មន្ត្រីជាន់ខ្ពស់ទទួលបន្ទុកសិទ្ធិមនុស្សអាមេរិកបំពេញទស្សនកិច្ចនៅកម្ពុជា
ឧបការីរដ្ឋមន្ត្រីក្រសួងការបរទេសសហរដ្ឋអាមេរិកទទួលបន្ទុកលទ្ធិប្រជាធិបតេយ្យ សិទ្ធិមនុស្ស និងការងារ លោក Michael Posner នឹងមកបំពេញទស្សនកិច្ចនៅប្រទេសកម្ពុជានៅថ្ងៃអង្គារដើមសប្តាហ៍ក្រោយនេះ។ ដំណើរទស្សនកិច្ចរបស់មន្ត្រីជាន់ខ្ពស់ទទួលបន្ទុកសិទ្ធិមនុស្សទីក្រុងវ៉ាស៊ីនតោនបានធ្វើឡើងចំពេលដែលអង្គការសិទ្ធិមនុស្សក្នុងស្រុកបញ្ចេញរបាយការណ៍សិទ្ធិមនុស្សឆ្នាំ ២០១២ ដែលបង្ហាញពីស្ថានភាពអាប់អួរយ៉ាងខ្លាំង។
ចុះផ្សាយនៅថ្ងៃ៖
ស្តាប់ - ០២:១៦
មន្ត្រីជាន់ខ្ពស់ទីក្រុងវ៉ាស៊ីនតោន លោក Michael Posner ឧបការីរដ្ឋមន្ត្រីក្រសួងការបរទេសសហរដ្ឋអាមេរិក ទទួលបន្ទុកផ្នែកប្រជាធិបតេយ្យ សិទ្ធិមនុស្ស និងការងារ នឹងមកដល់ទីក្រុងភ្នំពេញនៅថ្ងៃអង្គារទី១៩កុម្ភៈដើមសប្តាហ៍ក្រោយនេះដើម្បីបំពេញទស្សនកិច្ចរយៈពេលមួយថ្ងៃនៅ កម្ពុជា។ ដំណើរទស្សនកិច្ចនេះ មានគោលបំណងស្វែងយល់អំពីបញ្ហាសិទ្ធិមនុស្ស សេរីភាពនយោបាយ និងការប្រយុទ្ធប្រឆាំងអំពើពុករលួយ។ នេះបើយោងសេចក្តីប្រកាសព័ត៌មានរបស់ស្ថានទូតអាមេរិកប្រចាំទីក្រុងភ្នំពេញដែលបានផ្សាយឲ្យដឹងនៅចុងសប្តាហ៍នេះ។
សេចក្តីប្រកាសព័ត៌មានឲ្យដឹងទៀតថា នៅក្នុងអំឡុងពេលទស្សនកិច្ចនេះ លោកឧបការី Michael Posner នឹងជួបជាមួយមន្ត្រីរដ្ឋាភិបាល និងអង្គការមិនមែនរដ្ឋាភិបាល ដើម្បីពិភាក្សា អំពីបញ្ហាសិទ្ធិមនុស្ស និងប្រជាធិបតេយ្យនៅកម្ពុជា។ ប៉ុន្តែ គ្មានសេចក្តីរាយការណ៍ថា លោកនឹងជួបជាមួយមន្ត្រីកម្ពុជាណាខ្លះទេ។ អ្នកនាំពាក្យក្រសួងការបរទេសកម្ពុជាលោក កុយ គួង បានមានប្រសាសន៍នៅថ្ងៃនេះថា លោកក៏មិនទាន់ដឹងអំពីជំនួបនៅក្នុងដំណើរទស្សនកិច្ចនេះ នៅឡើយដែរ។ មន្ត្រីស្ថានទូតអាមេរិកមិនអាចទាក់ទងសុំព័ត៌មានបន្ថែមបានទេនៅថ្ងៃនេះ។
ប៉ុន្តែ គួរកត់សម្គាល់ថា ដំណើរទស្សនកិច្ចរបស់មន្ត្រីជាន់ខ្ពស់សហរដ្ឋអាមេរិកទទួលបន្ទុកសិទ្ធិមនុស្សនៅពេលនេះបានធ្វើឡើងចំពេលដែលអង្គការសិទ្ធិមនុស្សក្នុងស្រុកទើបតែបានចេញរបាយការណ៍ជាបន្តបន្ទាប់ដើម្បីវាយតម្លៃស្ថានភាពសិទ្ធិមនុស្សនៅកម្ពុជា។ របាយការណ៍របស់អង្គការលីកាដូដែលចេញផ្សាយកាលពីថ្ងៃសុក្របានបង្ហាញអំពីស្ថានភាពសិទ្ធិមនុស្សដ៏អាប់អួរ ជាពិសេសឆ្នាំ ២០១២ ដែលអង្គការនេះចាត់ទុកជាឆ្នាំដែលមានអំពើហិង្សាខ្លាំងបំផុត។ មុននេះពីរថ្ងៃ សមាគមសិទ្ធិមនុស្សអាដហុក (Adhoc) ក៏បានចេញរបាយការណ៍មួយស្តីពីសិទ្ធិដីធ្លី និងសិទ្ធិលំនៅដ្ឋាននៅកម្ពុជាដែរ។ របាយការណ៍នេះក៏បានបង្ហាញពីបញ្ហាដីធ្លីដែលកើនឡើងគួរឲ្យកត់សម្គាល់ ជាពិសេសបញ្ហាដីសម្បទានសេដ្ឋកិច្ច។ ក៏ប៉ុន្តែ របាយការណ៍ទាំងនោះត្រូវបានច្រានចោលដោយមន្ត្រីរដ្ឋាភិបាល។
យ៉ាងណាក៏ដោយ បញ្ហាទាំងនោះត្រូវគេរំពឹងថានឹងក្លាយជារបៀបវារៈក្នុងដំណើរទស្សនកិច្ចរបស់ឧបការីរដ្ឋមន្ត្រីការបរទេសសហរដ្ឋអាមេរិកនៅសប្តាហ៍ក្រោយ។ លទ្ធផលនៃទស្សនកិច្ចនេះនឹងត្រូវលោកឧបការីរដ្ឋមន្ត្រីការបរទេសអាមេរិកបង្ហាញនៅក្នុងសន្និសីទកាសែតមួយនៅរសៀលថ្ងៃដដែលនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ