជ្ជកម្មរវាងកម្ពុជានិងក្រុងម៉ាកាវរបស់ចិន គឺជាប្រធានបទចំបងនៃការពិភាក្សារវាងថ្នាក់ដឹកនាំចិន និងកម្ពុជា។ អនុប្រធានគណៈកម្មាធិការជាតិនៃក្រុមប្រឹក្សាផ្នែកនយោបាយនៃសភាប្រជាជនចិន លោក អេតមុន ហូ (Edmund Ho) ដែលជាអតីតអភិបាលតំបន់ស្វយ័តម៉ាកាវដែរនោះ បានបំពេញទស្សនកិច្ច៤ថ្ងៃនៅកម្ពុជា ក្នុងដើមសប្តាហ៍នេះ។
អតីតអភិបាលក្រុងម៉ាកាវបានជួបជាមួយលោកនាយករដ្ឋមន្ត្រីហ៊ុន សែន ដើម្បីអញ្ជើញលោកនាយករដ្ឋមន្ត្រីអោយចូលរួម និងថ្លែងសុន្ទរកថា នៅក្នុងវេទិកាសេដ្ឋកិច្ចទេសចរណ៍សាកលលើកទី២។ វេទិកានេះនឹងត្រូវរៀបចំនៅក្នុងទីក្រុងម៉ាកាវ នៅខែកញ្ញាខាងមុខ។
ប្រមុខរាជរដ្ឋាភិបាលកម្ពុជាបានទទួលយកការអញ្ជើញនេះ ហើយក៏បានពិភាក្សាអំពីការពង្រីកទំនាក់ទំនងសេដ្ឋកិច្ចរវាងកម្ពុជា និងម៉ាកាវផងដែរ។ ប្រមុខរាជរដ្ឋាភិបាលកម្ពុជាបានអំពាវនាវអោយវិនិយោគិនចិនដាក់ទុននៅកម្ពុជាក្នុងវិស័យទេសចរណ៍ និងលើកទឹកចិត្តអោយមានការហោះហើរត្រង់រវាងម៉ាកាវ និងកម្ពុជាទៀតផង។
អតីតអភិបាលក្រុងម៉ាកាវបានបង្ហាញបំណងចង់សហប្រតិបត្តិការផ្នែកទេសចរណ៍។ នៅក្នុងជំនួបជាមួយលោកឧបនាយករដ្ឋមន្ត្រីគាត ឈន់ រដ្ឋមន្ត្រីក្រសួងសេដ្ឋកិច្ចកម្ពុជា លោក អេតមុន ហូបានបង្ហាញការពិចារណាផ្តល់អាហាររូបករណ៍ដល់យុវជនខ្មែរ អោយសិក្សាវិស័យទេសចរណ៍ និងបដិសណ្ឋារកិច្ច និងផ្តល់ការងារដល់ពលរដ្ឋខ្មែរនៅម៉ាកាវទៀតផង។
រដ្ឋមន្ត្រីសេដ្ឋកិច្ច លោកគាត ឈន់ ក៏មិនបានភ្លេចបញ្ជាក់ប្រាប់លោក អេតមុន ហូ ដែលជាអនុប្រធានគណៈកម្មាធិការជាតិនៃក្រុមប្រឹក្សាផ្នែកនយោបាយនៃសភាប្រជាជនចិនទេថា ជំនួយចិនបានដើរតួយ៉ាងសំខាន់នៅក្នុងការអភិវឌ្ឍន៍សេដ្ឋកិច្ចកម្ពុជា។ គួរបញ្ជាក់ថា ចាប់តាំងពីឆ្នាំ១៩៩២មក រដ្ឋាភិបាលចិនបានផ្តល់ជំនួយជាង២៧០០លានដុល្លារ ទៅក្នុងការសាងសង់ហេដ្ឋារចនាសម្ព័ន្ធនានានៅកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ