ប្រធានាធិបតីបច្ចុប្បន្ន ទិតៀន ប្រធានាធិបតីមុន
លោក មេដវេដេវ ចាត់ទុកថាហួសសម័យទៅហើយ ប្រព័ន្ធគ្រប់គ្រងជាមជ្ឈការ ដែលបានត្រូវដាក់ឲ្យអនុវត្ត នៅប្រទេសរុស្ស៊ី ដោយ លោក ពូទីន ដែលបានធ្វើជាប្រធានាធិបតី មុនគាត់ អស់៨ឆ្នាំ និងថែមទាំងជាគ្រូណែនាំរបស់គាត់ទៅផង។ ការរិះគន់នេះ ឆ្លុះឲ្យឃើញ ពី ភាពប្រជែងគ្នា រវាងរដ្ឋបុរសទាំងពីរ ដែលម្នាក់ៗ សុទ្ធតែអាចក្លាយជាបេក្ខជន សម្រាប់ចូល ប្រឡូក ក្នុងការបោះឆ្នោតប្រធានាធិបតីនៅរុស្ស៊ី ឆ្នាំក្រោយ ដែលកាន់តែខិតជិតមកដល់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
ការទិតៀននេះ បានត្រូវបន្លឺឡើង ដោយលោកប្រធានាធិបតី មេដវេដេវ ក្នុងអង្គប្រជុំ នៃ បណ្តាភាសាវិទូ បណ្តាសាស្ត្រាចារ្យភាសារុស្ស៊ី បូកទាំងមកពីបរទេសផង ដែលបានប្រព្រឹត្តទៅ ថ្ងៃទី៦មិថុនា ម្សិលមិញ នៅឯ” វិជ្ជាឋានភាសារុស្ស៊ីក្រុងម៉ូស្គូនាម កវីរុស្ស៊ី ពូហ្សគីន “ នៅចំ ថ្ងៃកំណើត មហាកវីនេះនៃសតវត្សទី១៨-១៩ ដែលត្រូវមជ្ឈដ្ឋានអ្នកប្រាជ្ញ ចាត់ទុក ជា ”ស្ថាបនិក ភាសាអក្សរសាស្ត្ររុស្ស៊ីសម័យបច្ចុប្បន្ន”។
តាមប្រសាសន៍ លោក មេដវេដេវ ៖ ក្រោមអំណាចប្រធានាធិបតី ពូទីន ពីឆ្នាំ២០០០ដល់២០០៨ នៅរុស្ស៊ី មានការរឹតត្បិតសកម្មភាពបក្សប្រឆាំង ពិបាកប្រើមធ្យោបាយឃោសនាមហាជន និង មានការកាត់បន្ថយស្វ័យភាពខេត្ត។
ព្រមជាមួយនេះ លោក មេដវេដេវ ក៏សង្កត់ធ្ងន់ថា ប្រព័ន្ធនយោបាយនៅរុស្ស៊ី ដែល ប្រមូលផ្តុំ អំណាច តែនៅក្នុងដៃប្រធានាធិបតី គឺលែងទាន់សម័យហើយ ដ្បិតវាសម្បូណ៌ទៅដោយចំណុចខ្វះខាតហេតុដែលតម្រូវឲ្យមានការកែប្រែ ពីព្រោះប្រធានាធិបតីតែម្នាក់ឯង មិនអាច ដោះស្រាយ គ្រប់តែកិច្ចការថ្នាក់ជាតិទាំងអស់ឡើយ។
ក្នុងន័យនេះ លោក មេដវេដេវ តាំងពីគាត់ឡើងកាន់អំណាច៣ឆ្នាំមុនមក គឺខំស្វះស្វែង បើក ប្រព័ន្ធនយោបាយនៅរុស្ស៊ី ឲ្យមានលក្ខណៈចំហ ប៉ុន្តែ គាត់នៅមិនទាន់ សម្រេចបានលទ្ធផល អ្វីណាឲ្យបានជាក់លាក់ឡើយ។
លោក មេដវេដេវ ដែលជាអតីតសាស្ត្រាចារ្យច្បាប់ បានបង្ហាញឲ្យបស្ចិមលោក ឃើញថាគាត់ជា “អ្នកលើកទង់ប្រជាធិបតេយ្យ” នៅរុស្ស៊ី ដោយសន្យាប្រយុទ្ធប្តូរផ្តាច់ ទល់នឹងអំពើពុករលួយនិងដាក់ទិសធ្វើទំនើបកម្មសេដ្ឋកិច្ចប្រទេសរុស្ស៊ី ឲ្យទាល់តែបាន។
រីឯលោក ពូទីន ដែលបច្ចុប្បន្ន ជានាយករដ្ឋមន្ត្រី គឺមនុស្សទី២នៅរុស្ស៊ី ហើយដែលមានបំណង វិលត្រឡប់ ទៅកាន់តំណែងកំពូល ក្នុងវិមានក្រេមឡាំង ជាមនុស្សទី១ វិញ ធ្លាប់បាន បង្ហើរសំដី ព្រមាន អតីតសិស្សខ្លួន កុំឲ្យជោរ នឹង “ទំនោរសេរីនិយម” ទាល់តែខ្វះ ការពិចារណានោះ។
ថ្លែងក្នុងសន្និសីទកាសែតនៅក្រុង កូប៉ិនហាកកាលពីចុងខែមេសាឆ្នាំនេះ លោក ពូទីន ក៏បាន ដាស់សតិបស្ចិមលោក ដែលតែងចិញ្ចឹមនូវសមានចិត្ត ចំពោះលោក មេដវេដេវ ជាគូប្រជែងគាត់ ថា ៖ សម្រាប់ អនាគតបេក្ខជនប្រធានាធិបតីនៅរុស្ស៊ី គឺមិនចាំបាច់មាន ការជួយចូកចែវ ពីខាងប្រទេសក្រៅឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ