លោករ៉ូប៊ែរ មូហ្កាបេ វ័យ៨៣ឆ្នាំឈ្នះឆ្នោត បន្តធ្វើជាប្រធានាធិបតី
លទ្ធផលបោះឆ្នោតប្រធានាធិបតីបានចេញជាផ្លូវការ កាលពីល្ងាចថ្ងៃសៅរ៍ម្សិលមិញ ដោយបានផ្តល់ជ័យជំនះទៅឲ្យលោករ៉ូប៊ែរ មូហ្កាបេ ប្រធានាធិបតីអស់អាណត្តិឲ្យនៅបន្តតំណែងជាប្រធានាធិបតីរបស់ប្រទេសស៊ីមបាវ៉េ។ សហគមន៍អន្តរជាតិ ជាពិសេស ប្រទេសលោកខាងលិចសំដែងការមិនជឿទុកចិត្តលើលទ្ធផលបោះឆ្នោត និងថា មិនមែនចេញពីបំណងឆន្ទៈរបស់ប្រជាជន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៨
ក្នុងវ័យ៨៣ឆ្នាំ លោក រ៉ូប៊ែរ មូហ្កាបេយកជ័យជំនះបានយ៉ាងស្រួលលើបេក្ខជនគូប្រជែងដែលធ្លាប់ជានាយករដ្ឋមន្រ្តី ក្នុងរដ្ឋាភិបាលចម្រុះរបស់លោក។ កាលពីល្ងាចថ្ងៃសៅរ៍ម្សិលមិញ លទ្ធផលបោះឆ្នោតបានបង្ហាញថា រ៉ូប៊ែរ មូហ្កាបេ បានទទួលសំឡេងដល់ទៅ ៦១ភាគរយ ក្នុងពេលបក្សប្រឆាំងបានទទួលតែ៣៤ភាគរយប៉ុណ្ណោះ។ លើសពីនេះ លោក មូហ្កាបេ នៅបានទទួលសំឡេងគាំទ្រដល់ទៅ ២ភាគបី នៅក្នុងរដ្ឋសភាទៀត។
លោកមរហ្កាន ស្វាន់ជីរ៉ៃ គូប្រជែងតែមួយរបស់លោក មូហ្កាបេបានទាត់ចោលលទ្ធផលបោះឆ្នោត ដែលលោកវាយតម្លៃកើតចេញពីការបោះឆ្នោតមិនស្របច្បាប់ និងសំបូរដោយភាពមិនប្រក្រតី។ លើកនេះ លោក មរហ្កាន ស្វាន់ជីរ៉ៃ ដែលអះអាងថា នឹងមិនចូលរួមក្នុងការបង្កើតរដ្ឋាភិបាលចម្រុះដូចមុនទៀត។ ប្រមុខដឹកនាំបក្សប្រឆំាងប្រកាសផងដែរ ថាលោកនឹងប្តឹងទៅតុលាការពីលទ្ធផលបោះឆ្នោតលើកនេះ។
នៅក្នុងអំឡុងបោះឆ្នោត ដែលអ្នកសង្កេតការណ៍អឺរ៉ុបត្រូវគេហាមឃាត់មិនឲ្យចូលរួម គណបក្សប្រឆាំងបានរកឃើញមានភាពមិនប្រក្រតីជាច្រើន ដូចជា ការបន្លំសន្លឹកឆ្នោត ឬក៏អ្នកនៅទីក្រុងដែលគាំទ្រគណបក្សប្រឆាំងបានបាត់ឈ្មោះមិនឃើញនៅក្នុងបញ្ជីបោះឆ្នោត។ លោកJohn Kerry ប្រមុខការបរទេសអាមេរិកបានវាយតម្លៃថា លទ្ធផលបោះឆ្នោតនៅស៊ីមបាវ៉េមិនអាចជារឿងដែលគួរឲ្យជឿទុកចិត្តបានទេ។ អង់គ្លេស វិញដែលធ្លាប់ជាម្ចាស់អាណានិគមរបស់ប្រទេសស៊ីមបាវ៉េ បានសំដែងការព្រួយបារម្ភ ដែលឃើញអ្នកបោះឆ្នោតជាច្រើនត្រូវគេបញ្ជៀសមិនឲ្យទៅចូលរួមបោះឆ្នោត។
យ៉ាងណាក៏ដោយ សហភាពអាហ្រ្វិកដែលមានអ្នកសង្កេតការណ៍៧០នាក់តាមដានការបោះឆ្នោត វាយតម្លៃថា ការបោះឆ្នោតបានប្រព្រឹត្តទៅដោយសេរី និងគួរឲ្យជឿទុកចិត្ត។ ការអះអាងរបស់សហភាពអាហ្រ្វិកមានលក្ខណៈផ្ទុយពីការប្រកាសរបស់ខ្លួនប្រាប់អ្នកកាសែតដែលថា គេឃើញមានសន្លឹកឆ្នោត ដល់ទៅ ៣៧ភាគរយត្រូវបានបោះពុម្ពបន្ថែម។ ពោល គឺគេមានសន្លឹកឆ្នោត ដល់ទៅ៨លាន ៧សែនសន្លឹក ក្នុងពេលដែលអ្នកបោះឆ្នោត មានចំនួនតែ ៦លាន៤សែននាក់ប៉ុណ្ណោះ។ ជារួម ប្រសិនបើគ្មានអ្វី ប្រែប្រួល ពោលគឺតុលាការដែលស្ថិតក្រោមអំណាចរបស់លោកមូហ្កាបេ មិនសម្រេចចំណាត់ការលើពាក្យបណ្តឹងរបស់បេក្ខជនបក្សប្រឆាំងទេ នោះលោកមូហ្កាបេអាយុ ៨៩ឆ្នាំ ដែលកាន់អំណាចជាប្រធានាធិបតីផ្តាច់ការ អស់ ៣៣ឆ្នាំមកហើយនោះ នឹងបន្តគ្រប់គ្រងស៊ីមបាវ៉េ សម្រាប់រយៈពេល ៦ឆ្នាំទៅមុខទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ