សិទ្ធិមនុស្ស៖ បញ្ហារសើបក្នុងដំណើរទស្សនកិច្ចរបស់អូបាម៉ានៅកម្ពុជា
ប្រធានាធិបតីសហរដ្ឋអាមេរិក លោកបារ៉ាក់ អូបាម៉ានឹងមិនដល់កម្ពុជានៅថ្ងៃចន្ទស្អែក បន្ទាប់ពីលោកទស្សនកិច្ចប្រទេសថៃនៅថ្ងៃអាទិត្យនេះ និងប្រទេសមីយ៉ាន់ម៉ានៅព្រឹកថ្ងៃចន្ទស្អែក។ លោកអូបាម៉ានឹងត្រូវចូលរួមក្នុងកិច្ចប្រជុំកំពូលអាស៊ីបូព៌ានៅក្នុងរាជធានីភ្នំពេញ ហើយក៏មានគម្រោងជួបពិភាក្សាទ្វេភាគីជាមួយលោកនាយករដ្ឋមន្ត្រីហ៊ុន សែនដែរ។ តើអ្វីទៅជាប្រធានបទនៃការពិភាក្សាទ្វេភាគីរវាងមេដឹកនាំកម្ពុជា និងអាមេរិក ?គ្មានការបញ្ជាក់ផ្លូវការទេ ប៉ុន្តែប្រធានបទសិទ្ធិមនុស្សកំពុងតែក្លាយជាប្រធានបទរសើបមួយ។ នៅថ្ងៃនេះ មេដឹកនាំនៃប្រទេសសមាជិកអាស៊ានបានអនុម័តសេចក្តីថ្លែងការណ៍ស្តីពីសិទ្ធិមនុស្សអាស៊ាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២២
ជាច្រើនថ្ងៃមកហើយ វាបានកើតមានភាពចម្រូងចម្រាស់ជុំវិញរបៀបវារៈនៃជំនួបទ្វេភាគីរវាងលោកនាយករដ្ឋមន្ត្រីហ៊ុន សែន និងលោកប្រធានាធិបតីអាមេរិក បារ៉ាក់ អូបាម៉ា។ សារព័ត៌មានមួយចំនួនបានផ្សាយថា លោកអូបាម៉ានឹងលើកឡើងអំពីបញ្ហាការគោរពសិទ្ធិមនុស្សនៅកម្ពុជា ដូចការចង់បានរបស់សង្គមស៊ីវិល រីឯមន្ត្រីជាន់ខ្ពស់រដ្ឋាភិបាលធ្លាប់បានអះអាងថា មេដឹកនាំទាំងពីរនឹងជជែកគ្នាតែអំពីសហប្រតិបត្តិការទ្វេភាគី។ នៅថ្ងៃអាទិត្យនេះ ទីភ្នាក់ងារព័ត៌មានបារាំង AFP បានស្រង់សម្តីរបស់មន្ត្រីសេតវិមានដែលអះអាងថា លោកប្រធានាធិបតីអាមេរិកបារ៉ាក់ អូបាម៉ានឹងលើកឡើងអំពីបញ្ហាសិទ្ធិមនុស្សនៅកម្ពុជាជាមួយលោកនាយករដ្ឋមន្ត្រីកម្ពុជា។
ទីភ្នាក់ងារព័ត៌មាន AFP បានស្រង់សម្តីរបស់លោក Ben Rhodes អនុទីប្រឹក្សារបស់លោកអូបាម៉ាដែលនិយាយថា៖«យើងមានការព្រួយបារម្ភខ្លាំងណាស់ចំពោះបញ្ហាសិទ្ធិមនុស្សនៅកម្ពុជា។ លោកប្រធានាធិបតីពិតជានឹងលើកឡើងបញ្ហានេះ នៅពេលដែលលោកជួបជាមួយលោកនាយករដ្ឋមន្ត្រីហ៊ុន សែន»។ ទីប្រឹក្សាលោកបារ៉ាក់ អូបាម៉ាបានបន្តថា៖«យើងនៅបន្តបញ្ជាក់យ៉ាងច្បាស់ថា យើងចង់ឃើញសេរីភាពផ្នែកនយោបាយនៅកម្ពុជា។ យើងចង់ឃើញការបោះជំហានទៅមុខនូវការបោះឆ្នោតមួយដែលគួរជឿទុកចិត្តបាន និងយុត្តិធម៌។ យើងក៏ចង់ឃើញការដោះលែងអ្នកទោសនយោបាយផងដែរ»។
នៅថ្ងៃនេះ ក្រសួងការបរទេសកម្ពុជាក៏បានចេញសេចក្តីថ្លែងការណ៍មួយប្រតិកម្មទៅនឹងអត្ថបទរបស់ព្រឹត្តិបត្រ The Cambodia Daily ដែលបានចុះផ្សាយអត្ថបទមួយដែលនិយាយថា លោកអូបាម៉ានិយាយអំពីការរំលោភសិទ្ធិ និងការបោះឆ្នោតត្រឹមត្រូវ។ ដោយនិយាយការពារកម្ពុជាថា ជាប្រទេសមានអធិបតេយ្យ និងជានិតិរដ្ឋផងនោះ អ្នកនាំពាក្យក្រសួងកាបររទេសកម្ពុជាបានចាត់ទុកព្រឹត្តិបត្រ The Cambodia Daily និងលោកស្រី Samantha Power ដែលជាមន្ត្រីរបស់សេតវិមាន ហើយដែលត្រូវបាន The Cambodia Daily ស្រង់សម្តីនោះ ថាពួកគេទាំងនេះបានក្លាយទៅជាអ្នកនាំពាក្យរបស់គណបក្សប្រឆាំងនៅកម្ពុជាដែលកំពុងចង់ឈ្នះនៅក្នុងការបោះឆ្នោត។ អ្នកនាំពាក្យក្រសួងការបរទេសដដែលក៏បានច្រានចោលការចោទប្រកាន់ដែលថា រដ្ឋាភិបាលកម្ពុជាបណ្តេញប្រជាជនពីលំនៅដ្ឋានដោយបង្ខំផងដែរ។
នៅព្រឹកថ្ងៃអាទិត្យនេះ នៅពេលដែលមេដឹកនាំកំពូលនៃប្រទេសសមាជិកអាស៊ានកំពុងចុះហត្ថលេខាលើសេចក្តីថ្លែងការណ៍ស្តីពីសិទ្ធិមនុស្សអាស៊ាន ក្រុមពលរដ្ឋអ្នកបឹងកក់បានជួបជុំគ្នានៅលើវាលខ្សាច់បឹងកក់ លើបដាស្វែងរកជំនួយពីលោកប្រធានាធិបតីអាមេរិក បារ៉ាក់ អូបាម៉ា និងលោកស្រីហ៊ីលឡារី គ្លីនតុន ដើម្បីទាមទារផ្ទះរបស់ពួកគេមកវិញ។ ការអំពាវនាវដែលពួកគេបានផ្តើមធ្វើជាច្រើនថ្ងៃមកហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ