អាល្លឺម៉ង់ប្រឈមមុខនឹងការធ្លាក់ចំណាត់ថ្នាក់ហានិភ័យបំណុល
កាលពីថ្ងៃចន្ទ ម្សិលមិញនេះ ទីភ្នាក់ងារវាយតម្លៃហានិភ័យបំណុល Moody’s បានព្រមានថា ចំណាត់ថ្នាក់ហានិភ័យបំណុលរបស់ ប្រទេសនៅក្នុងតំបន់ចាយលុយអឺរ៉ូ ចំនួន ៣ គឺ អាល្លឺម៉ង់ ហូឡង់ និងលុចសំបួ មានចក្ខុវិស័យអវិជ្ជមាន ដែលមានន័យថា ចំណាត់ថ្នាក់នេះអាចនឹងត្រូវ Moody’s ទម្លាក់ ក្នុងរយៈពេល ពី ៦ខែ ទៅ ២ឆ្នាំខាងមុខ ប្រសិនបើស្ថានភាពវិបត្តិបំណុលមិនបានប្រសើរឡើងវិញទេ។
ចុះផ្សាយនៅថ្ងៃ៖
ស្តាប់ - ០៤:៣៦
នៅក្នុងសេចក្តីប្រកាសព័ត៌មាន កាលពីថ្ងៃចន្ទ ទីភ្នាក់ងារ Moody’s បានពន្យល់ថា ការកំណត់ចក្ខុវិស័យអវិជ្ជមាន នៃចំណាត់ថ្នាក់បំណុលរបស់អាល្លឺម៉ង់ ហូឡង់ និងលុចសំបួ ត្រូវបានធ្វើឡើងដោយមើលទៅលើកត្តាធំៗពីរ។
ទីមួយ គឺបញ្ហាក្រិក ដែលនៅមិនទាន់ដោះស្រាយចប់។ សេដ្ឋកិច្ចរបស់ក្រិកនៅតែបន្តធ្លាក់ចុះដុនដាបខ្លាំង ហើយប្រូបាប៊ីលីតេដែលក្រិកចាកចេញពីតំបន់ចាយលុយអឺរ៉ូកំពុងតែកើនឡើង។ Moody’s យល់ថា បើសិនជាក្រិកចេញពីតំបន់អឺរ៉ូ វានឹងធ្វើឲ្យប៉ះពាល់ដល់ប្រទេសទាំងអស់ក្នុងតំបន់អឺរ៉ូ ជាពិសេស អាល្លឺម៉ង់ ដែលបានចំណាយលុយយ៉ាងច្រើនជួយក្រិកកន្លងមក នឹងត្រូវខាតបង់ច្រើន ហើយធនាគារឯកជនអាល្លឺម៉ង់ ដែលជាម្ចាស់បំណុលក្រិកក៏នឹងត្រូវខាតបង់ខ្លាំងដែរ។ ម្យ៉ាងវិញទៀត បើសិនជាប្រទេសចាយលុយអឺរ៉ូចង់រក្សាក្រិកឲ្យនៅក្នុងតំបន់អឺរ៉ូដដែល ក៏គេចាំបាច់ត្រូវការចំណាយលុយច្រើនដែរ ដើម្បីទ្រទ្រង់សេដ្ឋកិច្ចក្រិក ដែលទាំងនេះ នឹងក្លាយជាបន្ទុកដល់ប្រទេសណា ដែលមានស្ថានភាពសេដ្ឋកិច្ច និងហិរញ្ញវត្ថុប្រសើរជាងគេ ក្នុងនោះ គឺមានអាល្លឺម៉ង់ ហូឡង់ និងលុចសំបួ ដែលបច្ចុប្បន្ន ជាប្រទេសមានចំណាត់ថ្នាក់បំណុលខ្ពស់។
បញ្ហាធំទីពីរ ហើយធំជាងបញ្ហាក្រិកទៅទៀត គឺអេស្ប៉ាញ ដែលស្ថានភាពសេដ្ឋកិច្ច និងហិរញ្ញវត្ថុកាន់តែដុនដាបខ្លាំងឡើង ពីមួយថ្ងៃ ទៅមួយថ្ងៃ។ អត្រាការប្រាក់បំណុលរបស់អេស្ប៉ាញកំពុងតែកើនឡើងខ្ពស់បំផុត ដែលអាចធ្វើឲ្យរដ្ឋាភិបាលអេស្ប៉ាញលែងអាចខ្ចីលុយពីទីផ្សារមូលបត្របានទៀត ហើយត្រូវរត់ទៅសុំជំនួយពីអឺរ៉ុប ដូចជាក្រិក ព័រទុយហ្កាល់ និងអៀរឡង់កន្លងទៅដែរ។ ក៏ប៉ុន្តែ ខុសពីប្រទេសទាំងបីនេះ អេស្ប៉ាញ គឺជាមហាអំណាចសេដ្ឋកិច្ចលំដាប់ទី៤ ក្នុងតំបន់ចាយលុយអឺរ៉ូ។ បើនិយាយអំពីទំហំសេដ្ឋកិច្ច និងទំហំទីផ្សារមូលបត្របំណុល បើទោះជាក្រិក ព័រទុយហ្កាល់ និងអៀរឡង់ បូកបញ្ចូលគ្នាក៏បានប្រហែលត្រឹមតែពាក់កណ្តាលអេស្ប៉ាញប៉ុណ្ណោះ។ ដូច្នេះ Moody’s យល់ថា អេស្ប៉ាញអាចនឹងក្លាយជាបន្ទុកដ៏ធ្ងន់ធ្ងរបំផុតដល់ប្រទេសចាយលុយអឺរ៉ូផ្សេងទៀត ជាពិសេស គឺអាល្លឺម៉ង់។
ឆ្លើយតបនឹងសេចក្តីសម្រេចរបស់ទីភ្នាក់ងារ Moody’s នេះ ក្រសួងហិរញ្ញវត្ថុអាល្លឺម៉ង់បានលើកឡើងថា បញ្ហាដែល Moody’s លើកឡើងខាងលើនេះ មិនមែនជារឿងថ្មីនោះទេ ហើយថា Moody’s ផ្តោតតែទៅលើហានិភ័យក្នុងរយៈពេលខ្លី ដោយមិនគិតពីចក្ខុវិស័យរយៈពេលវែង។ អាល្លឺម៉ង់នឹងនៅតែបន្តរក្សាស្ថិរភាពសេដ្ឋកិច្ច និងហិរញ្ញវត្ថុរឹងមាំជាទំនុកចិត្តដល់អ្នកវិនិយោគ ហើយអាល្លឺម៉ង់នឹងបន្តនៅជាបង្គោលរឹងមាំមួយរបស់អឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ