សង្គមស៊ីវិល សកម្មជនដីធ្លី និងគណបក្សប្រឆាំងប្រតិកម្មចំពោះលទ្ធផលនៃជំនួបរវាងលោកអូបាម៉ា និងលោកហ៊ុន សែន
គណបក្សប្រឆាំង អង្គការសង្គមស៊ីវិល និងសកម្មជនដីធ្លី នៅកម្ពុជាបានសម្តែងនូវការខកចិត្តចំពោះលទ្ធផលនៃកិច្ចប្រជុំរវាងលោក អូបាម៉ា និងលោកនាយករដ្ឋមន្ត្រី ហ៊ុន សែន។ សង្គមស៊ីវិល សកម្មជនដីធ្លី និងគណបក្សប្រឆាំងនៅតែទទូចសុំឲ្យលោក អូបាម៉ា បន្តជំរុញ និងលើកឡើងពីបញ្ហាសិទ្ធិមនុស្សនៅកម្ពុជា។ តាមរយៈកិច្ចប្រជុំទ្វេភាគី ដោយបិទទ្វារប្រមាណ ៤០ នាទី កាលពីព្រលប់ថ្ងៃទី១៩ វិច្ឆិកាម្សិលមិញ លោក អូបាម៉ាបានលើកឡើងពីបញ្ហាបំណុលដែលកម្ពុជាជំពាក់អាមេរិក ស្ថានភាពសិទ្ធិមនុស្សនៅកម្ពុជា ការបោះឆ្នោត បញ្ហាដីធ្លី និងការបណ្តេញចេញ ព្រមទាំងការចាប់ឃុំលោក ម៉ម សូណង់ដូ ជាដើម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៤
លោកនាយករដ្ឋមន្ត្រី ហ៊ុន សែនបានជួបលោក អូបាម៉ា កាលពីព្រលប់ថ្ងៃទី១៩ វិច្ឆិកាម្សិលមិញ នៅមុនកិច្ចប្រជុំកំពូលអាស៊ាន អាមេរិកលើកទី៤។ ដូចការគ្រោងទុក លោក អូបាម៉ាបានលើកឡើងពីកង្វល់យ៉ាងច្រើនរបស់លោកជុំវិញស្ថានភាពសិទ្ធិមនុស្ស ការបោះឆ្នោតនៅកម្ពុជានាឆ្នាំក្រោយ បញ្ហាដីធ្លី និងការបណ្តេញចេញ ព្រមទាំងការចាប់ឃុំលោក ម៉ម សូណង់ដូ ជាដើម។ តែកិច្ចប្រជុំរយៈពេល ៤០ នាទីនោះ មិនមានលើកឡើងឲ្យចំៗពីករណីរបស់លោក សម រង្ស៊ីឡើយ។ នេះបើតាមការបញ្ជាក់របស់លោក ប្រាក់ សុខុន ទីប្រឹក្សាលោកនាយករដ្ឋមន្ត្រី ហ៊ុន សែនដែលបាននាំពាក្យពីកិច្ចប្រជុំ។ តាមអ្នកនាំពាក្យ លោកនាយករដ្ឋមន្ត្រី ហ៊ុន សែន បានពន្យល់ដល់លោក អូបាម៉ា ហើយថា ស្ថានភាពសិទ្ធិមនុស្ស ជាពិសេសសេរីភាពខាងនយោបាយនៅកម្ពុជាមិនចាញ់ស្ថានភាពសិទ្ធិសេរីភាពនៅប្រទេសជិតខាងនោះទេ ហើយថា នៅកម្ពុជា មិនមានអ្នកទោសនយោបាយឡើយ។ ចំណែកអ្នកជាប់ទោស ដោយសារតែធ្វើខុសច្បាប់ប៉ុណ្ណោះ។ យ៉ាងណាក៏ដោយ លោក អូបាម៉ា ចង់ឃើញស្ថានភាពនៅកម្ពុជាកាន់តែប្រសើរឡើងជាងនេះ។
ក៏ប៉ុន្តែ អ្នកនាំពាក្យគណបក្ស សម រង្ស៊ី លោក យឹម សុវណ្ណ បានប្រាប់អ្នកកាសែតថា ស្ថានភាពនៃការគោរពសិទ្ធិមនុស្ស និងការអនុវត្តលទ្ធិប្រជាធិបតេយ្យនៅកម្ពុជា មិនទាន់មានស្ថានភាពល្អទេ ដូចអ្វីដែលលោក ស៊ូយ៉ា ស៊ូប៊ែឌី អ្នករាយការណ៍ពិសេសផ្នែកសិទ្ធិមនុស្ស និងសង្គមស៊ីវិលបានលើកឡើង។ រីឯសេរីភាពបញ្ចេញមតិត្រូវបានហាមឃាត់ ជាពិសេសបណ្តាញព័ត៌មាន ទាំងទូរទស្សន៍រដ្ឋ និងឯកជនត្រូវបានគ្រប់គ្រងដោយគណបក្សប្រជាជនកម្ពុជាកំពុងកាន់អំណាច។
ចំណែកសកម្មជនសិទ្ធិមនុស្ស អាដហុក បានលើកឡើងថា ការបំបិទសិទ្ធិសេរីភាពបញ្ចេញមតិ និងសេរីភាពខាងនយោបាយនៅតែមាន ជាពិសេសការរំលោភដីធ្លី ក៏នៅតែមានដែរនៅកម្ពុជា។ រីឯប្រព័ន្ធតុលាការ ក៏មិនទាន់ឯករាជ្យនៅឡើយ។ នៅព្រឹកមិញ មេដឹកនាំសង្គមស៊ីវិលនៅកម្ពុជាបានជួបជំនួយការផ្ទាល់របស់លោក អូបាម៉ា ដើម្បីលើកឡើងពីស្ថានភាពសិទ្ធិមនុស្ស បញ្ហាបោះឆ្នោត សិទ្ធិសេរីភាពបញ្ចេញមតិ និងបញ្ហាដីធ្លីនៅកម្ពុជា។
បញ្ហាដីធ្លីក៏ត្រូវបានប្រជាសហគមន៍បានជួបជុំនៅតំបន់បឹងកក់ជាថ្មីទៀត នៅថ្ងៃអង្គារនេះ ដោយលើកបដាសុំអន្តរាគមន៍ពីលោក អូបាម៉ា។ សហគមន៍ដីធ្លី ក៏មិនបានស្ងប់ចិត្តនឹងលទ្ធផលនៃកិច្ចប្រជុំរបស់លោក អូបាម៉ា និងលោកនាយករដ្ឋមន្ត្រី ហ៊ុន សែនកាលពីល្ងាចមិញឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ